رەسپۋبليكالىق قوعامدىق-ساياسي «پرەزيدەنت جانە حالىق» گازەتىنىڭ «ۋاقىت تاڭداۋى» – «ۆىبور ۆرەمەني» اگەنتتىگىمەن بىرلەسكەن جوباسىنا سايكەس جاڭا جىل قارساڭىندا ءداستۇرلى بايقاۋدىڭ ءتورت اتالىم بويىنشا جەڭىمپازدارى انىقتالدى.

«جىلدىڭ ۇزدىك وبلىس اكىمى» اتالىمىندا الماتى وبلىسىنىڭ اكىمى اماندىق عابباسۇلى باتالوۆ جەڭىمپاز دەپ تانىلدى.

ول مەملەكەت باسشىسىنىڭ وبلىسقا كەلگەن ءىسساپارى بارىسىندا بەرىلگەن تاپسىرمالاردى جۇزەگە اسىرۋدا ەلەۋلى شارالاردى جۇزەگە اسىرا الدى. ونەركاسىپتە 4,5 پايىز وسىممەن 456 ملرد. تەڭگەنىڭ ءونىمى ءوندىرىلدى. ءوزىنىڭ ىسكەر وبلىس باسشىسى ەكەندىگىن بايقاتتى.

ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى «جىلدىڭ ۇزدىك جوعارى وقۋ ورنى» اتاندى.

كەنجەعالي كەنجەباەۆ باسقاراتىن ۋنيۆەرسيتەت شاكىرتتەردى ونلاين وقىتۋعا ارنالعان تەگىن ينتەللەكتۋالدى Stereo 3d MIOC-School باعدارلاماسىن جاسادى. ءارى ونى جۇزەگە اسىرۋدىڭ قازاقستان كولەمىندە باستى درايۆەرىنە اينالدى.

ال اتى الەمگە ايگىلى بوكسشى گەننادي گولوۆكين جىلدىڭ ۇزدىك سپورتشىسى اتاندى.

 ول WBA, IBF, IBO تۇجىرىمدارى بويىنشا الەم چەمپيونى، WBC-ءدىڭ ۋاقىتشا چەمپيونى. جەرلەسىمىز كاسىپقوي بوكس رينگىندە 34 رەت كەزدەسۋ وتكىزىپ، ونىڭ بارلىعىندا قارسىلاسىنان باسىپ ءتۇستى. سونداي-اق 21 جەكپە-جەكتى قارسىلاسىن نوكاۋتقا جىبەرۋمەن اياقتادى.

بيىل  «جىلدىڭ ۇزدىك ءانشىسى» نوميناتسياسى ەسترادا مەن وپەرالىق ونەردى قاتار ۇشتاستىرىپ كەلە جاتقان ءلالا باقىتنۇرقىزىنا بۇيىردى.

ول 2015 جىلى گاسترولدىك ساپارلارى مەن بەينەباياندارى ارقىلى كورەرمەنى مەن تىڭدارماندارىنىڭ ىستىق ىقىلاسىنا بولەندى. ءوزىنىڭ تاڭعاجايىپ داۋىسىمەن، بيشىلىك قابىلەتىمەن ارىپتەستەرى اراسىندا وق بويى وزىپ تۇر. ول بۇگىندە قازاق ونەرىنىڭ شىنايى جارىق جۇلدىزدارىنىڭ ءبىرى.

Abai.kz