اتىراۋ. 2016 جىلدىڭ 24 ءساۋىرى. قازاقستاننىڭ حالقى، مۇنايلى ايماقتى مەكەن ەتىپ جاتقان - اتىراۋلىقتار باس كوتەرىپ، ۇكىمەتتىڭ اۋىلشارۋاشىلىق ماقساتتارىنداعى 1,7 ميلليون گەكتار جەرىن ساتۋ جانە شەتەلدىك ازاماتتارعا 25 جىلدىق مەرزىمگە جالعا بەرۋ تۋرالى باستاماسىنا قارسى بەيبىت شەرۋگە شىقتى.

رەسمي دەرەكتەرگە سۇيەنسەك، اتىراۋ قالاسىنداعى يساتاي-ماحامبەت الاڭىنا 600-700 تۇرعىن جينالىپتى. ال سول الاڭعا شىققاندار مەن بەلسەندىلەردىڭ ايتۋىنشا، بەيبىت ميتينگكە كەمىندە 10 مىڭنان استام ادام جينالعان.

بۇل - تاۋەلسىز قازاقستاننىڭ 25 جىلدىق تاريحىنداعى تۇڭعىش رەت دەموكراتيالىق پرينتسيپتەرگە ساي وتكىزىلگەن بەيبىت شەرۋى بولعانى انىق.

الاڭعا جينالعان  حالىق جەر ساتۋعا قاتىستى نارازىلىعىن ءبىلدىردى. ۇكىمەت پەن جەرگىلىكتى اكىمشىلىككە وزدەرىنىڭ ۇسىنىس - تالاپتارىن قويدى.

اتىراۋ وبلىسىنىڭ اكىمى نۇرلان نوعاەۆ مىرزا الاڭعا جينالعان كوپتىڭ ورتاسىنا كەلىپ، مەملەكەتشىلدىگىن، ازاماتتىعىن كورسەتتى.

ادەتتەگى اكىمدەرشە، شىت كيىنىپ، شىرەنىپ، شىدىرەيىپ، حالىققا جەكىرىپ سويلەگەن جوق. قاراپايىم عانا كيىممەن، حالىقتىڭ ورتاسىندا تۇردى. الاڭعا جينالعان اتىراۋلىقتارمەن بىرگە بولدى.

«باۋىرلار، مۇندا مىناداي ماسەلە بار. سىزدەردىڭ قويىپ وتىرعان تالاپتارىڭىز – قازىرگى قولدانىستاعى زاڭدى وزگەرتۋ. وسى جەردە تۇرعان ازاماتتاردىڭ بارلىعىنىڭ كوزى اشىق، كوكىرەگى وياۋ ازاماتتار. ايتقان تالاپتىڭ بارلىعىن قاعازعا ءتۇسىرىپ ماعان بەرىڭىزدەر. مەن پارلامەنتكە، ۇكىمەتكە، باسشىلارعا جەتكىزەمىن سىزدەردىڭ تالاپتارىڭىزدى»،-دەدى نۇرلان نوعاەۆ.

اتىراۋ قالاسىنداعى يساتاي-ماحامبەت الاڭىنا تۇسكى ساعات 14:00-دەن باستاپ جينالعان حالىق اكىممەن تىكەلەي تىلدەسكەن سوڭ، بەيبىت تاراستى. بۇزاقىلىق (ماروديورستۆو), جاپپاي تارتىپسىزدىك سەكىلدى جاعدايلار ورىن العان جوق.

وسىدان كەيىن ءبىز اتىراۋ وبلىسى اكىمىنىڭ (ن.نوعاەۆتىڭ) ءباسپاسوز قىزمەتىنە حابارلاستىق. ونداعىلار تەلەفون ارقىلى اتىراۋداعى بولعان وقيعانى بايانداپ بەردى.

-اتىراۋدا قازىر جاعداي تىنىشتالدى. كەشە الاڭعا جينالعان حالىق وزدەرىنىڭ تالاپتارىن ايتتى. باس جارىلىپ، كوز شىققان ەشتەڭە بولعان جوق ولار ساعات ەكىلەردە جينالدى. اكىم نۇرلان نوعاەۆ باردى. حالىقتىڭ تالابىن تىڭداپ، ولارعا جاعدايدى ءتۇسىندىردى. شامامەن، 17:00-گە دەيىن حالىق الاڭدا بولىپ، كەيىن تارقاپ كەتتى. اناۋ كەيبىر باق شۋلاپ جاتقانداي ەشكىم اسكەر كىرگىزىپ، حالىققا كۇش كورسەتكەن جوق. ەشقانداي دا بۇزاقىلىق دەگەن بولعان جوق. ءوزى جيىلعان حالىق ءوزى تارادى،-دەيدى اتىراۋ وبلىسىنىڭ ءباسپاسوز قىزمەتىنىڭ جەتەكشىسى سالامات سابىر.

نۇرگەلدى ابدىعانيۇلى

Abai.kz