«Aستانا بالەت» تەاترى "ساعىم ساتتەرى" مەن "عاشىقتىڭ ءتىلى ءتىلسىز ءتىل، كوزبەن كور دە ىشپەن ءبىل" اتتى جاڭا سپەكتاكلدەردىڭ پرەمەرا الدىنداعى كورسەتىلىمىنە شاقىرادى

«استانا بالەت» تەاترى» شىلدەنىڭ 2 كۇنى ءبىر اكتىلى ەكى بالەت پرەمەراسىن ۇسىنادى. «ساعىم ساتتەرى» جانە «عاشىقتىڭ ءتىلى ءتىلسىز ءتىل، كوزبەن كور دە، ىشپەن ءبىل» اتتى بالەتتەردىڭ العاشقى كورسەتىلىمى «استانا وپەرا» ساحناسىندا وتەدى.

 «استانا بالەت» تەاترىنىڭ» جاڭا جۇمىسى زاماناۋي پلاستيكا مانەرىندە جاسالعان، بۇل زامان تالابىنا ساي بالەت ۇلگىسى دەۋگە لايىق.

زاماناۋي قىتاي حورەوگرافى يسيان دجاننىڭ «ساعىم ساتتەرى» قويىلىمى ايەل زاتىنا ارنالىپ، ولار جايلى باياندايدى. بۇل بالەتتە پلاستيكا كۇشىمەن ارتيستەر تولىسقان، رۋحى بيىك، مىقتى ءارى سۇلۋ ايەل بەينەسىن كورسەتەدى. بۇل جۇمىسىن يسيان دجان ءوزى ءۇشىن اسا قىمبات اناسى مەن اپكەسىنە ارناعان. ولار ونىڭ ادام رەتىندە، ءبيشى رەتىندە قالىپتاسۋىنا زور اسەر ەتكەن بولاتىن.

«ساعىم ساتتەرى» ءبىر اكتىلى بالەتى زاماناۋي كومپوزيتورلار ماكس ريحتەر، دوۋۆەي جانە دايسۋكە كاسيۆالاردىڭ مۋزىكاسىنا قويىلعان. قويىلىم ەكى بولىمنەن تۇرادى: «كۇز» جانە «قىس». قىتاي فيلوسوفياسىندا ەكى «ين» جانە «يان» دەگەن ەكى قاراما-قايشى سۋبستانتسيا بار. ايەل كۇز بەن قىس ايلارىمەن بايلانىستىرىلاتىن «ين» سۋبستانتسياسىمەن ساباقتاستىرىلادى.

يسيان دجاننىڭ بي ءتىلىنىڭ نەگىزى – كۇردەلى قيمىلداردى ورىنداۋعا مۇمكىندىك بەرەتىن تابيعي پلاستيكا. حورەوگرافيادا «ۋشۋ» جانە «تايچي» سەكىلدى ايگىلى قىتاي گيمناستيكالارىنىڭ قوزعالىستارى مەن ەلەمەنتتەرى قولدانىلعان. يسيان دجاننىڭ بالەت ءتىلى «استانا بالەت» ارتيستەرى ءۇشىن تىڭ. ول ەۋروپالىق، قازاق پلاستيكاسىنان مۇلدەم بولەك، سول سەبەپتى، وسى حورەوگرافيا ءتىلىن مەڭگەرىپ، ارتيستەردىڭ كوركەمدىك قۇرالدارى مەن تەاتر رەپەرتۋارىن بايىتا تۇسكەن ابزال.

«عاشىقتىڭ ءتىلى ءتىلسىز ءتىل، كوزبەن كور دە، ىشپەن ءبىل» - اباي قۇنانباەۆ پوەزياسىنا ارنالعان العاشقى بالەت. قازاقستاندىق بالەتمەيستەر مۋكارام ءاۆاحريدىڭ بۇل جۇمىسىندا پوەزيا مەن مۋزىكا حورەوگرافيالىق بەينەلەرگە اينالادى. پوەزيا ءتىلى اباي اندەرىمەن جانە حورەوگرافيانىڭ اسقاق تىلىمەن ساباقتاسادى. بۇل قويىلىم تەرەڭ ۋايىم مەن نازىكتىك، مۇڭ مەن پاراساتقا تولى اباي شىعارماشىلىعىنا دەگەن ماحابباتتىڭ بەلگىسى. پوەزيا مەن پلاستيكا ءتىلى ۇندەس. سەبەبى، ەكەۋى دە ادام بالاسىن ەرەكشە كۇيگە بولەۋ قۇدىرەتىنە يە. مۋكارام ءاۆاحريدىڭ جاڭا جۇمىسى كوركەمدىك تاسىلدەردىڭ قاراپايىمدىلىعى جانە اسەمدىگىمەن ەرەكشەلەنەدى، ال، قوزعالىس ەركىندىگى بيگە كوركەمدىك ەرەكشەلىك دارىتادى. بالەتتە اباي قۇنانباەۆ اندەرى مەن كارل دجەنكينس (ۇلىبريتانيا) مۋزىكاسى قولدانىلعان.

اككرەديتتەۋ جانە قوسىمشا اقپارات الۋ ءۇشىن:

جارنامالىق - اقپارات جۇمىسى جونىندەگى مەنەدجەر اقمارال الىبەكوۆاعا مىنا تەل.: 8 (7172) 709 644, 87027606287, ۆاتساپ 87027626258 بويىنشا حابارلاسۋعا بولادى.

e-mail: akma3101@mail.ru

اباي-اقپارات