شىمكەنت قالاسىندا وڭتۇستىك قازاقستان وبلىسى كاسىپكەرلەر پالاتاسىنىڭ ۇيىمداستىرۋىمەن كاسىپكەرلەردىڭ فورۋمى ءوتتى - دەپ حابارلايدى اباي پورتالى.

فورۋمنىڭ جۇمىسىنا وڭتۇستىك قازاقستان وبلىسىنىڭ اكىمى ب. اتامقۇلوۆ، شىمكەنت قالاسىنىڭ اكىمى ع. ءابدىراحىموۆ، «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ن. التاەۆ، وبلىستىق كاسىپكەرلەر پالاتاسىنىڭ وڭىرلىك كەڭەسىنىڭ مۇشەلەرى، كاسىپكەرلەر، جەرگىلىكتى اتقارۋشى ورگان وكىلدەرى قاتىستى. 
ءوڭىر كاسىپكەرلەرىنىڭ باسىن قوسىپ، وڭتۇستىكتەگى شاعىن جانە ورتا بيزنەستى دامىتۋدى تالقىلاعان جيىندا وبلىس باسشىسى كاسىپكەرلەردىڭ ءوز تۋعان مەكەندەرى ءۇشىن ەڭبەك ەتۋىن، تۇرعىلىقتى جەرىنىڭ الەۋەتىن كوتەرۋ تۋرالى ايتىپ ءوتتى. ءارى ءوڭىردىڭ دامۋى ءۇشىن جەرگىلىكتى اكىمشىلىك پەن كاسىپكەرلەردىڭ تىعىز قارىم-قاتىناستا ەڭبەك ەتىپ، كۇنگەيدەگى شاعىن جانە ورتا بيزنەستى دامىتۋ كەرەكتىگىن، شاھارىمىزدىڭ كوركىنە كورىك قوساتىن ءىرى نىساندارعا بىرلەسىپ قارجىلىق قولداۋ كورسەتۋ كەرەكتىگىن تىلگە تيەك ەتتى. 
ءىس-شارادا وبلىستىق كاسىپكەرلەر پالاتاسىنىڭ ديرەكتورى اسقار ابۋباكيروۆ جىل باسىنان بەرگى اتقارىلعان جۇمىستار، كاسىپكەرلەردىڭ قۇقىعىن قورعاۋ بويىنشا قولدانىلعان شارالار، اكىمشىلىك كەدەرگىلەردى جويۋ، وڭىردەگى كاسىپكەرلىكتىڭ دامۋى تۋرالى باياندادى. اتاپ ايتار بولساق، 2015 جىلدىڭ وتكەن مەرزىمىندە پالاتاعا 233 كاسىپكەرلىك سۋبەكتىلەرىنەن ءوتىنىش كەلىپ تۇسسە، ولاردىڭ 64-ءى قابىلدانىپ، وسى كورسەتكىشتەر بويىنشا ءوز كاسىبىن دوڭگەلەتكەندەرگە 217 ملن.تەڭگە ۇنەمدەۋدىڭ ءساتى ءتۇسىپتى. ءوڭىردىڭ 14 اۋدانىندا تەكسەرۋ جۇمىستارى ارقىلى 3000 اسا كاسىپكەردىڭ قۇقىقتارىن بۇزۋ فاكتىسى انىقتالعان. 
وسىعان بايلانىستى وقو كاسىپكەرلەر پالاتاسى جەرگىلىكتى اتقارۋشى ورگانعا ەلباسىنىڭ ۇلتتىق كاسىپكەرلەر پالاتاسىنا قويعان تاپسىرماسىن ورىنداۋ ماقساتىندا بىرگە تىعىز بايلانىستا جۇمىس ىستەۋدى ۇسىندى. انىعىندا، وڭىردەگى ءىرى كاسىپورىندار ەلىمىزدىڭ ءۇشىنشى قالاسى - شىمكەنتتە ورنالاسقان. بۇل رەتتە وسى مۇمكىندىكتى پايدالانا وتىرىپ، شىمكەنتتىڭ بولاشاق دامۋ تۇجىرىمداماسىن جۇزەگە اسىرۋعا شەتەلدىك ينۆەستورلارمەن قاتار جەرگىلىكتى كاسىپكەرلەردىڭ كومەگى زور ەكەندىگى قۋانتادى. 

Abai.kz