قاڭتار ايىنىڭ اياعىندا الماتى قالالىق مەملەكەتتىك كىرىستەر دەپارتامەنتىنىڭ باسشىلىعىنىڭ قابىلداۋىنا قالاداعى جاۋاپكەرشىلىگى شەكتەۋلى سەرىكتەستىكتىكتىڭ بىرىندە  ديرەكتور قىزمەتىن اتقاراتىن تۇرىك ازاماتى كەلەدى دە،  وسى دەپارتامەنتتىڭ ەكونوميكالىق تەرگەۋ قىزمەتىندە ىستەيتىن ەكى قىزمەتكەردىڭ وزىنەن اقشا بوپسالاپ جۇرگەنىن ايتادى. بۇنداي دابىلعا ءتيىستى شارا قولدانۋ كەرەكتىگىن تۇسىنگەن دەپارتامەنت باسشىلىعى ماسەلەنى دەرەۋ ىشكى قاۋىپسىزدىك باسقارماسىنا تاپسىرادى.

تۇسكەن دابىل بويىنشا وپەراتيۆتى ىزدەۋ شارالارى قولعا الىنىپ، سۋبەكتىلەردى سىرتتاي اڭدۋ، تىڭداۋ جانە باقىلاۋ جۇمىستارى جۇرگىزىلەدى. ءساتتى جۇرگىزىلگەن وپەراتيۆتى ىزدەۋ شارالارىنىڭ ناتيجەسىندە اقشا بوپسالاپ جۇرگەن قىلمىستىق توپتىڭ مۇشەلەرى كىمدەر جانە قانشا ادام ەكەنى انىقتالادى. اتاپ ايتساق، 25 قاڭتار كۇنى قالاداعى ريحارد زورگە كوشەسىندەگى №18 ۇيدە ورنالاسقان «OZALIP Sit» اتتى جاۋاپكەرشىلىگى شەكتەۋلى سەرىكتەستىك باسشىسىنا ازيات پىشىنىندەگى ەكى جىگىت كەلەدى دە، وزدەرىن الماتى قالالىق مەملەكەتتىك كىرىستەر دەپارتامەنتى ەكونوميكالىق تەرگەۋ قىزمەتىنىڭ ارمان جانە قۋانىش ەسىمدى قىزمەتكەرلەرى رەتىندە تانىستىرادى. ءسوز اراسىندا وسى سەرىكتەستىكتىڭ مەملەكەتكە سالىق تولەۋدەن 29 233 808 تەڭگە قارىزى بار ەكەنىن تىلگە تيەك ەتەدى دە، اتالمىش سەرىكتەستىكتىڭ جۇمىس بارىسىندا  «ادال بيزنەس گرۋپپ»، «ەكسپو ستروي حولدينگ»، «گراند سەرۆيس»، «Kapss»، «Viv Siti»، «Tex Stil Proffi»، «سام پرو گرۋپپ» سياقتى سەرىكتەستىكتەرمەن ءوزارا ساۋدا-ساتتىق قاتىناستا بولعانىن جانە ولاردىڭ قازىرگى ۋاقىتتا سوت شەشىمىمەن جالعان كاسىپكەر رەتىندە تانىلعانىن ەسكەرتەدى. ءتىپتى، زاڭ جولىمەن قانداي قىلمىستىق جاۋاپكەرشىلىككە تارتىلاتىنىن، قانشا جىلعا سوتتالاتىنىن، مۇلكى تاركىلەنەتىنى سياقتى جاعدايلاردى دا نازاردان تىس قالدىرمايدى. سودان كەيىن: «سەن سولارمەن سىبايلاس بولعانسىڭ. بۇل ءىستى تەرەڭ قازاتىن بولساق، جاعدايىڭ تىم قيىنعا سوعادى. ەگەر مامىلەگە كەلەتىن بولساڭ، ءبىز سەنى قىلمىستىق جاۋاپكەرشىلىككە تارتپايمىز. سوندىقتان دا تەزىرەك ويلانىپ كور، ۋاقىت تار» دەپ قورقىتادى اشىق تۇردە. اڭگىمەنىڭ ىشىندە سول سەرىكتەستىكتىڭ  باس بۋحگالتەرى دە بولادى.

