الماتى وبلىستىق ءىىد-دە وتان قورعاۋشىلار كۇنىنە جانە جەڭىس مەرەكەسىنە وراي قىزمەتتىك مىندەتىن وتەۋ كەزىندە قازا تاپقان پوليتسيا ماماندارىنىڭ ەسىمدەرى جازىلعان مەموريالدى ستەلانىڭ اشىلۋ سالتاناتى ءوتتى. شاراعا ىشكى ىستەر ورگاندارىنىڭ ارداگەرلەرى، تاقتاعا اتى جازىلعان قىزمەتكەرلەردىڭ وتباسىلارىنىڭ مۇشەلەرى قاتىستى.

قاتىسۋشىلار ەرلەردى ءبىر مينۋتتىق ۇنسىزدىكپەن ەسكە الىپ، قارۋدان اسپانعا وق اتىلدى.

شارانىڭ اشىلۋ سالتاناتىندا الماتى وبلىسىنىڭ اكىمى اماندىق باتالوۆ قۇتتىقتاۋ ءسوز سويلەدى. ءىىد ارداگەرلەرى مەن قىزمەتكەرلەرىن قۇتتىقتاعان وبلىس باسشىسى ەرەن ەرلىك يەلەرىنىڭ ەسىمى كوپشىلىكتىڭ جۇرەگىندە قالاتىنىن ايتىپ ءوتتى.

- ءبىز ءوزىمىزدىڭ قاھارماندارىمىزدى ۇمتىپايمىز. ولاردىڭ ەسىمدەرى تاريحتا التىن ارىپتەرمەن جازىلىپ قالادى جانە جادىمىزدا ۇزاق ساقتالادى. الدىمىزدا ۇلى جەڭىستىڭ 71 جىلدىعى. وسى مەرەيلى مەرەكەدە ەرلىك ىستەرى عاسىردان عاسىرعا جەتكەن ارداگەرلەرىمىزگە قۇرمەت كورسەتەمىز. ولاردىڭ قاجىر-قايراتى، تاباندىلىعى، وتانىنا دەگەن شەكسىز ماحابباتى - بىزگە جارقىن ۇلگى. ءبىزدىڭ باستى ماقساتىمىز – ولاردى قۇرمەتتەپ، جان-جاقتى قولداۋ كورسەتۋ. اتالارىمىز بەن اكەلەرىمىزدىڭ داڭقى جولىن جالعاستىرىپ، وتان قورعاۋ شەبىندە، تىنىشتىق پەن بەيبىتشىلىك كۇزەتىندە تۇرعان بۇگىنگى جاس بۋىن ساربازدارعا دا ايتار العىسىمىز زور. بۇگىنگى سالتاناتتى شارانى پايدالانا وتىرىپ، بارشالارىڭىزدى الدا كەلە جاتقان مەرەكەلەرىڭىزبەن شىن جۇرەكتەن قۇتتىقتايمىن. سىزدەرگە مىقتى دەنساۋلىق، مولشىلىق، باق-بەرەكە تىلەيمىن، - دەدى ا. باتالوۆ.

سالتاناتتى جيىن وبلىستىق ءىىد باستىعى، پوليتسيا گەنەرال-مايورى مۇرات ۇرىمحانوۆتىڭ سوزىمەن جالعاستى. قاتىسۋشىلاردى قۇتتىقتاعان م. ۇرىمحانوۆ ۇزدىك قىزمەتكەرلەرگە ءتۇرلى دەڭگەيدەگى ناگرادالار تاپسىردى. قىزمەتتىك مىندەتىن مۇلتىكسىز اتقارعان پوليتسيا ماماندارى مەدالدارمەن، توسبەلگىلەرمەن، قۇرمەت گراموتالارىمەن، العىس حاتتارمەن ماراپاتتالدى. ولاردىڭ سپورتتاعى جەتىستىكتەرى دە اتالىپ ءوتىلدى. ۇوس ارداگەرى، الماتى وبلىسىنىڭ قۇرمەتتى ازاماتى، ميليتسيا گەنەرال-مايورى ابدىقادىر بولسامبەكوۆتىڭ قۇرمەتىنە ميني فۋتبولدان جىل سايىنعى وتكىزىلەتىن ءتۋرنيردىڭ جۇلدەسى بەرىلدى. سونداي-اق قىزمەتتىك مىندەتىن اتقارۋ بارىسىندا قازا بولعان قىزمەتكەرلەر وتباسىلارىنىڭ مۇشەلەرىنە باعالى جانە اقشالاي سىيلىقتار تابىس ەتىلدى.

جيىننىڭ سوڭىندا كوپشىلىك ءىىد-ءنىڭ وتكەن جىلى اشىلعان مۇراجايىن ارالادى. 

Abai.kz