قازاقستاننىڭ تەرريتوريالىق تۇتاستىعىن ءام تاۋەلسىزدىگىن  مويىندامايتىن رەسەيلىك شەنەۋنىكتەردىڭ كوشىن دۋمانىڭ دۇمشە دەپۋتاتى ۆلاديمير جيرينوۆسكي باستايتىنىن ءارىپ تانيتىن ءار قازاق بىلەدى.

قازاقستاندى رەسەيدىڭ «ماڭگىلىك بودانى» دەپ، ەلدىڭ سولتۇستىكتىگىن رف قۇرامىنا قوسۋ كەرەكتىگىن ايتىپ الاشاپقىن بولىپ جۇرگەن جيرينوۆسكيدىڭ ءوز پىكىرىن ءوزى تەرىستەگەن مىنا سۇحباتى كەزەكتى تالقىنىڭ تاقىرىبىنا اينالدى.

«الماتى مەنىڭ تۋعان قالام جانە مەن وندا 18 جىل تۇردىم. 1946-1964 جىلدار ارالىعى بولاتىن. قازىر رەسەيدە ەشكىم قازاقستاننىڭ تاۋەلسىزدىگىنە كۇمان كەلتىرمەيدى. ارينە مەن دە وعان كوز جۇمبايمىن. بۇل كەيبىر جۋرناليستەردىڭ مەنىڭ ءسوزىمدى بۇرمالاعانىنان تۋىپ وتىر. بىلتىر «ەحو موسكۆا» راديوسىندا مەنى ءبىر باعدارلاماعا شاقىردى. ونىڭ جۇرگىزۋشىسى پليۋششەۆ بولدى. سوندا ءبىز ۋكراينا ماسەلەسىن تالقىلاپ جاتىر ەدىك. جۋرناليست ماعان، «كەلەسى كىم بولادى؟ قازاقستان با؟» دەپ سۇراق قويدى. مەن، «قازىر ەمەس، بۇل جەردە ءبىز قازاقستاندى تالقىلاۋعا كەلگەن جوقپىز» دەپ جاۋاپ بەردىم. ال قازاقستانعا بۇل جاڭالىق «مىنە، جيرينوۆسكي ۋكراينادان كەيىن قازاقستاندى باسىپ الامىز» دەپ ايتىپتى دەپ جەتكەن.»،-دەيدى جيرينوۆسكي.

Abai.kz