شاقىرۋسىز كەلگەن «قوناقتار» كەتكەن سوڭ، سەرىكتەستىكتىڭ باس بۋحگالتەرى ءوزىنىڭ باستىعىنا ماسەلەنى ودان سايىن ۋشىقتىرماي، قىلمىستىق ىسكە جەتكىزبەۋ ء ۇشىن تەكسەرۋشىلەرگە 15 ميلليون تەڭگە بەرۋ كەرەكتىگى جونىندە ۇسىنىس جاسايدى. سول كەزدە سەرىكتەستىك باسشىسى تاراپىنان ءوزىنىڭ باس بۋحگالتەرىنىڭ وسى ادامدارمەن سىبايلاستىعى جونىندە سەزىك تۋادى. سەبەبى، سەرىكتەستىكتىڭ بۇكىل قارجىلىق قۇجاتتارى مەن سالىقتىق وپەراتسيالارىن باس بۋحگالتەردەن ارتىق ەشكىم بىلمەيتىنى تۇسىنىكتى. سودان كەيىن 26 قاڭتار كۇنى تەكسەرۋگە كەلگەن جىگىتتەردىڭ قۋانىش ەسىمدىسى سەرىكتەستىك باستىعىنا تەلەفون شالادى دا، ۋاعدالاسقان سومانىڭ مولشەرى 15 ميلليوننان 6 ميلليونعا تۇسىرىلگەنىن ايتىپ، وتە كەرەمەت «جەڭىلدىك» جاسالعانىن ەسكەرتەدى  جانە ول اقشانى ءوزىنىڭ باس بۋحگالتەرىنە بەرۋدى تاپسىرادى. ال ەندى وپەراتيۆتى ىزدەۋ شارالارى ناتيجەسىندە ءوزىن جالعان ەسىممەن «قۋانىش» دەپ تانىستىرىپ، اقشا بوپسالاپ جۇرگەن جىگىت ەكونوميكالىق تەرگەۋ قىزمەتى ەمەس، اۋەزوۆ اۋداندىق مەملەكەتتىك كىرىستەر باسقارماسىنىڭ باس مامانى ە. ەكەنى انىقتالادى. ارادا كوپ ۋاقىت وتپەي-اق، باس بۋحگالتەر ءوزىنىڭ باستىعىنا تەلەفون شالىپ، ۋادە ەتىلگەن 6 ميلليون تەڭگەنىڭ دەرەۋ 3 ميلليونىن قازىر بەرۋ كەرەكتىگىن، ال قالعانىن كەيىن بەرۋگە بولاتىنىن ەسكەرتەدى.

2 اقپان كۇنى ساعات 15 مولشەرىندە ايتىلعان اقشانى الۋ ۇستىندە سەرىكتەستىكتىڭ باس بۋحگالتەرى ج. قولعا ءتۇستى. سونىمەن قاتار اقشا بوپسالاۋ ارەكەتىنە قاتىستى سىبايلاسقان توپتىڭ باسقا دا مۇشەلەرى ۇستالىپ، الماتى قالالىق ىشكى ىستەر دەپارتامەنتىنىڭ ۋاقىتشا ۇستاۋ يزولياتورىنا قامالدى. اتالمىش ءىس بويىنشا قازاقستان رەسپۋبليكاسى قىلمىستىق كودەكسسىنىڭ 190 بابىنىڭ («الاياقتىق») 4 تارماعىنىڭ 2 تارماقشاسى بويىنشا قىلمىستىق ءىس قوزعالىپ، الدىن الا تەرگەۋ شارالارى جۇرگىزىلۋدە. ء يا، قازاقتا «ىشتەن شىققان جاۋ جامان» دەپ بەكەر ايتپاعان عوي. ءسويتىپ، قىلمىستىق ارەكەتتەرگە بايلانىستى سىبايلاستىق توپ قۇرعاندارعا بوپسالاپ جۇرگەن «سىباعا» بۇيىرمادى. ال ەندى زاڭ جۇزىندە قانداي «سىباعا» الاتىندارىن سوت شەشىمى كورسەتەدى.

بۇنداي وقيعا الماتى قالالىق مەملەكەتتىك كىرىستەر دەپارتامەنتى قىزمەتكەرلەرى تاراپىنان ورىن الىپ وتىرعان ءبىر  عانا فاكتى ەمەس. وسى ورايدا قازىرگى ۋاقىتتا دەپارتامەنت باسشىلىعى تاراپىنان سىبايلاس جەمقورلىق جانە باسقا دا قۇقىق بۇزۋشىلىق ارەكەتتەرىمەن اينالىسۋعا بەيىم سۋبەكتىلەرگە قارسى كۇرەس شارالارى كۇشەيە ءتۇستى. سوندىقتان دا دەپارتامەنتتىڭ كەز-كەلگەن قۇرىلىمىنداعى ( سالىق، كەدەن جانە ەكونوميكالىق تەرگەۋ قىزمەتى) مەملەكەتتىك قىزمەتكەرلەر تاراپىنان ورىن الىپ جاتاتىن كەلەڭسىز وقيعالارعا كوز جۇما قاراۋعا بولمايدى. جوعارىدا ايتىپ وتكەن اقشا بوپسالاۋ، جالعان تەكسەرۋ سياقتى جاعدايلارعا تاپ بولعان  ازاماتتار دەر كەزىندە دابىل قاعاتىن بولسا،  قىلمىستىق ارەكەتتەردى دە ءىزىن  سۋىتپاي اشكەرەلەۋگە ۇلكەن كومەك بولادى. ياعني، بۇگىنگى قوعامداعى اۋقىمدى پروبلاماعا اينالىپ وتىرعان سىبايلاس جەمقورلىققا قارسى كۇرەسكە ءبىر ادامداي  كۇرەسكەندە عانا وڭدى ناتيجە شىعارى ءسوزسىز.  سوندىقتان دا مەملەكەتتىك كىرىس دەپارتامەنتى قىزمەتكەرلەرى تاراپىنان زاڭسىز  ارەكەتتەرگە تاپ بولعان ادامدار تومەندەگى تەلەفوندارعا دابىل قاعۋلارىنا بولادى: 272 40 34, 272 38 41, 272 40 77.

بەكەن نۇراحمەتوۆ

Abai.kz