بۇگىن تالدىقورعان قالاسىندا تاۋەلسىزدىكتىڭ 25 جىلدىعىنا وراي قاراتال وزەنىنىڭ جاعالاۋىنداعى دەمالىس اللەياسى اشىلدى. بۇل زاماۋني جاڭا ساۋلەتتىك كەشەن بۇدان بىلاي جەتىسۋدىڭ كورنەكتى دەمالىس ورىندارىنىڭ قاتارىنا قوسىلاتىن بولادى.

تۇرعىنداردى قۋانىشىمەن قۇتتىقتاعان وبلىس اكىمى اماندىق باتالوۆ الەمدە وزەندى جاعالاي قونعان قالالاردىڭ بارشىلىق ەكەنىن، سونىڭ ىشىندە ەلىمىزدىڭ باس قالاسى استانا بۇل تۇرعىدا ەسىلىمەن اجارلى ەكەنىن ايتىپ ءوتتى. استانا قاراپ بوي تۇزەيتىن تالدىقورعانعا دا قاراتال وزەنى ەرەكشە كورىك بەرەتىنىن ايتا كەلە:

- جاعالاۋداعى سان الۋان ارحيتەكتۋرالىق شەشىمدەر ەڭبەكتەگەن بالادان ەڭكەيگەن قارياعا دەيىنگى بارلىق تۇرعىنداردىڭ كوڭىلىنەن شىعاتىنىنا سەنىمدىمىن. ۇلكەندەر جازدىڭ اپتاپ ىستىعىندا وزەن جاعاسىندا سەرۋەن قۇرىپ، سالاماتتى ءومىر سالتىنا دەن قويسا، بالالار ويىن الاڭدارىندا الاڭسىز اسىر سالاتىن بولادى. بارشاڭىزدى بۇگىنگى قۋانىشتى كۇن – قاراتال جاعالاۋىنداعى جاڭا دەمالىس اللەياسىنىڭ اشىلۋىمەن شىن جۇرەكتەن قۇتتىقتايمىن! – دەدى. مۇنان سوڭ دەمالىس اللەياسىنىڭ شامىن جاقتى. سامالاداي جارقىراعان شامدارمەن قاتار وتشاشۋلار اتىلدى.

ۇزىندىعى 1414 مەترگە سوزىلعان جاعالاۋ قۇرىلىسىن «شىمىر» جشس مەردىگەر ۇيىمى  وتكەن جىلدىڭ تامىز ايىندا باستاعان بولاتىن. جوبانىڭ اۆتورى قازاقستان رەسپۋبليكاسى ساۋلەتشىلەر وداعىنىڭ توراعاسى اقمىرزا تۇستەمبەكوۆ. اۆتوردىڭ يدەياسى بويىنشا جاعالاۋ الاڭى 4 بولىككە بولىنگەن، ياعني ورىندىقتار، بالالار ويىن الاڭى ورناتىلعان دەمالىس ايماعى، بەلسەندى دەمالىستى جاقسى كورەتىندەر ءۇشىن سكەيت پەن روللدروم جانە قالقاندار، تەنتتەر مەن شاتىرلار ورناتىلعان ساحنالىق ايماق. تالدىقورعاندا نەگىزىن حالىقارالىق دارەجەدەگى سپورت شەبەرى اندرەي كيۆيلەۆ سالىپ كەتكەن ۆەلوسپورتتىڭ جاقسى دامۋى سەبەپتى جاعالاۋدا ۆەلوسيپەد جولىنا ايرىقشا كوڭىل بولىنگەن.  

كوگالداندىرۋ مەن اباتتاندىرۋدىڭ اسەمدىگى ءوز الدىنا. مۇندا قىلقان جاپىراقتى جانە جاپىراقتى اعاشتار، بۇتالار، بۇتالى قورشاۋلار، گازوندار مەن گۇلزارلار وتىرعىزىلعان. وسى كوك وسكىننىڭ بارلىعى دا شاعىن ساۋلەتتىك مۇسىندەرمەن ەرەكشە ۇيلەسىم تاپقان.

دەمالىس اللەياسىنىڭ اشىلۋ سالتاناتىندا «تالدىقورعان: كەشە، بۇگىن» اتتى فوتوكورمە، كوركەمسۋرەت شەبەرلەرىنىڭ تۋىندىلارىنان كورمە ۇيىمداستىرىلىپ، حالىق اسپاپتارى وركەسترىنىڭ كونتسەرتى ۇسىنىلدى. قالالىقتار ءۇشىن بۇل كۇنى تانىمال انشىلەر ءمادينا سادۋاقاسوۆا، «رينگو» توبى، سونىمەن قاتار «الاتاۋ اۋەندەرى»، «ۇشقوڭىر» ءانسامبلىنىڭ ونەرپازدارى ونەر كورسەتتى.

Abai.kz