سارسەنبى, 28 قازان 2020
COVID-19 قازاقستاندا. جۇقتىرعاندار — 110832. جازىلعاندار — 105883. قايتىس بولعاندار — 1825
بىلگەنگە مارجان 5184 0 پىكىر 1 ءساۋىر, 2016 ساعات 12:03

قازاقستاندا اشىق-شاشىق كيىمدە ساحناعا شىعۋعا تىيىم سالىندى

مادەنيەت جانە سپورت مينيسترلىگىنە كورەرمەندەر تاراپىنان ونەر ادامدارىنىڭ  حالىق الدىنا جارتىلاي جالاڭاش شىعۋىن توقتاتۋدى سۇراعان  4000 دانا حات جينالىپ قالىپتى. ارينە بۇل وسىعان دەيىن جازىلعان بارلىق حاتتىڭ سانى. مينيستر ءوز كەڭەسشىلەرىمەن اقىلداسا وتىرىپ «تىيىم» جايلى زاڭ جوباسىن ازىرلەپ، پارلامەنتكە ۇسىنعان. بۇل تۋرالى STAN.KZ حابارلايدى.

«مينيسترلىك پوشتاسىنا  سوڭعى ءۇش جىلدا جازىلعان تۋرا وسى ماعىناداعى حاتتاردى جينادىق. سانى 4000 دانا شاماسىندا. بۇل دەگەنىڭىز وسىنشاما حالىق. نەگە ولاردىڭ ۇسىنىسىن ەسكەرمەسكە. كوپشىلىگى ادەمى مىسالدار كەلتىرىپ، جالاڭاش انشىلەر مەن اكتەرلەردىڭ ۇلت بولاشاعىن تاربيەلەۋدە قانداي قيىندىقتار اكەلەتىنىن اشىنا جازعان»،-دەيدى مادەنيەت جانە سپورت مينيسترلىگىنىڭ ءباسپاسوز بايانداماسىندا.

سونىمەن قوسا زاڭدا جۇلدىزداردىڭ بارلىعىنا ورتاق ەرەجە جازىلعان. ياعني وندا ايەلدەردىڭ ەڭ قىسقا كيىمى تىزەدەن كەلۋى كەرەك. ال جەيدەنىڭ ويىعىنان قىزداردىڭ ومىراۋى كورىنبەۋى ءتيىس. سونداي-اق ونىڭ جەڭى شىنتاقتان 5سم جوعارىدان قىسقارماۋ كەرەك ەكەن. ارينە مۇنداي قاتاڭ تىيىمنان كەيىن كىندىگىن كورسەتۋگە دە بولمايتىنى انىق.

زاڭ جوباسىن وقىپ شىققان دەپۋتاتتاردىڭ ويى ەكىگە جارىلعان. ءبىر تاراپ قولداسا، ەكىنشىسى ءبىز زايىرلى، دەموكراتيالىق ەلمىز دەگەندى العا تارتادى.

«مەن ارينە زاڭ جوباسىن  قوس قولداپ قولدايمىن. مۇنىڭ نەسى جامان. ونەر ادامى بولسا جۇرتقا ءمۇسىنىن كورسەتپەستەن، ونەرىن پاش ەتسىن. ماڭىزدىسى دا وسى. مەكتەپ وقۋشىلارىن ازعىرىپ، ارزان دۇنيەگە قىزىقتىرۋ قىلمىسپەن تەڭ. سول ءتانىن كورسەتكەن ءانشى،اكتەرلەردى كورىپ وسكەن ۇرپاق بولاشاعى نە بولادى؟ ارىپتەستەر بۇل ماسەلەگە نەمقۇرايلى قاراماۋلارىڭىزدى سۇرايمىن»،-دەدى پارلامەنت ءماجىلىسىنىڭ دەپۋتاتى بەكبولات تىلەۋحان.

ال قازاقستان حالىقتىق كوممۋنيستەرى پارتياسىنىڭ اتىنان دەپۋتات اتانعان يرينا سميرنوۆا بەكبولات تىلەۋحاننىڭ ويىنا قارسى شىقتى.

«مىسالى مەن دە دەپۋتات اتانعالى حالىقتىڭ ادامى بولىپ ەسەپتەلەمىن. سوندا جازدا پىسىناپ جەڭى بار جەيدە كيۋگە مىندەتتىمىن بە؟ اشىق كيىنگەندە تۇرعان ەشتەڭە جوق. ءبىز مۇسىلمان مەملەكەتى ەمەسپىز. ونەر ادامى كورسەتسىن سىمباتىن. بۇل ونەر،سوندىقتان تۇسىنىستىكپەن قاراعانىمىز ءجون. ەلدىڭ، حالىقتىڭ ادامى ەكەن دەپ بارلىعىن تۇمشالاپ تاستاۋعا بولمايدى. جاقىندا «ايەلدەر باستارىنان ورامالدارىن تاستاماسىن» دەگەن زاڭ قابىلداۋ كەرەك بولاتىن شىعار. مۇلدە كەلىسپەيمىن»،-دەپ قىسقا قايىردى ءماجىلىس دەپۋتاتى يرينا سميرنوۆا.

دەگەنمەن بەكبولات تىلەۋحاندى قولداعان ارىپتەستەرىنىڭ سانى ارتىپ، زاڭ جوباسى ماقۇلدانىپ كەتتى.

