جەر رەفورماسى جونىندەگى كوميسسيانىڭ العاشقى كوشپەلى وتىرىسى اقمولا وبلىسىنىڭ ورتالىعى كوكشەتاۋدا ءوتىپ جاتىر.

وتىرىس بارىسىندا ءسوز العان ايماق ازاماتتارى جەردىڭ شەتەلدىك ازاماتتارعا جالعا بەرىلۋىنە، ساتىلۋىنا قارسى ەكەندەرىن ايتتى. كەرىسىنشە، جەردى ەل ازاماتتارىنا بەرىپ، ۇكىمەت سۋبسيديا، قارجىلاندىرۋ ماسەلەسىن دۇرىس جولعا قويسا، جەردى ءوز ازاماتتارىمىز دا يگەرەدى دەدى.

ءسوز كەزەگى جەر رەفورماسى جونىندەگى كوميسسيا مۇشەلەرىنە بەرىلىپ، جانۇزاق اكىم اقمولا وبلىسىنىڭ اكىمى سەرگەي كۋلاگينگە الەۋمەتتىك جەلىلەردە ءسوز بولعان قىتاي ينۆەستورلارىمەن جەردى جالعا بەرۋ جونىندەگى ماسەلەنىڭ انىق-قانىعىن ايتساڭىز دەدى. سەرگەي كۋلاگين بولسا، ءوز تۋرالى الەۋمەتتىك جەلىدە نەشە ءتۇرلى ءسوز ايتىلىپ جاتاتىن، ال قىتاي ينۆەستورلارى كەزدەسۋدە جەر تۋرالى مۇلدەم اڭگىمە بولماعانىن، ينۆەستورلارمەن ارادا كوكشەتاۋ قالاسى جىلۋ جۇيەسىنە ينۆەستيتسيا سالۋ جونىندە اڭگىمە بولعانىن ايتا كەلىپ، «كۋلاگين قىتاي ينۆەستورلارىنا جەر بەرۋگە كەلىسىم جاسادى» دەگەن حابارلار كەزەكتى وتىرىك دەدى.

ودان كەيىن ءسوز العان ساياساتتانۋشى ايدوس سارىم دا كۋلاگينگە ونىڭ يەلىگىندە مىڭداعان گەكتار جەر بار ەكەنى، ءىرى جەر يەلەنۋشى ەكەنى تۋرالى قوعامدى ءجيى ايتىلىپ جۇرگەن اڭگىمەگە وسى ءساتتى پايدالانىپ، ءوزى جاۋاپ بەرۋىن سۇرادى.

سەرگەي كۋلاگين، اقمولا وبلىسىنىڭ اكىمى:

- ءيا، بۇل تۋرالى بىلەمىن. يەلىگىمدەگى جەردىڭ ءبارى يگەرىلىپ، قازاقستان ەكونوميكاسىنا جۇمىس ىستەپ جاتىر. مەملەكەتتىك قىزمەتتە بولماعان كەزدەرىمدە بيزنەسكە كەتتىم. جەرمەن اينالىستىم. جەر - مەنىڭ بيزنەسىم بولدى. كەيىن مينيستر بولۋعا شاقىرعان كەزدە بيزنەستى، يەلىگىمدەگى جەرلەردى ءوز جاقىندارىمنىڭ اتىنا بەرۋگە، سولاردىڭ اينالىسۋىنا رۇقسات سۇرادىم. وتباسىم جانە تۋىستارىمنىڭ پايدالانىپ وتىرعان اۋىل شارۋاشىلىق جەرلەرىنىڭ كولەمى 80 مىڭ گەكتار.

ايدوس سارىم بۇدان بولەك قازاقستان ازاماتتارىنا 10 سوتتىق تەگىن جەر بەرىلەدى دەگەن قاۋەسەتپەن الماتى قالاسى الاتاۋ اۋدانى اكىمدىگىنىڭ الدىنا جينالىپ جاتقان ازاماتتارمەن قالا اكىمشىلىگى، قوعامدىق كەڭەس مۇشەلەرى ءتۇسىندىرۋ جۇمىستارىن جۇرگىزىپ جاتقانىن ايتىپ، كوميسسيا توراعاسىنا وسى ون سوتتىق جەر ماسەلەسىنە قاتىستى ۇكىمەتتىك دەڭگەيدە ناقتى مەحانيزمدەرى، جولدارى بەكىتىلمەيىنشە، بۇل ماسەلەنى ۋاقىتشا توقتاتا تۇرۋعا پارمەن بەرۋدى ويلاستىرۋدى ايتتى. ويتكەنى، ون سوتتىق جەر الۋ ماسەلەسىن بىرەۋلەر ادەيى قوزدىرىپ وتىرۋ مۇمكىن ءارى بۇل كونفيلكت وشاعى بولىپ كەتۋ قاۋپى بار ەكەنىن ەسكەرتتى. سونداي-اق، ساياساتتانۋشى كوميسسيا قۇرامىنا بايلانىستى دا ءوز پىكىرىن ءبىلدىردى.

ايدوس سارىم، ساياساتتانۋشى:

- كوميسسيا قۇرامىنان شىعىپ كەتكەن ازاماتتار بار. سولارمەن قايتا سويلەسسەك، بولماسا جاڭاعى ازامات ايتقانداي، كوميسسياعا ورالمانداردان دا ازاماتتاردى تارتۋ جاعىن قاراستىرۋىمىز كەرەك. جانە جەر ماسەلەسىندەگى اشىقتىققا بايلانىستى جەردىڭ جانە ونىڭ ناقتى ستاتۋسى، جاعدايى تۋرالى كارتا جاساپ، كاداسترلىق نومىرلەرىمەن كىمنىڭ يەلىگىندە قانشا جەر بار ەكەنىن تۇگەل كورسەتىپ، ءتىزىم جاساۋ جۇمىستارىن ىسكە اسىرۋدى تاعى دا ايتقىم كەلەدى.

مۇحتار تايجان، ەكونوميست:

- ميتينگىگە شىققان ازاماتتاردى قۋادالاۋدى توقتاتۋدى تاعى دا سۇرايمىن. جانە ول ازاماتتار جونىندە نەگىزسىز پىكىر ايتپاساڭىزدار. سەبەبى، ولار جاۋ ەمەس، ءبىزدىڭ ەلدىڭ ازاماتتارى، پاتريوتتارى. كەزىندە ميتينگىگە شىعۋعا رۇقسات سۇراپ، ءوتىنىش جازعان ادامنىڭ ءبىرى مەنمىن. مىنە، كورىپ وتىرسىزدار، كوميسسيا قۇرىلىپ، بىرلەسىپ جۇمىس ىستەپ جاتىرمىز. ازاماتتاردى قۋدالاعانشا، وسىنداي ديالوگتار ارقىلى ماسەلەلەردى شەشەلىك.

نۇرا ماتاي

Abai.kz