بۇگىن ءوڭىر باسشىسى ب.اتامقۇلوۆ شىمكەنت قالاسىنداعى جاڭادان پايدالانۋعا بەرىلگەن №54 جالپى ورتا مەكتەبىنىڭ «العاشقى قوڭىراۋ» سالتاناتتى شاراسىنا قاتىسىپ، جاڭا وقۋ جىلىندا شاكىرتتەرگە ساتتىلىك تىلەدى. بۇل تۋرالى «وقو اكىمىنىڭ ءباسپاسوز قىزمەتى» حابارلايدى.

«ەڭبەكتىڭ ەڭ ۇلكەنى – ءبىلىم! جاھاندانۋ پروتسەسى بارىسىندا ءبىز ءبىلىم ساپاسىنا ەرەكشە كوڭىل ءبولۋىمىز كەرەك. سوندا عانا باسەكەگە قابىلەتتى ەل بولامىز. بيىل 73 مىڭنان اسا ءبىرىنشى سىنىپ وقۋشىلارى العاش رەت مەكتەپ تابالدىرىعىن اتتادى. بۇل وتكەن جىلمەن سالىستىرعاندا، ءتورت مىڭعا جۋىق بالاعا كوبەيگەن. مەن وبلىسىمىزدا ءبىرىنشى سىنىپقا بارعان ءاربىر شاكىرتتىڭ مەكتەپ الاڭىنا ءوز اعاش كوشەتىن وتىرعىزۋدى ۇسىنامىن. بۇل جاقسى داستۇرگە اينالسا ەكەن دەيمىن. ءاربىر وقۋشى ءوز اعاشىنىڭ كوركەيگەنىن كورىپ وسسە، كەلەشەكتە مەيىرىمدى، قورشاعان ورتاعا جاناشىر بولادى. بۇل دا بالا تاربيەلەۋدىڭ ءبىر امالى دەپ ويلايمىن»، - دەدى وبلىس اكىمى.

ايتا كەتەيىك، اباي اۋدانىنا قاراستى «ىنتىماق» شاعىن اۋدانى حالقىنىڭ كۇن ساناپ وسۋىنە بايلانىستى بوي كوتەرگەن جاڭا مەكتەپ 900 بالاعا شاقتالعان. زامان تالابىنا ساي جابدىقتالىپ، بالالاردىڭ تولىققاندى ءبىلىم الۋىنا، سالاۋاتتى ءومىر سالتىن قالىپتاستىرۋىنا جاعداي جاسايتىن تيپتىك وقۋ ورنى 3 قاباتتى. مەكتەپتە 29 وقۋ كابينەتى، حيميا، فيزيكا، بيولوگيا لابوراتوريالارى، مۋلتيمەديالى – لينگوفوندى، كومپيۋتەر كلاسى، كىتاپحانا، ءماجىلىس جانە وقۋ زالى بار.

Abai.kz