قازاقستان ءبىلىم جانە عىلىم مينيسترلىگى ورتا مەكتەپ وقۋشىلارىنا ارنالعان مىندەتتى كيىم فورماسىنا قويىلاتىن تالاپتاردى بەكىتتى، - دەپ جازادى ازاتتىق راديوسىنىڭ سايتى.

ۇكىمەتتىڭ رەسمي سايتىندا جاريالانعان قۇجاتتا تالاپتىڭ ء"بىلىم بەرۋدى زايىرلى سيپاتتا قىلۋعا جانە ورتا ءبىلىم بەرۋ ورىندارىندا وقيتىندار اراسىندا الەۋمەتتىك، مۇلىكتىك جانە باسقا دا ايىرىم بەلگىلەرىن جويۋدى كوزدەيتىنى" ايتىلعان. قۇجاتتا جاڭا تالاپقا ساي مەكتەپ فورماسىندا قانداي دا ءبىر كونفەسسياعا قاتىستى كيىم بەلگىسى بولماۋى ءتيىس ەكەنى ايتىلعان. 

تالاپ بويىنشا، مەكتەپ فورماسىنىڭ ۇلگىسى كلاسسيكالىق ستيلدە، ءۇش ءتۇرلى تۇستەن اسپايتىنداي بولۋى كەرەك. مەكتەپ فورماسى وقۋشىلاردىڭ جاس ەرەكشەلىگىنە بايلانىستى ەنگىزىلەدى جانە ول كۇندەلىكتى، سالتاناتتى شارالاردا جانە دەنە شىنىقتىرۋ ءپانى كەزىندە كيەتىن دەپ ۇشكە بولىنەدى.

مەكتەپ فورماسىنا قويىلاتىن تالاپ جەرگىلىكتى كليمات جاعدايىن، وقۋ ورنىنداعى جاعداي مەن تەمپەراتۋرانى ەسكەرە وتىرىپ ورىندالۋى ءتيىس.

بۇعان قوسا مەكتەپتە وقۋشىعا دەنەسىنە جاراقات سالاتىن كيىم كيۋگە جانە زاتتار تاعىنىپ جۇرۋىنە تىيىم سالىنادى.

اباي-اقپارات