Cۋرەتتە: حالىقارالىق كورمە بيۋروسىنىڭ باس حاتشىسى ۆيسەنتە لوسسەرتالەس

رەداكتسيادان: وتكەندە «Abai.kz» پورتالىندا ءبىز حالىقارالىق ەكسپو كورمەسىنىڭ استاناداعى ەكس-كەڭەسشىسى حۋان كوررەاستىڭ ەلباسى اتىنا جولداعان حاتىن جاريالاعان بولاتىنبىز. ءۇشبۋ حاتىندا كوررەاس مىرزا  كورمەنى ۇيىمداستىرۋ جۇمىسىنداعى جەتەكشى توپتىڭ اۋىسۋىنا بايلانىستى الەمدىك ەكسپو 2017 جىلى استانا تورىندە وتپەي قالۋى مۇمكىن دەپ جازعان ەدى. كەشە استانا قالاسىنداعى ەكسپو-نىڭ  كەزەكتى كەڭەسىنە ارنايى كەلىپ قاتىسقان حالىقارالىق كورمە بيۋروسىنىڭ باس حاتشىسى ۆيسەنتە لوسسەرتالەس حۋان كوررەاستىڭ مالىمدەمەسىن جوققا شىعاردى.

«مەن قازاقستاندىق باق-تا جاريالانعان بۇل حاتپەن مۇلدە كەلىسپەيمىن. ونداعى ەكسپو-2017 تۋرالى بارلىق پىكىرلەر تەك اۆتوردىڭ جەكە كوزقاراسى بويىنشا تۇزىلگەن.  ايتا كەتەيىن، ءبىز بۇگىن كورىپ وتىرعانىمىزداي، ەكسپو-2017 كورمەسىنە دايىندىق جۇمىستارى قارقىندى جۇرگىزىلىپ وتىر.  بۇعان كۇمان كەلتىرۋدىڭ ەش ءجونى جوق. كەرىسىنشە ءبىز حالىقارالىق كورمەنى وتكىزۋگە دايىندىق جۇمىستارىن ودان ارى قارقىندى جۇرگىزۋىمىز كەرەك»، - دەدى ۆيسەنتە لوسسەرتالەس مىرزا.

استانا قالاسىنداعى ەكسپو جيىنىنا ارنايى كەلىپ قاتىسقان حالىقارالىق كورمە بيۋروسىنىڭ باس حاتشىسى «استانا ەكسپو-2017» كورمەسىنە دايىندىق جۇمىستارىنا كوڭىلى تولاتىنىن جەتكىزىپ، حۋان كوررەاستىڭ كۇمان تۋدىرعان پىكىرىمەن كەلىسپەيتىنىن ايتتى.

«مەن بۇگىن كورمەگە دايىندىق بارىسىن ءوز كوزىممەن كورىپ، قۇرىلىس نىساندارىن ءوزىم بارىپ، ارالاپ شىقتىم. ەكسپو-عا دايىندىق جۇمىستارى كوڭىلىمنەن تولىق شىقتى. قاتتى اسەر الدىم. ەكسپو-عا دايىندىق جۇمىسىندا ىلگەرىلەۋ بار ەكەن. بۇگىنگى كورگەندەرىمنەن تۇيگەنىم: 2017 جىلى استانادا بولاتىن ەكسپو كورمەسى وتە كەرەمەت جانە بيىك دەڭگەيدە وتەتىندىگىنە سەنىمدىمىن. اسىرەسە،  قۇرىلىس الاڭدارىنىڭ ارحيتەكتۋراسى ەرەكشە. مەن بۇگىن  قازاقستان استاناسىنا كەلىپ، ماڭىزدى جيىنعا قاتىسقانىما قۋانىشتىمىن»،-دەدى حالىقارالىق كورمە بيۋروسىنىڭ باس حاتشىسى.

نۇرگەلدى ابدىعانيۇلى

Abai.kz