ريو-دە-جانەيرو قالاسىنداعى وليمپيادا پاركىنىڭ جۇمىسشىلارى. برازيليا، 30 شىلدە 2016 جىل.

برازيليادا وسى اپتادا جازعى وليمپيادا ويىندارى اشىلادى. قازاقستان قۇراماسىندا مارتەبەلى جارىسقا تۇڭعىش رەت قاتىسىپ جاتقاندارمەن بىرگە وليمپيادا جەڭىمپازى مەن جۇلدەگەرى اتانعاندار دا بار.

قازاقستان ريو-دە-جانەيرو قالاسىندا وتكەلى وتىرعان جازعى وليمپيادا ويىندارىنا ءاۋ باستا 108 جولداماعا يە بولعان ەدى. بىراق وليمپيادا قارساڭىندا تەننيسشىلەر ميحايل كۋكۋشكين مەن يۋليا پۋتينتسەۆانىڭ جاراقات الۋى سەبەپتى ريوداعى ويىندارعا قاتىسپايتىنى بەلگىلى بولدى. ەرەجە بويىنشا، ولاردىڭ جولداماسى باسقا قازاقستاندىق تەننيسشىلەرگە بەرىلمەيدى.

بۇدان بولەك، حالىقارالىق اۋىر اتلەتيكا فەدەراتسياسى بيىل دوپينگ جانجالىنا بايلانىستى قازاقستان قۇراماسىن ەكى ليتسەنزيادان (1-ەر جانە 1-ايەل) ايىرعان.

ريو وليمپياداسىنىڭ اشىلۋ سالتاناتىندا قازاقستان سپورتشىلارى كيىپ شىعاتىن فورما (كورنەكى سۋرەتتى قازاقستان وليمپيادا كوميتەتىنىڭ ءباسپاسوز قىزمەتى ۇسىندى)

وسىلايشا، قازاقستان قۇراماسىنان بۇل جولى جازعى وليمپياداعا بارلىعى 104 سپورتشى قاتىسادى. اتاپ ايتقاندا، بوكستان 12 سپورتشى (ون جىگىت پەن ەكى قىز), ەركىن كۇرەس - 5, گرەك-ريم كۇرەسى - 3, ايەلدەر كۇرەسى - 4, تاس جولداعى ۆەلوجارىس - 2, ۆەلوترەك - 1, كوركەم گيمناستيكا - 1, اكروباتيكا - 1, قايىقتا ەسكەك ەسۋ - 2, بايداركا جانە كانوە - 11, كەدەرگىلەر ارقىلى ەسكەك ەسۋ - 1, دزيۋدو - 6, جەڭىل اتلەتيكا - 26, سۋعا ءجۇزۋ - 3, مانەرلەپ ءجۇزۋ - 2, بەسسايىس - 2, ساداق اتۋ - 2, نىسانا كوزدەۋ - 5, تاەكۆوندو - 3, تەننيس - 2, ۇستەل تەننيسى - 1, اۋىر اتلەتيكا – 8 جانە سەمسەرلەسۋ – 1 ادام قازاقستاننىڭ اتىنان سىنعا تۇسەدى.

بۇعان دەيىن، 1996 جىلعى اتلانتا وليمپياداسىن (96 سپورتشى) ەسەپتەمەگەندە، قازاقستان جازعى وليمپيادا ويىندارىنا 110 سپورتشىدان كەم اپارمايتىن.

ۆەلوسپورتتان جاستار اراسىنداعى الەم چەمپيونى الەكسەي لۋتسەنكو دا وليمپيادا باستالۋعا ءبىر اپتا قالعاندا جاتتىعۋ كەزىندە جاراقات الىپ، برازيلياداعى جارىسقا بارا المايتىنى بەلگىلى بولدى. ونىڭ ورنىنا قازاقستاندىق ۆەلوسپورتشى اندرەي زەيتس قاتىسادى.

بۇعان دەيىن سيدنەي، افينا، پەكين جانە لوندون ويىندارىندا كوماندالىق سپورتتىڭ كەم دەگەندە ءبىر تۇرىنەن باسەكەگە ارالاسىپ كەلگەن قازاقستان ريودا كوماندالىق سپورت تۇرلەرىنەن سىنعا قاتىسپايدى. ۆولەيبول مەن رەگبيدەن ايەلدەر قۇراماسى، سۋ دوبىنان ەرلەر مەن ايەلدەر قۇرامالارى ىرىكتەۋگە قاتىسقانىمەن، جولداماعا قول جەتكىزە المادى.

