شىمكەنت قالاسىندا  «بولاشاعى جارقىن وڭتۇستىك جاستارى» وڭىرلىك جاستار فورۋمى ءوتتى. شاراعا وبلىس اكىمى ج.تۇيمەباەۆ، اۋدان، قالا «جاستار رەسۋرستىق ورتالىقتارىنىڭ» جەتەكشىلەرى، جوعارى جانە ورتا ارناۋلى وقۋ ورىندارىنىڭ جاستار كوميتەتتەرى، وبلىستىق قازاقستان حالقى اسسامبلەياسىنىڭ جاستار قاناتتارى، رەسپۋبليكالىق، وبلىستىق جاستار ۇيىمدارى مەن  وبلىستاعى بەلسەندى جاستار جانە باق وكىلدەرى، بارلىعى 400-گە جۋىق ازامات قاتىستى.

جاستار فورۋمىنىڭ جۇمىسىنا ساتتىلىك تىلەگەن ءوڭىر باسشىسى جانسەيىت تۇيمەباەۆ  كەز كەلگەن مەملەكەتتىڭ دامۋى مەن ەكونوميكاسىنىڭ ءوسۋى جاستاردىڭ قاتىسۋىنسىز  مۇمكىن ەمەستىگىن ايتىپ، بولاشاعىمىز  جاستاردىڭ قولىندا ەكەنىن جەتكىزدى.

وبلىستىق جاستار ساياساتى باسقارماسى ۇيىمداستىرعان فورۋمدا ەلىمىزدەگى مەملەكەتتىك جاستار ساياساتىنىڭ جۇزەگە اسىرىلۋى مەن اۋىل جاستارىن بيزنەسكە تارتۋ، جاستار مەن جاسوسپىرىمدەر اراسىنداعى قىلمىس پەن قۇقىقبۇزۋشىلىقتىڭ الدىن الۋ ماسەلەلەرى قارالدى.

جيىن بارىسىندا وسى جىلدىڭ 1 جەلتوقسان كۇنى استانا قالاسىندا وتەتىن رەسپۋبليكالىق جاستار فورۋمىنا وڭتۇستىك قازاقستان وبلىسىنان 102 دەلەگاتتىڭ باراتىنى انىقتالدى. سونىمەن قاتار، جىلدىڭ ۇزدىك سالا ماماندارى وبلىس اكىمىنىڭ العىس حاتىمەن ماراپاتتالىپ، ۇندەۋ جاريالاندى.

كەزدەسۋ سوڭىندا جاستار اكىمگە كاسىپكەرلىكپەن شۇعىلدانۋعا قولداۋ كورسەتۋ، شەتەلدىك وقۋ ورىندارىنا گرانت ءبولۋ، مەملەكەتتىك قىزمەتتە ساتىلاي ءوسۋ سىندى بىرقاتار ساۋالدار قويىپ، تۇشىمدى جاۋاپتار الدى.

جيىندى قورىتىندىلاعان وبلىس اكىمى تاۋەلسىزدىك العان جىلداردان بەرى ەلىمىزدە وسكەلەڭ ۇرپاقتىڭ بولاشاعى ءۇشىن ءتۇرلى مەملەكەتتىك باعدارلامالار مەن جوبالار جاسالىنىپ، كەلەشەگىمىز - جاستاردىڭ بولاشاعىنا ينۆەستيتسيا سالىنىپ جاتقانىن ايتتى. بوس ۋاقىتتى ءتيىمدى وتكىزۋ كەرەكتىگىن ايتقان اكىم جاستاردى سپورتپەن اينالىسۋعا جانە ەگەمەندىگىمىزدىڭ 25 جىلدىق مەرەيتوي قۇرمەتىنە ءاربىر جاستى ءبىر ءتۇپ اعاش وتىرعىزۋعا شاقىردى. سونداي-اق، مۇنداي ماڭىزدى باسقوسۋلاردى جىلىنا ەكى رەت ۇيىمداستىرۋ قاجەتتىگىنە توقتالدى.

ايتا كەتەيىك، بۇگىندە وبلىستاعى جاستار سانى 800 مىڭعا جۋىق ازاماتتى قۇرايدى. بۇل ءوز كەزەگىندە رەسپۋبليكامىزدىڭ كەيبىر وبلىستارىنىڭ جالپى حالقىنىڭ سانىنان دا جوعارى ەكەنىن كورسەتەدى.  ال وبلىستاعى 12 جوعارى جانە 91 ورتا ارناۋلى وقۋ ورىندارىندا جالپى سانى 138 مىڭ ستۋدەنت ءبىلىم الۋدا. سونىمەن قاتار، «نۇر وتان» پارتياسىنىڭ وبلىستىق فيليالىنىڭ «جاس وتان» جاستار قاناتىندا 23 مىڭ جاستار مۇشەسى بار.

Abai.kz