قىتايدا وقىپ جۇرگەن قازاقتىڭ قىز-جىگىتتەرى وقۋدان تىس ۋاقىتتا باي قىتايلاردىڭ كوڭىلىن كوتەرىپ، اقشا تابادى ەكەن. بۇل تۋرالى ستۋدەنت نۇرجان بارلىباەۆ newtimes.kz سايتىنا ايتىپ بەرگەن.  نۇرجان ءۇش جىلدان بەرى قىتايدىڭ سيان قالاسىندا وقىپ جۇرگەن ستۋدەنت. ونىڭ سوزىنە قاراعاندا، قازاقستاننان بارعان كەيبىر ستۋدەنتتەر اقشا تابۋ ءۇشىن وقۋدان تىس ۋاقىتتا باي قىتايلاردىڭ كوڭىلىن كوتەرەدى.

«نەگىزىنەن قىتاي ەركەكتەرى قىزدارمەن بىرگە ءىشىپ-جەپ، كوڭىل كوتەرەدى. ەگەر قازاق قىزى قىتايشا بىلسە، وندا ول باعالانادى. ونداي قىزدار قىمبات تۇرادى. كوڭىل كوتەرۋ كەشى اياقاتلعان سوڭ، كليەنت قوسىمشا اقىعا قىزدى الىپ كەتە الادى»، دەپتى بارلىباەۆ.

مۇنداي ىسپەن جىگىتتەر دە اينالىسىپ، باي قىتاي ايەلدەرىنىڭ كوڭىلىن اۋلايدى دەيدى نۇرجان. ال، قىزداردى جۇمىسقا الار كەزدە ولاردىڭ جاسىنا ەمەس، سىرتقى سۇلۋلىعىنا ءمان بەرەدى. سۇلۋ قىزدار ءبىر كەشتە 70-100 مىڭ تەڭگە اقشا تابادى.

نۇرجان بارلىباەۆ ءوز جەرلەستەرىنىڭ مۇنداي قىلىقتارىنا ۇيالاتىنىن، ولار قىتايدىڭ بايلارىنىڭ كوڭىلىن كوتەرۋ ءۇشىن ەمەس، وقۋ ءۇشىن بارعانىن سوندىقتان، شەتەلدە ەلدىڭ اتىنا كىر كەلتىرمەي، دۇرىس ءجۇرىپ-تۇرىپ، وقۋدى عانا ماقسات ەتۋگە شاقىرادى.

قىتايدا وقىپ جۇرگەن ستۋدەنتتەردىڭ مۇنداي ورەسكەل قىلىقتارى تۋرالى وسىدان ەكى جىل بۇرىن دا جازىلعان ەدى. ول كەزدە جۇلدىز ەسىمدى قىتاي تۋعان قازاق قىزى قازاقستانعا بەيتانىس قۇربىسىنا باعىتتاپ حات جازىپ، وندا قازاقستاننان  وقۋعا بارعان قىزداردىڭ ءجۇرىس-تۇرىسى جايلى جازعان بولاتىن. حات «قازاق ءۇنى» سايتىندا جاريالانعان ەدى.

P.S.

قازىرگە ۋاقىتتا قىتايعا ءارتۇرلى باعدارلامالار ارقىلى ءتۇرلى مەرزىمدە وقىپ جۇرگەن ەل ازاماتتارى بارشىلىق. الايدا، ولاردىڭ بارلىعى نۇرجان ايتقانداي ىسپەن اينالىسپايتىنى انىق. بۇل جاعداي ءبىر قالاداعى كەيبىر ستۋدەنتتەردىڭ  ىستەپ جۇرگەنى بولسا كەرەك.

نۇرا ماتاي

Abai.kz