رەداكتسيامىزعا جۋرناليست  بيبىگۇل داۋلەتبەكقىزى حابارلاسىپ، شىمكەنت قالاسىندا 20 اقپان كۇنى مەكتەپتەن شىققان بەتتە جوعالىپ كەتىپ كۇنى كەشە تابىلعان بالا تۋرالى تومەندەگىدەي جازبا ۇسىندى. ارىپتەسىمىزدىڭ سوزىنە قاراعاندا، بالانى تاۋىپ الۋعا جاردەمدەسكەن جان (ازىرگە اتى-ءجون اتاماۋدى ءوتىندى) الدەكىمدەردەن قورقىپ وتىرعان كورىنەدى. نەگە؟ بۇل سۇراقتىڭ جاۋابىن الداعى كۇندەرى انىقتاي جاتارمىز، الدىمەن بيبيگۇلدىڭ جازعانىن وقيىق:

20 اقپان كۇنى مەكتەپتەن شىققان 6 جاسار مۇحاممەد قامشىبەكتى (سۋرەتتە) بەلگىسىز ءبىر ايەل ۇرلاپ كەتكەن بولاتىن. نەشە كۇننەن بەرى ەل سابىلىپ، ىزدەدى.  ول بالاقاي كەشە مەنىڭ ينستاگرام جەلىسىندەگى ءبىر وقىرمانىم ارقىلى  تابىلدى. شىمكەنتتەگى بالاقايدىڭ تابىلعانىنا قازاقستان حالقى قۋانۋدا. ال، وسى بالانى تاۋىپ بەرۋگە سەبەپشى بولعان قىزدىڭ جاعدايى قانداي كۇيدە ەكەنىن مەن عانا بىلەم. قازىر ول ۇيىنەن تىسقا شىعا الماي قورقىپ وتىر.

تاڭعى 4-كە دەيىن ونىڭ تاعدىرىنا الاڭداپ  كوز ىلمەدىم. ءاردايىم تەلەفونمەن سويلەسىپ، حالىن سۇراۋدامىن. ەل شۋلاپ جاتقان وقيعا بىلاي بولعان:

ءبىر بالاسى بار كەلىنشەك، پاتەرىنە وLح ارقىلى ادامدار تۇرعىزاتىنىن جازادى. سودان بىردەن تەلەفونىنا ەر كىسى زۆونداپ، اناسى مەن بالاسىن ۋاقىتشا تۇرعىزا تۇرۋىن سۇرايدى. اياعىن سىلتىپ كەلگەن اپاي: "كەلىنىممەن ۇرىسىپ قالدىم. مىناۋ نەمەرەم", -دەپ تانىستىرادى. جۇمىسسىز وتىرعان كەلىنشەك ولارعا ونشا ءمان بەرمەيدى.

- پاتەرشىلەر:"3-اق كۇنگە قونىپ كەتەمىز", - دەگەندە، ءبىرتۇرلى بولىپ قالدىم. كورپە-جاستىعىم جوق ەكەنىن ايتىپ ەدىم. ولار ەشتەڭە ەتپەيدى دەدى. "ەندەشە قۇجاتتارىڭىزدى بەرىڭىزدەر " دەگەنىم سول ەدى، ولار بىردەن كەتەتىنىن ايتتى. سودان ەسىكتەن شىعىپ بارا جاتقان ەركەك: ء"بىزدى سەن كورگەن جوقسىڭ!" - دەپ ەسكەرتتى. وزدەرىنىڭ وتباسىلىق كيكىلجىڭى بولار دەپ، باستاپقىدا ونشا ءمان بەرمەدىم.

وسى جايتتاردى تەلەفون ارقىلى بايانداعان كۋاگەر مەنىڭ ينستاگرامداعى جازبالارىمدى عانا وقيدى ەكەن. تەلەۆيزور كورۋگە ۋاقىتى جوق. كۇندىز بالاسىمەن جۇرەدى. قولى قالت ەتسە، ساباعىنا دايىندالادى. مۇحاممەدتىڭ جوعالعانى تۋرالى پوستىمدى وقىعان بويدا ول ماعان بىردەن حابارلاسىپ:

-بيبىگۇل اپاي، مەن بۇل بالانى كوردىم. ونى ۇرلاعان حيدجابتاعى ايەل ەمەس، باسقا. 50-55 جاستاعى ايەل. ايەلدىڭ  جانىندا 35-40 جاس شاماسىنداعى ەر كىسى بولدى، -دەدى.

مەن شۇعىل تۇردە پوليتسيا بولىمىنە حابارلاسۋىن ءوتىندىم. باستاپقىدا قىز قورىقسا دا، ءىىب-نە حابارلاستى (مەندە اۋديوجازبا دا بار). كەشە تۇندە، ساعات 1.30-دا،  شىمكەنت قالاسىنداعى ىشكى ىستەر باسقارماسىنىڭ قىزمەتكەرلەرى ەر كىسىنىڭ فوتوروبوتىن جاساۋعا كومەكتەسۋ ءۇشىن الگى قىزدى ۇيىنەن الىپ كەتتى.   مەن ءىىب قىزمەتكەرلەرىمەن سويلەسىپ، بالا ۇرلىعىنا قاتىسى بار ادامداردىڭ فوتوبەينەلەرىن جاساۋعا جاردەم ەتىپ جاتقان كۋاگەردىڭ ومىرىنە قاۋىپ تونبەيتىندەي جاعداي جاساۋىن سۇرادىم.

الايدا، ءيا، الايدا... بايعۇس قىز بۇگىن ۇيىنەن شىعا الماي وتىر. دۇكەنگە بارىپ نان ساتىپ الۋعا قورقۋدا. سەبەبى، بالانى ۇرلاعان ەركەك بوستاندىقتا ءجۇر. دوستارىممەن سويلەسىپ، 102 بولىمىنە حابارلاسۋىن ايتتىم. ول شىمكەنتتەگى ءتيىستى ورىنعا حابارلاستى. بىراق، اتالعان بولىمدەگىلەر ءىىب  كەلۋىن تالاپ ەتكەن. ال، كۋاگەر جوعارىدا ايتقانىمداي، كوشەگە شىعۋعا قورقىپ وتىر.   

مەنىڭ تۇسىنبەيتىنىم، نەگە شىمكەنت قالاسىنداعى ءىىب قىزمەتكەرلەرى كۋاگەردىڭ قاۋىپسىزدىگىن قامتاماسىز ەتپەيدى؟   ماراپاتتاماي-اق قويسىن. ونسىزدا كەشە عالامتورعا وزدەرى تاپقانداي سۇيىنشىلەتىپ، سۇحبات بەردى. بىراق، بۇل قىز دا ادام بالاسى ەمەس پە؟! سوندا جوعالعان بالانى تاۋىپ بەرۋگە اتسالىسقان كۋاگەردى پايدالاندى دا، ءارى قارايعى ومىرىنە جاۋاپ بەرمەيمىز دەگەندەرى مە بۇل؟ قۇقىق قورعاۋ قىزمەتكەرلەرى وسىلاي ىستەسە، ەرتەڭ ەل ىشىندە وزىنەن باسقانىڭ تاعدىرىنا سەلت ەتىپ، سەرگەك قارايتىن جان قالا ما؟

بيبىگۇل داۋلەتبەكقىزى

Abai.kz