قاراعاندىلىق ونەرتاپقىش ءالي مەحتيەۆ وسى اپتادا رەسپۋبليكالىق «بولاشاق ەنەرگياسى» بايقاۋىندا كوش باستادى. بۇل تۋرالى «radiotochka.kz» پورتالى حابارلايدى. ونىڭ «ەنەرگيا ساقتايتىن تەرىس قىسىمدى بۋ ەلەكتر جىلىتقىشى» اتتى جوباسىنا 2449 ادام داۋىس بەرگەن.

قۇرىلعى تۇتىك تۇرىندە جاسالعان. ونىڭ ىشىنەن اۋا تارتىپ شىعارىلىپ، ورنىنا سۇيىق جىلۋ تاسىمالداعىش قۇيىلادى. ونەرتابىس ەلەكتر ەلەمەنتتەرىمەن قىزدىرىلادى. قىسىم تومەن بولعان جاعدايدا سۋ 40 گرادۋستا قايناپ، بۋعا اينالادى. تۇتىك ساناۋلى سەكۋندتار ىشىندە وتە تەز قىزادى، ناتيجەسىندە ەلەكتر جىلىتقىشى ءسىز ونى قوسقان ساتتەن باستاپ بىردەن جىلۋ بولە باستايدى.

وتكەن اپتادا بايقاۋدا بەرىلگەن داۋىستار ناتيجەسى بويىنشا اتىراۋ وبلىسىنىڭ وكىلى ەرجان نۇريدەنوۆتىڭ «جاساندى كۇن-جەل اعاشى» اتتى جوباسى ءبىرىنشى ورىندا بولعانىن ەسكە سالا كەتەيىك. وسى اپتادا كوش باسىنداعى ۇشتىكتى «ەنەرگيا تيىمدىلىگىن جانە ەكولوگيالىق قاۋىپسىزدىكتى ارتتىرۋعا ارنالعان جانۋ كامەراسىنىڭ رەزوناتورلارى» جوباسىمەن الماتىلىق دينا نۇسىپبەكوۆا قورىتىندىلادى.

2016 جىلدىڭ تامىز ايىندا «استانا ەكسپو-2017» ۇك» اق جانە قر ەنەرگەتيكا مينيسترلىگى «جاسىل» تەحنولوگيالار سالاسىنداعى قازاقستاندىق ونەرتاپقىشتار اراسىندا «بولاشاق ەنەرگياسى» اتتى تەلەۆيزيالىق بايقاۋ جاريالاعان بولاتىن.

اتالعان جوبادا ارنايى قازىلار القاسى جوق. قازاقستاندىقتار جەڭىمپازدى وزدەرى انىقتايدى. جەڭىسكە جەتكەن ونەرتاپقىش ءوز جۇمىسىن ەكسپو-2017 حالىقارالىق كورمەسى بارىسىندا قازاقستان رەسپۋبليكاسىنىڭ ۇلتتىق پاۆيلونىندا تانىستىرۋ مۇمكىندىگىنە يە بولادى.

ەڭ قىزىق دەپ تاپقان جوبا ءۇشىن ءسىز www.yourexpo.kz سايتىنا كىرىپ، داۋىس بەرە الاسىز. ونەرتاپقىشتار وسى سايتتا بايقاۋعا قاتىسۋ تۋرالى ءوتىنىش قالدىرا الادى.

قازىرگى ۋاقىتتا قازاقستاننىڭ التى وڭىرىنەن بارلىعى 16 ونەرتاپقىش بايقاۋعا قاتىسىپ جاتىر.

Abai.kz