ۋكراينادا سەپاراتيستەر سايلاۋ وتكىزبەيتىندەرىن مالىمدەدى.

وزدەرىن وزدەرى جاريالاعان دونەتسك حالىقتىق رەسپۋبليكاسى (دحر) مەن لۋگانسك حالىقتىق رەسپۋبليكاسى (لحر) جەرگىلىكتى باسقارۋ ورگاندارىنا سايلاۋ وتكىزبەيتىندەرىن مالىمدەدى. الدىن سەپاراتيستەر ۋكراينانىڭ دونەتسك جانە لۋگانسك وبلىسىندا 18 قازان مەن 1 قاراشادا سايلاۋ وتەدى دەپ جاريالاعان بولاتىن.   

دحر مەن لحر وكىلدەرى ۆلاديسلاۆ دەينەگو مەن دەنيسا پۋشيلين مۇنداي شەشىمدى  پاريجدە وتكەن «نورماندىق تورتەۋدىڭ» سامميتىنەن كەيىن قابىلداعاندىقتارىن ايتادى. ولار بۇل ۋاقىتتا ۋكراينا وزىنە جۇكتەلگەن مىندەتتەمەلەردى ورىنداۋى ءتيىس دەيدى. اتاپ ايتقاندا – دونباسقا ەرەكشە مارتەبە بەرۋ. دونەتسك پەن لۋگانسك اۋماعىنداعى وقيعاعا قاتىسقانداردى زاڭمەن قۋدالاماۋ، سونىمەن بىرگە وزدەرىن وزدەرى جاريالاعان رەسپۋبليكا وكىلدەرىمەن كەلىسكەندەي، كونستيتۋتسياعا وزگەرىستەر ەنگىزۋ. 

ۋكراينادا جەرگىلىكتى بيلىكتى سايلاۋ 25 قازاندا وتەدى. قىركۇيەك ايىنىڭ سوڭىندا سەپاراتيستەر دونباستا سايلاۋدى 2016 جىلدىڭ 21 اقپانىندا وتكىزۋدى ۇسىنعان بولاتىن.

اباي-اقپارات