وزبەكستاننىڭ سامارقان قالاسىندا پرەزيدەنت يسلام كاريموۆتى جەرلەۋ راسىمىنە قىزۋ دايىندىق ءجۇرىپ جاتىر. بۇل تۋرالى وزبەكستاندىق «فەرعانا», «وزودليق راديوسى» جانە «وزبەكستان حالىقتىق قوزعالىسى» سايتتارى حابارلادى.

«وزبەكستان ليدەرىنىڭ قازاسى تۋرالى ءالى كۇنگە رەسمي حابارلانعان جوق. ءبىزدىڭ بولجامىمىز بويىنشا پرەزيدەنتتىڭ قازاسى تۋرالى جۇما كۇنى رەسمي حابارلانادى. ال سەنبى كۇنى 78 جاستاعى يسلام كاريموۆتىڭ دەنەسى جەر قوينىنا تاپسىرىلادى»،-دەپ جازادى «فەرعانا» اگەنتتىگى. باسىلىمنىڭ مالىمەتتەرىنە سۇيەنسەك، مارقۇمنىڭ دەنەسى تيەلگەن ۇشاق كۇنى بۇرىن تاشكەنتتەن ۇشىپ شىققان ەكەن.

اگەنتتىكتىڭ حابارلاۋىنشا وزبەكستان پرەزيدەنتىنىڭ دەنەسى سامارقانداعى بەيىتكە، اناسى مەن باۋىرلارىنىڭ قاسىنا جەرلەنەدى.

ءوز كەزەگىندە «ازاتتىقتىڭ» وزبەكستانداعى قىزمەتى پرەمەر-مينيستر شاۆكات ميرزياەۆتىڭ سامارقانعا كەلگەندىگىن حابارلادى. قالا كوشەلەرىندە كولىك جۇرىستەرى توقتاتىلعان جانە كوشەلەردە مىڭداعان جۇمىسشىلار تازالىق جۇمىستارىن جۇرگىزۋدە.

وسىنىڭ الدىندا وزبەكستان رەسپۋبليكاسى مينيسترلەر كابينەتىندە 78 جاستاعى يسلام كاريموۆتىڭ دەنساۋلىعى قالىپتى ەكەنىن جانە ءبىراز ۋاقىت اۋرۋحانادا بولاتىنىن ايتقان ەدى.

ال 29-تامىز كۇنى «فەرعانا» اگەنتتىگى كاريموۆتىڭ قازاسى تۋرالى اقپارات تاراتتى. ءدال سول كۇنى رەسەيلىك «ينتەرفاكس» جانە «ريا نوۆوستي» اگەنتتىكتەرى كاريموۆتىڭ ءدىن امان ەكەنىن حابارلادى.

ال كەشە وزبەكستان جۇرتشىلىعى ەگەمەندىكتىڭ 25 جىلدىعىن تويلادى. وزبەكستان رەسپۋبليكاسى پرەزيدەنتىنىڭ سايتىندا يسلام كاريموۆتىڭ قۇتتىقتاۋ حاتى جاريالاندى.

نۇرزات توعجان

Abai.kz