قازاقتىڭ حالىق اقىنى ولجاس سۇلەيمەنوۆ تۇركياداعى​ 80 جىلدىق مەرەيتويعا ورايلاستىرىلعان ءىس-شارالارعا قاتىستى دەپ حابارلايدى تۇركيانىڭ TRT ارناسىندا قىزمەت جاسايتىن قازاق رەداكتسياسى.

قازاقتىڭ حالىق اقىنى، مەملەكەتتىك سىيلىقتىڭ يەگەرى​، مەملەكەت جانە قوعام قايراتكەرى، «مادەنيەت» قورىنىڭ پرەزيدەنتى ولجاس سۇلەيمەنوۆ تۇركيادا​ ءوزىنىڭ 80 جىلدىق مەرەيتويىنا ورايلاستىرىلعان ءىس-شارالارعا قاتىستى.

تۇركى الەمىنە بەلگىلى اقىنعا تۇركيانىڭ ەرزۋرۋم قالاسىنداعى اتاتۇرىك ۋنيۆەرسيتەتى تاراپىنان قازاقستان مەن تۇركيا اراسىندا مادەنيەتارالىق قارىم-قاتىناستاردى جەتىلدىرىپ، حالىقتار اراسىنداعى دوستىقتىڭ كۇشەيۋى مەن تۇركولوگيا سالاسىنا سىڭىرگەن ايرىقشا ەڭبەگى ءۇشىن «قۇرمەتتى دوكتورى» اتاعى بەرىلدى.

ۋنيۆەرسيتەتتە ۇيىمداستىرىلعان جيىنعا قازاقستاننىڭ تۇركياداعى ەلشىسى جانسەيىت تۇيمەباەۆ، تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ، ەرزۋرۋم گۋبەرناتورى احمەت التىپارماق پەن تۇركيانىڭ قوعام جانە مادەنيەت قايراتكەرلەرى قاتىستى.

ەرزۋرۋم قالاسىنىڭ ارتىنان انكاراداعى ءىس-شارالارعا قاتىسقان سۇلەيمەنوۆتى تۇركيا پرەمەر-ءمينيسترىنىڭ ءبىرىنشى ورىنباسارى تۇعرىل تۇركەش قابىلدادى.

شامامەن 45 مينۋتقا سوزىلعان باسقوسۋدا قوعام قايراتكەرى تۇركى حالىقتارىنىڭ ادامزات وركەنيەتىنە ​قوسقان ۇلەسى جايلى وي قوزعاپ، «نەۆادا-سەمەي» قوزعالىسىنىڭ 25 جىلدىعىنا وراي شىعارىلعان، مەرەيتويلىق توسبەلگىنى ۆيتسە-پرەمەرگە تابىس ەتتى.

تۇركسوي حالىقارالىق ۇيىمىندا اقىننىڭ تۇركىتىلدەس حالىقتاردىڭ تىلدەرىنە اۋدارىلعان ولەڭ جيناعى كوپشىلىككە تانىستىرىلدى.

قازاقتىڭ حالىق اقىنى انكاراداعى ءىس-شارالار اياسىندا ەۋرازيا جازۋشىلار وداعى قاۋىمداستىعىنىڭ دا قوناعى بولدى.

قاۋىمداستىق توراعاسى ياكۋب ومەروعلۋ قوعام قايرەتكەرىنە تۇركى الەمىنىڭ بەلگىلى جازۋشىلارىن تانىستىرىپ، تۇركى الەمى ادەبيەتتەرى سالاسىندا اتقارىلعان حالىقارالىق جۇمىستار جايلى باياندادى.

ومەروعلۋ قاۋىمداستىقتىڭ بيىل 10 جىلدىعى ەكەنىنە نازار اۋدارىپ، «كاردەش كالەملەر» جۋرنالىنىڭ سوڭعى ءنومىرىن ولجاس سۇلەيمەنوۆتىڭ شىعارماشىلىعى مەن تاڭدامالى ولەڭدەرىنە ارنالعانىن اتاپ كورسەتتى.

جۋرنالعا اقىننىڭ ولەڭدەرى مەن سۇحباتتارى، ەلباسى نۇرسۇلتان نازارباەۆ، قازاقستاننىڭ تۇركياداعى ەلشىسى جانسەيىت تۇيمەباەۆ، حالىقارالىق تۇركسوي ۇيىمىنىڭ باس حاتشىسى قاسەيىنوۆ، ەۋرازيا جازۋشىلار قاۋىمداستىعىنىڭ توراعاسى ياكۋب ومەروعلۋ جانە تاعى باسقا تۇرىك عالىمدارىنىڭ ماقالالارى ەندى.

ولجاس سۇلەيمەنوۆقا ​ەۋرازيا جازۋشىلار وداعى تاراپىنان مۇنىڭ الدىندا جازۋشى دجەنگيز داعجى (قىرىم), جازۋشى شىڭعىس ايتماتوۆ (قىرعىزستان), جازۋشى انار ء(ازىربايجان) جانە اقىن شاكير سەليم (قىرىم) سىندى تۇركى الەمى ادەبيەتىنىڭ شوق جۇلدىزدارىنا بەرىلگەن «قۇرمەتتى مۇشە» اتاعى ​قازاقستان ەلشىلىگىندە وتكەن راسىمدە تابىس ەتىلدى.

«كاردەش كالەملەر» جۋرنالى بۇدان بۇرىن قازاقتىڭ اقتاڭگەر اقىنى ءسۇيىنباي ارونۇلىنا، اقىن قاسىم امانجولوۆقا، جازۋشى بەردىبەك سوقپاقباەۆقا، جازۋشى شەرحان مۇرتازاعا بىرنەشە سانىن ارناعان بولاتىن دەيدى TRT ارناسى.

Abai.kz