2012 جىلى لوندون وليمپياداسىندا مەدال العان 13 قازاقستاندىق سپورتشىنىڭ تەك تورتەۋى عانا ريوعا بارادى. ولار – لوندون ويىندارىنىڭ چەمپيونى ولگا رىپاكوۆا (جەڭىل اتلەتيكا), كۇمىس جۇلدەگەرى ادىلبەك نيازىمبەتوۆ (بوكس), قولا مەدال يەگەرلەرى گيۋزال مانيۋروۆا (ايەلدەر كۇرەسى) مەن يۆان دىچكو (بوكس). ولگا رىپاكوۆا وسىمەن ءۇشىنشى وليمپياداسىنا قاتىسقالى وتىر.

لوندوندا التىن العان اۋىر اتلەتتەر يليا يلين، سۆەتلانا پودوبەدوۆا، ءزۇلفيا چينشانلو جانە مايا مانەزا دوپينگ داۋىنا بايلانىستى ۋاقىتشا جارىستاردان شەتتەتىلىپ، ريو وليمپياداسىنان تىس قالعان.

ال بوكستان قازاقستان جىگىتتەرى العاش رەت وليمپياداعا بارلىق ون سالماق دارەجەسى بويىنشا سىنعا تۇسەدى. قۇرامانىڭ باس باپكەرى مىرزاعالي ايتجانوۆ قازاقستاندىق بوكسشىلار ريودا ەكى التىن الۋدى جوسپارلاپ وتىرعانىن ايتادى.

وليمپيادا قالاشىعىندا جۇرگەن قازاقستان بوكسشىلارى. ريو-دە-جانەيرو، 29 شىلدە 2016 جىل.

48 كيلوگرامم سالماق دارەجەسى بويىنشا سىنعا تۇسەتىن بوكسشى ءبىرجان جاقىپ ءۇشىن بۇل ءۇشىنشى وليمپيادا بولماق. سونىمەن بىرگە، قىزدار اراسىنداعى بوكس باسەكەسىنە ەكى قازاقستاندىق قاتىسادى.

وليمپياداعا قاتىساتىن قازاقستاندىق سپورتشىلاردىڭ ەڭ جاسى – 17 جاستاعى سابينا اشىرباەۆا (كوركەم گيمناستيكا), ال ەڭ ۇلكەنى – 37 جاستاعى راشيد يۋنۋسمەتوۆ (نىسانا كوزدەۋ).

بۇعان دەيىن ۆەلوترەكتەن وليمپياداعا سوڭعى رەت 1996 جىلى قاتىسقان قازاقستان بۇل سپورتقا اراعا 20 جىل سالىپ ورالىپ وتىر. ۆەلوترەكتەن وليمپياداعا جولدامانى الەم كۋبوگى كەزەڭدەرىنىڭ جۇلدەگەرى ارتەم زاحاروۆ ۇتىپ العان.

جەڭىل اتلەتيكادان قازاقستان ايەلدەر قۇراماسى العاش رەت 100 مەترلىك ەستافەتا (4x100 م) جارىسىنا جولداما الدى. قازاقستان ەستافەتاشىلارى اقش، يامايكا، برازيليا، ترينيداد جانە توباگو، برازيليا، قىتاي قۇرامالارىمەن سىنعا تۇسەدى.

قازاقستان قۇراماسى ساپىندا بۇل جولعى وليمپياداعا تۇركيادا تۋعان ەتنيكالىق قازاق جانسەل دەنيز (تاەكۆوندو), موڭعوليادان كەلگەن گالبادراح وتگونتسەتسەگ (دزيۋدو), ۋكراينادان كەلگەن ەكاتەرينا پوتاپەنكو (قازىرگى بەسسايىس), قىتايدان كەلگەن فارحاد حاركي مەن ارلي چونتەي جانە ازەربايجاننان كەلگەن نيجات راحيموۆ (ۇشەۋى دە اۋىر اتلەتيكا), رەسەيدەن كەلگەن بالۋان ارتاس ساناا قاتىسادى. ارتاس ساناا وليمپيادا الدىندا اتى-ءجونىن نۇريسلام ساناەۆ دەپ وزگەرتتى.

تامىزدىڭ 5-ءى كۇنى ريو-دە-جانەيرو قالاسىندا 31-جازعى وليمپيادا ويىندارىنىڭ اشىلۋ سالتاناتىندا قازاقستان تۋىن تاەكۆوندوشى رۋسلان جاپاروۆ ۇستاپ شىعادى.

تامىزدىڭ 21-ىنە دەيىن جالعاساتىن ريو وليمپياداسىندا سپورتتىڭ 28 تۇرىنەن 306 مەدال جيىنتىعى ساراپقا سالىنادى.

(ماتەريال «ازاتتىق» سايتىنان الىندى)

Abai.kz