بۇگىن وڭتۇستىك قازاقستان وبلىسىنىڭ قازىعۇرت اۋدانىندا قارالى جيىن ءوتتى. اۋداننىڭ قاراباستاۋ اۋىلىنىڭ تۇرعىندارى مەن ىشكى ىستەر سالاسىنىڭ قىزمەتكەرلەرى الماتىدا ورىن العان وقىس جاعداي كەزىندە اۋىر جارالانىپ، جان ساقتاۋ بولىمىندە كەشەگى كۇنى كوز جۇمعان پوليتسيا لەيتەنانتى مەيرامبەك راحماتۋللاەۆتى اقتىق ساپارعا شىعارىپ سالدى. جەرلەۋ راسىمىنە وقو اكىمدىگى مەن الماتى قالالىق اكىمدىگىنىڭ وكىلدەرى، سونداي-اق، ىشكى ىستەر سالاسىنىڭ جەتەكشىلەرى دە قاتىستى. 

قارالى باسقوسۋعا كەلگەن وبلىس اكىمىنىڭ ورىنباسارى ج.بوكەنباەۆ ەرلىكپەن قازا تاپقان مارقۇمنىڭ بۇل قايعىسى ونىڭ تۋىستارىنىڭ عانا ەمەس، بارشا قازاقستاندىقتاردىڭ كوڭىلىنە قاياۋ سالعانىن بايان ەتتى. 

ايتا كەتەيىك، م.راحماتۋللاەۆتىڭ تۋىستارىنا الماتى قالالىق اكىمدىگىنەن 15 ملن. تەڭگە، وڭتۇستىك قازاقستان وبلىسىنىڭ اكىمدىگىنەن قوسىمشا 5 ملن. تەڭگە بەرىلەتىن بولادى. سونىمەن بىرگە، ىشكى ىستەر سالاسىنىڭ قىزمەتكەرلەرى ءبىر كۇندىك جالاقىلارىن الماتىدا بولعان قاندى وقيعا كەزىندە قازا تاپقاندار مەن زارداپ شەككەندەردىڭ وتباسىلارىنا اۋدارۋدى ۇيعارىپ وتىر.

ەسكە سالايىق، شىلدە ايىنىڭ 18-ىندە الماتى قالاسىندا تەررورلىق اكت ورىن الدى. اي مەن كۇننىڭ امانىندا سۋىق قارۋلانعان بۇزاقى ازامات 8 ادامدى جارالىپ، 8 ادامنىڭ ءومىرىن قيعان بولاتىن. سونىڭ ءبىرى، جەرلەسىمىز، پوليتسيا لەيتەنانتى مەيرامبەك نۇريديللاۇلى راحماتۋللاەۆ ەدى. ول كەشە باسىنان العان اۋىر جاراقاتى سالدارىنان اۋرۋحانادا كوز جۇمدى. 

اباي-اقپارات