نەمەسە اش بالا - توق بالامەن وينامايدى...

ءماجىلىستىڭ جاپ-جاڭا قۇرامىندا وڭىرلەردەن كەلگەن، استانادا تۇراتىن جەرلەرى ءام ۇيلەرى جوق دەپۋتاتتاردىڭ از ەمەس ەكەندىگى بەلگىلى. وندايلار بار. مەملەكەتتىك رەزەرۆتەن ولارعا بەرىلەتىن تەگىن باسپانالاردى ەسكى شاقىرىلىمداعى ەكس-دەپۋتاتتار ءالى تولىق بوساتىپ بەرمەگەندىكتەن، پارلامەنتتىڭ شارۋاشىلىق باسقارماسى ءۇيسىز جۇرگەن ماجىلىسمەندەرگە جاعداي جاساپتى.

استانانىڭ قاق ورتاسىنان 5 جۇلدىزدى قوناق ءۇي جالداپ، ءۇيسىز دەپۋتاتتاردى سوندا ۋاقىتشا جايعاستىرعان ەكەن.

بۇل اقپارات الەۋمەتتىك جەلىلەر مەن باق-تا قىزۋ-تالقىعا ءتۇسىپ، بۇقارانىڭ ءدۇيىمى دەپۋتاتتاردىڭ داراقىلىعىن سىنعا الدى.

سوراقىسى سول بولعاندا، الگى قوناق ءۇي قىتايدىڭ ءىرى مۇناي كومپانياسىنا تيەسىلى ەكەن. اتاۋى دا ايقايلاپ تۇر. پەكين پالاس. دەپۋتاتتار مەملەكەتتىك باسپانالارىنا كىرگەنگە دەيىن وسىندا جاتادى ەندى. مەملەكەت ولارعا جامباس پۇل رەتىندە قوناق ءۇيدىڭ اقىسىن قازىناداعى قارجىدان وتەپ بەرەدى.  كەيبىر دەرەكتەرگە سۇيەنسەك، تاۋلىگىنە تۇپ-تۋرا 120 مىڭ تەڭگەگە تۇراتىن بۇل قوناق ۇيدە تۇسكى استىڭ ءوزى 5-15 مىڭ تەڭگەنىڭ ارالىعىن قۇرايدى ەكەن.

ەلىمىز ەكونوميكالىق داعدارىستىڭ ءدوپ شەنىندە تۇرعان، وسىناۋ الاعاي دا، بۇلاعاي كەزەڭدە مەملەكەتتىڭ جاپ-جاڭا دەپۋتاتتارعا داڭعازاداي قوناق ۇيدە داراقى جاعداي جاساۋى قانشالىقتى ادىلەتتى؟ باق-تىڭ دا، بۇقارا توپتىڭ دا تۇسىنبەيتىنى وسى.

ال «فەيسبۋك» جەلىسىنىڭ قولدانۋشىسى يۆان تۋلينوۆ (Ivan Tulinov) اتتى ازامات ءوزىنىڭ جەكە پاراقشاسىندا دەپۋتات گۇلجان قاراعۇسوۆا حانىمنىڭ قوناق ءۇي ماسەلەسىنە قاتىستى باق-قا بەرگەن ەموتسيونالدى ءام تاڭدانىسقا تولى تۇردەگى جاۋابىن جاريالاعان.

(https://www.facebook.com/kleckinmontana/videos/1297679183595077/)

سونىمەن قاراعۇسوۆا حانىم نە نەيدى؟  

الەۋجەلىدەگى بەينە جازباداعى دەپۋتات حانىمنىڭ ايتقاندارىن سوزبە-ءسوز اۋدارىپ بەرگەندى ءجون كوردىك.

«زاڭ بۇزىلعان جوق. ولاردىڭ وندا تۇرۋىنا سەبەپ بار. پارلامەنت تۋرالى زاڭدا ءبارى ناقتى ايتىلعان. حالىق قالاۋلىلارىن مەملەكە باسپانامەن قامتاماسىز ەتەدى دەلىنگەن. جانە ءبىر سەكۋند... ولارعا ازىرگە سول باسپانالار بەرىلمەگەندىكتەن ولار سول جەرلەردە جاتىر. سەبەبى، وتكەن شاقىرىلىمداعى دەپۋتتاتتار باسپانالاردى بوساتىپ بەرگەن جوق ءالى.  ودان كەيىن ەگەر ءسىزدىڭ ۇيدەن بۇرىنعى ادامدار كوشىپ كەتكەن سوڭ، ءسىز ول ۇيگە بىردەن كوشىپ كەلىپ المايسىز عوي. اۋەلى جوندەۋ جۇرگىزۋ كەرەك بولادى. ول ۇيلەردى ءالى جوندەيتىن جەرلەرىن رەتتەپ، تازالاۋ كەرەك. كادىمگىدەي ادام تۇراتىن حالگە كەلتىرۋ كەرەك. تاك ۆوت، وسى قىسقا عانا ۋاقىتتىڭ ىشىندە، قايتالاپ ايتام، ەشقانداي زاڭدى، ەرەجەنى بۇزباي، نارىقتاعى باعالارمەن سالىستىرىپ قاراعاندا بولشەك باعامەن ەسەپتەلگەن  كەلىسىمدەر بويىنشا بار بولعانى 30 دەپۋتات قانا سول جەردە تۇرىپ جاتىرمىز»،-دەيدى دەپۋتات حانىم.

ال ءتىلشىنىڭ «نەگە ءدال وسى پەكين پالاس قوناق ءۇيى؟ استانادا ودجان ارزانىراق قوناق ۇيلەر دە بار ەمەس پە؟»، دەگەن سۇراعىنا قاراعۇسوۆا حانىم قاتقىل جاۋاپ قاتتى. شامبايىنا باتىپ كەتسە كەرەك:

«قانداي ارزان...قانداي... ءسىز وسىنداي دەڭگەيدەگى دەپۋتاتتار (مەملەكەتتىك قۇپيالاردى ساقتاۋشى، قول سۇعىلماۋشى ءام ەرەكشە ماندات يەسى) ارزان-قۇرزان كۆارتيرالاردا تۇرسىن دەيسىز بە؟ سىزدەن سونى قالايسىزدار ما؟ ول ءۇشىن بيۋدجەتتە اقشا قاراستىرىلعان. الەمنىڭ بارلىق ەلدەرىندە ءار دەڭگەيدەگى دەپۋتاتتار مەن شەنەۋنىكتەرگە قاراستىرىلاتىن جاعداي بولادى. سوندىقتان بۇل جەردە جۇرت دابىرا قىلاتىنداي ەش جامان نارسە جوق... وسىعان قاراپ، انە دەپۋتاتتار قارجىنى وڭدى-سولدى شاشىپ جاتىر دەۋدىڭ كەرەگى جوق. بۇل الەمدىك تاجيىربەدە بار، قالىپتى جاعداي...»

ال دەپۋتات حانىمنىڭ مىنا ءبىر ءسوزىن ەش اۋدارماستان نازارلارىڭىزعا ۇسىنامىز.

«رەبياتا، كتو كاك سودەرجيتسيا، توت تاك ي رابوتاەت»

نۇرگەلدى ابدىعانيۇلى

Abai.kz