وتكەن تاۋلىك ىشىندە قازاقستاندىق شەكاراشىلار شەكارادان ەسىرتكى زاتتارىن وتكىزۋگە تىرىسقان قازاقستاندىق ەكى ازاماتتى ۇستادى دەپ حابارلايدى قر ۇقك شەكارا قىزمەتىنىڭ   ءباسپاسوز ورتالىعى.

اتاپ ايتقاندا، «اۋىل-تەمىرجول» باقىلاۋ-وتكىزۋ بەكەتىنىڭ شەكاراشىلارى (قازاق-رەسەي شەكاراسى) وسى جىلدىڭ 22-قاراشاسى كۇنى №376 «استانا -لەنينوگورسك» باعىتىندا كەتىپ بارا جاتقان جولاۋشىلار پويىزىنا شەكارالىق باقىلاۋ جاساعان قىزمەتتىك يت ۆاگونداعى جۇك سالعىشتىڭ ىشىنەن 10گر ماريحۋانانى الىپ شىقتى.

اتالعان دەرەك بويىنشا «يگور» ەسىمدى، 1984 جىلى تۋعان قازاقستان رەسپۋبليكاسىنىڭ ازاماتى ۇستالدى.  

ۇستاۋ ماتەريالدارى سەمەي ستانساسىنىڭ جەلىلىك ىشكى-ىستەر ءبولىمىنىڭ قىزمەتكەرلەرىنە بەرىلدى.  

بۇگىن تۇندە، ياعني وسى جىلدىڭ 23-قاراشاسى كۇنى پەتروپاۆل شەكارا وتريادىنا قاراستى «جاڭاجول - اۆتو» باقىلاۋ-وتكىزۋ بەكەتىنىڭ شەكاراشىلارى 02ساعات 15مينۋتتا «ماز» جۇك كولىگىمەن ەلىمىزدەن رف-عا ءوتىپ بارا جاتقان، 1990 جىلى تۋعان «كيريلل» ەسىمدى ازاماتتى ۇستادى.    

سەبەبى، شەكارالىق باقىلاۋ جاساۋ كەزىندە ونىڭ كۇرتەسىنىڭ قالتاسىنان 2-3 گر ماريحۋانا تابىلدى.  

ۇستاۋ ماتەريالدارى سقو مامليۋت اۋداندىق ىشكى ىستەر بولىمىنە بەرىلدى.

اباي-اقپارات