ۋكراينا قازاقستان بيلىگىنە قازاقستاندىق مەكتەپ وقۋلىقتارىندا قىرىمنىڭ رەسەي اۋماعى رەتىندە كورسەتىلگەنىنە نارازىلىق ءبىلدىردى.

ۋكراينانىڭ قازاقستانداعى ەلشىلىگى بۇگىن قازاقستان سىرتقى ىستەر مينيسترلىگىنە قىرىمنىڭ "رەسەي فەدەراتسياسىنىڭ سۋبەكتىسى" دەپ كورسەتىلگەنىنە نارازىلىعىن ءبىلدىرىپ، نوتا جولداعانىن مالىمدەدى. "مەكتەپ" باسپاسى شىعارعان وقۋلىقتاردا قىرىم اۆتونوميالىق رەسپۋبليكاسى رەسەي تەرريتورياسى رەتىندە كورسەتىلگەن. بۇل حالىقارالىق قاۋىمداستىق ۇستانىمىنا دا جانە ۋكراينانىڭ تەرريتوريالىق تۇتاستىعىن قولدايتىنىن بىرنەشە رەت بىلدىرگەن قازاقستان بيلىگىنىڭ ۇستانىمىنا دا قايشى كەلەدى" دەلىنگەن مالىمدەمەدە.

ۋكراينا ەلشىلىگىنىڭ ءباسپاسوز اتتاشەسى يرينا بلاششۋك ازاتتىققا نوتا "بۇگىن تاڭەرتەڭ مينيسترلىككە تۇسكەنىن" حابارلادى. 

قازاقستان سىرتقى ىستەر مينيسترلىگىنىڭ ءباسپاسوز قىزمەتىنىڭ جەتەكشىسى ءانۋار جايناقوۆ ازاتتىققا "نوتا جولدانعانى تۋرالى اقپاراتتى تەكسەرىپ جاتقانىن" ايتىپ، باسقا اقپارات بەرمەدى.

تۇپنۇسقاداعى تاقىرىپ:  ۋكراينا وقۋلىقتا قىرىم رەسەيدىكى دەپ كورسەتىلگەنىنە نارازى

Azattyq.org