قاپشاعاي قالاسىندا بيىل قۋاتى 50 مەگاۆاتت بولاتىن جاڭا كۇن ەلەكتر ستانساسىنىڭ قۇرىلىسى باستالادى. بۇل تۋرالى بۇگىن الماتىدا «نەمىس ينۆەستيتسياسىنىڭ قازاقستانعا كەلۋى - مۇمكىندىكتەر مەن كەدەرگىلەر» تاقىرىبىندا وتكەن 17-ءشى گەرمانيا ەكونوميكاسىنىڭ كۇنى بارىسىندا «سامرۇق-ەنەرگو» اق دەپارتامەنتىنىڭ ديرەكتورى باقتيار بارباسوۆ ءمالىم ەتتى. بۇل تۋرالى abai.kz پورتالى قازاقپارات-قا سىلتەمە جاساي وتىرىپ حابارلايدى.

«قاپشاعاي قالاسىندا قۋاتى 50 مەگاۆاتت بولاتىن جاڭا كۇن ەلەكتر ستانتسياسىنىڭ قۇرىلىسى قولعا الىنىپ جاتىر. بولاشاقتا ونىڭ قۋاتى 100 مەگاۆاتقا جەتكىزەلەدى دەپ كوزدەلۋدە. سونىڭ ارقاسىندا ەلىمىزدە اۋاعا تارالاتىن زياندى قالدىقتار جىلىنا 116 تونناعا قىسقارادى. اتالمىش جوبانى جۇزەگە اسىرۋ بويىنشا «سامرۇق-ەنەرگو» اق «BISOLGroup» (سلوۆەنيا) كومپانياسىمەن جانە  قازاقستاندىق «Astana Solar» جشس ستراتەگيالىق سەرىكتەستىك ورناتۋ تۋرالى كەلىسىمگە قول قويعان. قازىر ەكى كومپانيانىڭ جاساعان پانەلدەرى الماتى وبلىسىندا تەستىلەۋدەن ءوتىپ جاتىر. بۇل جوبانىڭ ماقساتى - الماتى وبلىسىن ەلەكتر ەنەرگياسىمەن قامتاماسىز ەتۋ جانە كۇن ەلەكتر ستانساسىنا «جاسىل» تەحنولوگيالاردى پايدالانا وتىرىپ، قورشاعان ورتانىڭ ەكولوگياسىنىڭ جاقسارۋىنا كۇش سالۋ»، - دەدى ب. بارباسوۆ.

ايتا كەتەلىك، بۇعان دەيىن ەلىمىزدە تۇڭعىش رەت قاپشاعاي قالاسىندا قۋاتى 2 مەگاۆاتتىق كۇن ەلەكتر ستانساسى سالىنىپ، وتكەن جىلى 9-شى قازاندا پايدالانۋعا بەرىلگەن بولاتىن. بۇل وڭىردە وسىنداي جوبالاردىڭ قولعا الىنۋى بەكەر ەمەس. ويتكەنى، مامانداردىڭ ايتۋىنشا، قاپشاعاي قالاسىندا جىلىنا 300 كۇن بويى اۋا-رايى اشىق بولادى ەكەن.

قر ينۆەستيتسيالار جانە دامۋ مينيسترلىگىنىڭ دەرەكتەرى بويىنشا 2030 جىلعا دەيىن قازاقستاندا وندىرىلەتىن ەلەكتر ەنەرگياسىنىڭ 30 پايىزىن بالاما قۋات كوزدەرى قۇرايتىن بولادى. بۇل كورسەتكىشتى 2050 جىلعا قاراي 50 پايىزعا جەتكىزۋ جوسپارلانعان.  

abai.kz