ستامبۋل قالاسىندا تۇركىتىلدى الەمدى دامىتۋعا قوسقان زور ۇلەسى ءۇشىن بەرىلەتىن «قىزىل الما» سىيلىعىن تاپسىرۋ ءراسىمى ءوتتى.

بۇل سىيلىقتى 2013 جىلى جىل سايىن تۇركى تىلدەس حالىقتار تۇراتىن بارلىق ەلدەر مەن ايماقتاردىڭ ساياساتكەرلەرى مەن قوعام قايراتكەرلەرىنىڭ باسىن قوساتىن تۇركى الەمى فورۋمى تاعايىنداعان. سىيلىق قوعامدىق ىسكە، عىلىم، سپورت، مادەنيەتكە قوسقان ۇلەسى ءۇشىن دەگەن نوميناتسيالارمەن تاپسىرىلادى.

ماسەلەن، وسى جىلعى «قىزىل الما» سىيلىعىنا قىرعىزستان پرەزيدەنتى الماسبەك اتامباەۆ پەن نوبەل سىيلىعىنىڭ يەگەرى ءازيز سانجار يە بولدى.

سونىمەن قاتار، بۇل ماراپاتقا بيىل تۇركى حالىقتارىنىڭ ءداستۇرلى مادەنيەتىن دامىتۋعا قوسقان ۇلكەن ۇلەسى ءۇشىن، جىل سايىن استانادا وتكىزىلەتىن «استانا-ارقاۋ» ءداستۇرلى تۇركى مۋزىكاسىنىڭ فەستيۆالىن ۇيىمداستىرۋشى «EL production company» لايىق دەپ تانىلدى. سىيلىق اتالمىش كومپانيانىڭ باس ديرەكتورى ايگۇل بەيسەنباەۆاعا تاپسىرىلدى. "EL production company"-دەن باسقا، بۇل سىيلىقپەن تۇركى سپورتىن دامىتۋعا قوسقان ۇلكەن ۇلەسى ءۇشىن، ءداستۇرلى قازاقشا كۇرەستەن xالىقارالىق "ەۋرازيا بارىسى" ءتۋرنيرىن ۇيىمداستىرۋشى،  بەلگىلى جۋرناليست جانە پروديۋسەر ارمان شۋراەۆ تا ماراپاتتالدى.

استانا قالاسى اكىمدىگىنىڭ قولداۋىمەن قازىرگە دەيىن 9 مارتە وتكىزىلىپ، وسى ۋاقىت ىشىندە بۇكىل تۇركى مۋزىكاسى وكىلدەرىنىڭ باسىن قوسىپ ۇلگەرگەن «استانا-ارقاۋ» - بۇگىندە  تۇركى الەمىنىڭ ءداستۇرلى مۋزىكاسىنا ارنالعان ەڭ ءىرى فەستيۆالگە اينالدى. سوڭعى ونشاقتى جىل كولەمىندە فەستيۆالگە بارشا تۇركى حالىقتارىنىڭ مۋزىكالىق ءداستۇرىن ناسيحاتتاۋشى 700-گە تارتا مۋزىكاتتار مەن عالىمدار قاتىستى.

«استانا-ارقاۋ» تۇركى مۋزىكاسىنىڭ فەستيۆالى قازىرگى كەزدە تۇركى حالىقتارىنىڭ مادەني ينتەگراتسياسى ۇردىسىندە وتكىزىلىپ ەلەۋلى ورىن العان بەدەلدى مۋزىكالىق شاراعا اينالدى.

فەستيۆالدىڭ 10 جىلدىعىنا وراي، 2017 جىلى تۇركى الەمى مۋزىكاسىنىڭ انتولوگياسى شىعارىلماقشى.

Abai.kz