قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلى اقتاۋداعى «ويماشا» پوليگونىندا وقۋ-جاتتىعۋ كەزىندە قازا تاپقان جاۋىنگەرلەردىڭ قايتىس بولۋىنا بايلانىستى مارقۇمداردىڭ تۋعان-تۋىس، اعايىن-جۇرتىنا كوڭىل ايتۋ جەدەلحاتىن جولدادى، - دەپ حابارلايدى قمدب-نىڭ ءباسپاسوز قىزمەتى.

«مەملەكەتىمىزدىڭ تىنىشتىعى مەن ەلىمىزدىڭ اماندىعى جولىندا بورىشىن وتەپ جۇرگەن جاس جاۋىنگەرلەردىڭ قازاسى تۋرالى قارالى حابار ءبىزدىڭ دە جانىمىزعا باتتى.

پايعامبارىمىز (اللانىڭ وعان يگىلىگى مەن سالەمى بولسىن) ءبىر وسيەتىندە: «وتانىن كۇزەتكەن شەكاراشىنىڭ كوزى اقىرەتتە كۇيمەيدى»، - دەگەن. اتا-بابالارىمىز مۇرا ەتىپ قالدىرعان وتاننىڭ ازاتتىعى مەن تىنىشتىعىن قورعاۋ وشپەيتىن ونەگە، ۇزىلمەيتىن ىزگى امال.

ءوزىمنىڭ جانە قازاقستان مۇسىلماندارى ءدىني باسقارماسى اتىنان مارقۇمداردىڭ اتا-اناسىنا، تۋعان-تۋىستارىنا كوڭىل ايتامىن. اللا تاعالا قازانىڭ ارتىن قايىرلى ەتىپ، جاراتۋشى يەمىز ءوز مەيىرىمىنە بولەسىن!»، – دەلىنگەن كوڭىل ايتۋ جەدەل حاتىندا.

ەسكە سالساق، قايعىلى وقيعا اقتاۋداعى «ويماشا» پوليگونىنان 5 شاقىرىم قاشىقتىعى كاسپي تەڭىزىندە بولعان. جاتتىعۋ كەزىندە ءتورت بىردەي «بتر-80» ۇرىس ماشيناسى جاعادان شامامەن 150 مەتر ۇزاعان سوڭ، قاتتى جەل مەن تولقىنعا ۇرىنىپ، سۋعا باتىپ كەتكەن. سۋعا كەتكەن 4 جاۋىنگەر دە مەرزىمدى قىزمەتىن وتەۋشى جاس جاۋىنگەرلەر.

Abai.kz