قازاقستان قاجىلىق ميسسياسى ساۋد ارابيا كورولدىگىنىڭ مەككە قالاسىنا جاقىن ورنالاسقان مينا جازىعىندا ورىن العان قايعىلى وقيعا اراسىندا قازاقستاندىقتار جوق ەكەنىن مالىمدەيدى، - دەپ حابارلايدى قمدب-نىڭ ءباسپاسوز قىزمەتى.

«قازىر قازاقستان قاجىلارىنا قىزمەت ەتىپ جاتقان كومپانيا جەتەكشىلەرىنەن شۇعىل مالىمەت الىندى. الدىن الا مالىمەتتەر بويىنشا، زارداپ شەككەندەر اراسىندا جەرلەستەرىمىز جوق ەكەنىن مالىمدەيمىز. سول ساتتە ءبىزدىڭ قاجىلار جامارات كوپىرىنە وزگە جولمەن جۇرگەن. وسىعان وراي، وتانداستارىمىزدى الاڭداماۋعا شاقىرامىز. بۇگىن قمدب توراعاسى، باس ءمۇفتي ەرجان قاجى مالعاجىۇلىنىڭ شۇعىل تاپسىرماسىنا وراي، قاجىلار اراسىندا ءتۇسىندىرۋ، قاۋىپسىزدىك شارالارىن ساقتاۋ جۇمىستارى كۇشەيتىلدى»، – دەپ مالىمدەدى قازاقستان قاجىلىق ميسسياسىنىڭ توراعاسى عىلىمبەك ماجيەۆ.

كەشە كەشكە ميسسيا مۇشەلەرى مينا جازىعىندا بىرقاتار فيرما باسشىلارىمەن، قازاقستان قاجىلارىمەن كەزدەسۋ ءوتتى. كومپانيا جەتەكشىلەرىنە قازاقستاندىق قاجىلار ءۇشىن قاۋىپسىزدىك شارالارىن كۇشەيتۋ تۋرالى تاپسىرما بەرىلدى. «بۇعان قاجىلىق فيرمالارىنىڭ 100 قىزمەتكەرى، قازاقستان مۇسىلماندارى ءدىني باسقارماسىنىڭ 70 وكىلى جۇمىلدىرىلدى»، – دەپ اتاپ ءوتتى ع.ماجيەۆ.

قاجىلاردىڭ كۇندەلىكتى دەنساۋلىعى ميسسيامەن بىرگە بارعان قازاقستاندىق دارىگەرلەردىڭ ءجىتى نازارىندا. 2015 جىلدىڭ 11 قىركۇيەگىنەن باستاپ قاجىلىققا اتتانعان جەرلەستىرىمىزدىڭ اراسىندا 24 قىركۇيەككە دەيىن قاتتى ناۋقاستانعان ادام تىركەلمەدى.

كەشە 78 جاستاعى م.مانسۇروۆا ەسىمدى قاريا جۇرەك اۋرۋىنان جەرگىلىكتى ەمحانالاردىڭ بىرىندە ەم جۇرگىزۋ بارىسىندا كوز جۇمدى. 1937 جىلى تۋىلعان اجە ەگدە جاستاعى دەنساۋلىعى مەن جاعدايىنا قاراماستان جالعىز كەلگەن.

قازاقستان قاجىلىق ميسسياسى بۇدان بىلاي ەگدە جاستاعى قاريالاردى جاقىن تۋىستارىنسىز قاجىلىققا جىبەرمەۋ تۋرالى تالاپ قويادى.  

اباي-اقپارات