«ەل تاۋەلسىزدىگىنىڭ شيرەك عاسىرلىق تويىن لايىقتى تابىستارمەن قارسى الۋ جولىندا كوپتەگەن يگىلىكتى شارالار وتكىزىلۋدە. سونداي شارانىڭ ءبىرى - شاربۇلاق اۋىلىنا تابيعي گاز جۇيەسىنىڭ قوسىلۋى دەر ەدىم. ارينە، ەلدى مەكەندەرگە تابيعي گاز جۇيەسىنىڭ قوسىلۋى ۇلكەن قۋانىش. اسىرەسە، كۇندەلىكتى اعاش جارىپ، تەزەك تەرىپ، كۇل شىعارىپ جۇرگەن انالارىمىزدىڭ جۇمىسىن جەڭىلدەتەدى». بۇل وڭتۇستىك قازاقستان وبلىسى قازىعۇرت اۋدانىنىڭ اكىمى تولەگەن تەلعاراەۆتىڭ 4,5 مىڭعا جۋىق تۇرعىنى بار شاربۇلاقتىقتارعا كوگىلدىر وتىن جالعاۋ سالتاناتىندا ايتقان ءسوزى.

قازىعۇرتتىقتار ءۇشىن بۇل كۇن قۋانىشىمەن ەستە قالاتىنى انىق. ويتكەنى، وسى كۇننەن باستاپ اۋدانداعى 16 ەلدى مەكەننىڭ، اتاپ ايتقاندا شاربۇلاقتان بولەك اششىبۇلاق، جاڭابازار، جىلىبۇلاق، جاڭاجول، جاڭاتالاپ، قاراباستاۋ، تىلەكتەس، ۇلگىلى، قاراباۋ، سىنتاس، جۇمىسشى، ۇشبۇلاق، ماحامبەت وتەمىسۇلى اۋىلى، ۇشبۇلاق جانە جىڭىشكە ەلدى مەكەندەرىنىڭ تۇرعىندارى كومىر جاعۋ ماشاقاتىنان ءبىرجولاتا قۇتىلىپ، وركەنيەتتىڭ يگىلىگىنە قول جەتكىزۋدە.

وبلىس اكىمى ءباسپاسوز قىزمەتىنىڭ مالىمەتىنە سەنسەك، اۋداندا جىل سوڭىنا دەيىن تاعى وسىنشا ەلدى مەكەنگە تابيعي گاز قوسىلادى دەپ كۇتىلۋدە. جوسپار تولىعىمەن ىسكە اساتىن بولسا، اۋدانداعى كوگىلدىر وتىنمەن قامتۋ جۇمىستارىنىڭ كورسەتكىشى 65 پايىزعا جەتەدى ەكەن. وتكەنگە كوز جۇگىرتەر بولساق، 2012 جىلعا دەيىن اۋدانداعى 64 ەلدى مەكەنننىڭ نەبارى 10-ى عانا كوگىلدىر وتىنمەن قامتىلعان بولسا، 2012-2014 جىلدار ارالىعىندا تابيعي گازدى تۇتىنۋشىلار قاتارىنا تاعى 32 ەلدى مەكەن قوسىلعان بولاتىن. وسى قارقىن توقتامايتىن بولسا، ەندىگى بىرەر جىلدا اۋدان حالقى تولىعىمەن تابيعي گازعا قوسىلۋى ابدەن مۇمكىن. 

Abai.kz