قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي، وڭتۇستىك قازاقستان وبلىسى، ورداباسى اۋدانىندا ايەلدەر كەڭەسىنىڭ ۇيىمداستىرۋىمەن "انالار - شاڭىراقتىڭ شاتتىعى" سالتاناتتى شاراسى ءوتتى. بۇل تۋرالى "اباي اقپارات" پورتالى ورداباسى اۋدانى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

ورداباسى اۋدان اكىمى ا.مامىتبەكوۆ بارشا اق جاۋلىقتى انالاردى مەرەكەمەن قۇتتىقتاپ، بۇگىنگى قوعامداعى ايەلدەردىڭ ورنىنا ەرەكشە توقتالدى. سانالى ۇرپاق قالىپتاستىرۋداعى ەرەن ەڭبەكتەرىن اتاپ ءوتىپ، بارشا انالاردىڭ الدىندا باس يەتىنىن جەتكىزدى. وسىلايشا، اۋدانىمىزدىڭ التىن القالى جانە ارداگەرلەر انالارعا اق جاۋلىق جاۋىپ، نيەتتەستىگىن ءبىلدىردى.

1986 جىلعى جەلتوقسان وقيعاسىنا قاتىسقان نازىك جاندىلار دا ساحناعا شاقىرىلىپ، ماراپاتتالدى. قوعامدىق شارالاردا بەلسەندىلىگىمەن تانىلعان ازاماتشالارعا اۋداندىق ءماسليحاتتىڭ العىس حاتى تاپسىرىلدى.

ورداباسى اۋداندىق ءماسليحاتىنىڭ دەپۋتاتى ز.ماحانوۆا، اۋداندىق ايەلدەر كەڭەسىنىڭ ءتورايىمى م.زايتۇنقىزى ەلىمىزدىڭ تاۋەلسىزدىك العان جىلى شاڭىراق كوتەرگەن وتباسىلاردى مەرەيلى تويلارىمەن قۇتتىقتادى. ورداباسى اۋداندىق ءبىلىم جانە عىلىم قىزمەتكەرلەرى كاسىپوداعىنىڭ ءتورايىمى رەتىندە زاميرا سابەكقىزى ۇستازدار اراسىنداعى 25 جىل وتاسقان وتباسىلارىن ماراپاتتاپ، سىي-سياپات تابىستادى.

ءمانى دە ماعىناسى دا تەرەڭ شارا اۋداندىق مادەنيەت ءۇيى ونەرپازدارىنىڭ كونتسەرتىنە ۇلاستى. ەسكەرتە كەتەيىك، مۇنداي شارالار وڭتۇستىك قازاقستان وبلىسىندا تۇڭعىش رەت ۇيىمداستىرىلىپ وتىرعان جوق اسىل جاندى انالارعا قۇرمەت كورسەتۋدىڭ ناق ۇلگىسىن ءوڭىر باسشىسى بەيبىت باكىرۇلىنىڭ ءوزى باستاپ كورسەتكەن بولاتىن.

ورداباسى اۋدانى اكىمىنىڭ ءباسپاسوز قىزمەتى

Abai.kz