ال ونەر ادامدارى مۇنداي جاڭالىقتى العاش ەستىگەندە سەنەر سەنبەستەرىن بىلمەي قالعان. STAN.KZء تىلشىسى انشىلەردىڭ بىرنەشەۋىنە حابارلاسىپ جاڭا زاڭعا قاتىستى ويلارىن بىلگەن ەدى.

«بۇنداي بولۋى مۇمكىن ەمەس. ءبىز وندا رەسەيلىك تاعى باسقا ەلدىڭ ارنالارى ارقىلى شىعاتىن شىعارمىز. مىسالى، زاڭعا باعىنساق مەنىڭ بەينە باياندارىمنىڭ بارلىعى وندا ەفيردەن شەتتەتىلەدى. ول دەگەنىڭىز قىرۋار قارجىعا تۇسىرىلگەن. سوندا ونى بۇدان بىلاي ۇيىمدە ءوزىم عانا كورەمىن بە؟جاقىندا ءبارىمىزدى ءدىن جولىنا تۇسۋگە مىندەتتەيتىن شىعار»،-دەپ اشۋلاندى ماقپال يسابەكوۆا.

ءانشى ۇنەمى جەلى ارقىلى جارتىلاي جالاڭاش سۋرەتتەرىن سالىپ، ەلدىڭ سىنىنا قالىپ جۇرەتىنى جاسىرىن ەمەس. ونى قولدايتىندار دا تابىلدى. لۋينا، ديلناز احماديەۆا سىندى انشىلەر بۇل زاڭ جوباسىنا مۇلدە قارسى بولىپ شىقتى. ءتىپتى قارسىلىقتارىن ءبىلدىرۋ ماقساتىندا مينيسترگە حات جازۋعا دايىن ەكەندىكتەرىن ەسكەرتتى.

ەسەسىنە جاقىندا عان وزىنە جابىق كيىنۋگە كەڭەس بەرگەندەرگە ەشقاشان ورامال تاقپايتىنىن ايتقان بايان ەسەنتاەۆا، قىزدارىن جاڭا زاڭ اياسىندا كيىندىرۋگە ءازىر ەكەن.

«بارشاعا ورتاق تالاپ،ورتاق ءتارتىپ بولسا نەگە باعىنباسقا. مەنىڭ قىزدارىم تەك قانا اشىق كيىنبەيدى. ولاي ايتۋعا ەشكىمنىڭ دە ءداتى بارمايتىن شىعار. سەبەبى، ولاردىڭ قورجىنىنداعى اۋەندەرگە ساي نەشە ءتۇرلى ۇزىن، جابىق ادەمى كويلەكتەرى بارىن جۇرت كليپتەرىنەن كورىپ ءجۇر. سوندىقتان ساحنادا ادەمى كورىنۋدىڭ جابىق ۇلگىسى سانگە اينالادى دەگەن ءسوز. سەنىمدى سانگەر ايدا كاۋمەنوۆا باردا ەش الاڭدامايمىن»،-دەدى پروديۋسەر بايان ەسەنتاەۆا.

پرديۋسەر وزىنە قاتىستى جاۋاپ بەرۋدەن باس تارتتى.

ال ءانشى التىناي جوراباەۆا جاڭا زاڭدى ەستىگەندە قۋانىپ كەتكەنىن جاسىرا المادى.

«مەن ماقتانعانىم ەمەس، ارينە بارلىق دۇنيە ءوزىم ءۇشىن سوڭعى 5 جىلدا ناماز وقىپ ءجۇرمىن. بىرنەشە رەت ساحناعا ۇزىن كيىپ، شاشىمدى دا جاۋىپ شىققان ەدىم. كوپشىلىك مۇنىمدى ايتارلىقتاي قۇپتاعان جوق. «ساحناعا جاقىندا حيدجاپ كيىپ شىعاتىن شىعارسىز» دەپ جىنىما تيەتىن سۇراق قوياتىندار كوبەيىپ كەتتى. سوسىن، ءسوزدى كوبەيتپەي  جابىق ءارى قاراپايىمداۋ كيىنۋگە تىرىسىپ ءجۇردىم. راسىمەن دە ونەر ادامدارى وزگەگە ۇلگى بولا ءبىلۋى كەرەك. حالىق مەنى جارتىلاي جالاڭاش شىقپادى دەپ تىڭداماي قويعان جوق. مەن ولاي شىقپاعانمىن بۇدان بىلاي دا شىقپايمىن. سوندىقتان مەن بۇل زاڭدى جاقسى قابىلدايمىن، كەدەرگىسى بولادى دەپ ەش قورىقپايمىن»،-دەيدى ءانشى التىناي جوراباەۆا.

ال زاڭ  مامىر ايىنىڭ بىرىنەن باستاپ ىسكە قوسىلماقشى. وعان دەيىن بۇقارالىق اقپارات قۇرالدارى ارقىلى ناسيحاتتالاتىن بولادى. سونداي-اق، مۋزىكالىق ارنالارداعى بەينەباياندار ارنايى زاڭگەرلەردىڭ نۇسقاۋى بويىنشا ىرىكتەلىنەدى. مامىر ايىنان باستاپ زاڭعا باعىنباعان ونەر ادامدارى 1000 اەك ايىپپۇل سالۋ باستالادى.

Abai.kz

0 پىكىر