جۋىردا عانا ريو تورىندە تورەشىلەردىڭ ادىلەتسىزدىگىنىڭ قۇربانى بولعان قازاقستاندىق بوكسشى ۆاسيلي لەۆيتتى ايتپاعاندا، باس باپكەردىڭ شاكىرتتەرى شەكە قىزدىرىپ تۇرماعانى راس. دانيار ەلەۋسىنوۆتىڭ جالعىز التىنىن جانعا مەدەۋ تۇتىپ، تاۋبە دەستىك. جوق، ريو مەدالدەرى جوق ەمەس. بار. تەك، ءبىزدىڭ بوكسشىلار اقىرعى ساتتە سالبىرت قيمىلداپ، قولداعى التىندى، قولداعى جۇلدەنى وزگەگە ۇستاتىپ جاتىر.

وسى جولى ءوزىنىڭ ءۇشىنشى وليمپياداسىنا بارعان ءبىرجان جاقىپوۆ جەر يىسكەپ قايتتى. ءۇش وليمپيادادان دا ءبىرجان جۇلدەسىز قايتتى. بيىل جەكپە-جەككە شىققان وزبەك سپورتشىلارى مىقتى بولدى، راس. ءبىز سونى كوردىك. كوممەنتاتورلار دا «بۇلاردىڭ بويىنداعى جەڭىسكە دەگەن قۇشتارلىق قانداي كۇشتى!» دەپ، قايتا-قايتا تاڭداي قاعۋعا ءماجبۇر.

كۇللى قازاق جۇرتى ءۇمىت ارتقان جانىبەك ءالىمحانۇلى وليمپياداعا ەمەس، اۋدانارالىق جارىسقا قاتىسىپ جاتقانداي ءجۇردى. ءبىرىنشى راۋندتتا بىردە-ءبىر سوققى جۇمساي الماعان جانىبەك مىرزاعالي ايتجانوۆتىڭ ايعايىن تىڭداعان جوق. راس، ايقىن جەڭىلدى، داۋسىز جەڭىلدى.  

حوش، ۆاسيلي لەۆيتتى ادىلەتسىز قازىلار القاسى رەسەيلىكتەرگە جىعىپ بەردى. وعان داۋىمىز جوق.

ال ايبا-نىڭ دۇردەي ۆيتسە-پرەزيدەنتى سەرىك قوناقباەۆ مىرزا وسىنداي ورەسكەل قاراۋلىققا جول بەرىپ اي قاراپ وتىر ما؟ قوناقباەۆ نەگە ء«لام-ميم» دەمەيدى؟

ەندى كەشە ادىلبەك نيازىمبەتوۆ شارشى الاڭعا شىققاندا قازاق ادىلبەكتەن التىن كۇتتى. وكىنىشكە وراي كۋبالىق بوكسشى ويناپ ءجۇرىپ ويسىراتتى، ادىلبەكتى. جاۋاپكەرشىلىك قايدا؟ ءتورت جىل بويى دايىندالعان بوكسشىنىڭ جۇدىرىقتاسۋى ءدال كەشەگىدەي بولماس ەدى، ءسىرا.

ماسقاراسى سول – مۇنى ء بىز عانا ەمەس، الەم سولاي كوردى. سولاي قابىلدادى. «كۋبالىق بوكسشى بوكس ەمەس – پورنوگرافيا كورسەتتى» دەپ جازىپ جاتىر.

رەسەيلىك وليمپيادا چەمپيونى ەگور مەحونتسەۆ ادىلبەك نيازىمبەتوۆ پەن حۋليو سەسار لا كرۋستىڭ فينالداعى كەزدەسۋىنەن كەيىن «بۇل بوكس ەمەس، پورنوگرافيا. مۇنى كۋبالىق جاسادى. بۇل بوكس ماسقاراسى!»، - دەپ جازعان Instagram جەلىسىندەگى پاراقشاسىندا.

بۇل جەكپە-جەكتە قازىلاردىڭ ءبىراۋىزدان جاساعان شەشىمى بويىنشا لا كرۋس جەڭدى جانە التىن مەدالدىڭ يەگەرى اتاندى. الايدا مەحونتسەۆ كۋبالىقتىڭ رينگتەگى جۇدىرىقتاسۋ مانەرى ۇناماي قالىپتى.

ال بوكستان قازاقستان قۇراماسىنىڭ باس باپكەرى مىرزاعالي ايتجانوۆ بۇل جەكپە-جەكتە ءوز شاكىرتى جەڭىسكە جەتتى دەپ ەسەپتەيتىنىن مالىمدەپ وتىر. "ول ادىلبەكتى جەڭدى دەپ ايتا المايمىن - قاشىپ ءجۇردى. بىراق بۇل بوكس، كۋبالىقتىڭ سوققىلارى ءتيىپ جاتتى. الايدا ادىلبەكتىڭ سوققىلارى مىقتىراق بولدى. بارلىق ءۇش راۋندتا قارسىلاسىنا سوققى دارىتا ءبىلدى. الەمنىڭ ءۇش دۇركىن چەمپيونىن قۇلاتا سالۋ وڭاي ەمەس. مەنىڭشە، ادىلبەك جەڭدى. زالداعىلار دا وسىلاي دەيدى. قازاقستاننىڭ جەڭگەنىن بارلىعى ايعايلاپ جاتتى", - دەدى باس باپكەر شاكىرتىنىڭ جەكپە-جەگىنەن كەيىن بەرگەن سۇحباتىندا.

ايتپاقشى، لوندوندا فينالعا شىققان ادىلبەك جانىن اياپ ايقاسقانىنىڭ كەسىرىنەن التىننان ايرىلىپ قالعان ەدى. بۇل جولى دا سولاي بولدى. وكىنىشكە وراي، ايتجانوۆتىڭ شاكىرتتەرى اقىرىنا دەيىن شىداماي جاتقانى راس.

ەندى ەكى بوكسشىمىز ريو تورىندە جۇدىرىقتاسادى. ازىرگە قازاقستاندىق سپورتشىلار جۇرتتى كۇمىسكە كۇپتى قىلىپ وتىر. ارمانىمىز – التىن!

نۇرزات توعجان

Abai.kz