كەشە، 2 جەلتوقسان كۇنى اقتوبە وبلىسىندا  «استانا ەكسپو-2017» ۇك» اق مەن  اقتوبە، باتىس قازاقستان، ماڭعىستاۋ جانە اتىراۋ وبلىستارى اكىمدىكتەرىنىڭ اراسىندا ىنتىماقتاستىق تۋرالى مەموراندۋمدارعا قول قويىلدى.

ۇلتتىق كومپانيا باسقارماسىنىڭ توراعاسى ەكسپو حالىقارالىق كورمەسىن وتكىزۋدىڭ تيىمدىلىگىن ءسوز ەتە وتىرىپ، مىسالى رەتىندە ميلاندا وتكەن كورمەنى اتاعان. ەسىموۆ مىرزانىڭ ايتۋىنشا، ميلانداعى كورمەگە دايىندىق بارىسىندا جانە وتكىزۋ كەزەڭىندە 295 مىڭ جۇمىس ورنى قۇرىلىپ، تاۋارلار مەن قىزمەتتەر ەكسپورتى 10 ملرد ەۋروعا ۇلعايعان-مىس.

ال، وبلىس باسشىسى بەردىبەك ماشبەكۇلى ءوز  بايانداماسىندا وبلىستا «ەكسپو-2017» ءۇشىن دايىندىق جۇمىستارىنىڭ بەلسەندى تۇردە جۇرگىزىلىپ جاتقانىن مالىمدەگەن. مىسالى، اقتوبە وبلىسى ەنەرگەتيكا مينيسترلىگىنە ۇلتتىق پاۆيلونعا قويۋ ءۇشىن 12 يننوۆاتسيالىق جوبا ۇسىنىپتى.

سونىمەن قاتار، اقتوبە وبلىسىنان 100 ادام ەكسپو-2017-ءنىڭ ەرىكتىلەر قوزعالىسىنا تارتىلماقشى ەكەن. قازىردىڭ وزىندە كورمەلەر ءۇشىن قاجەت 30 ەرىكتى كەلەسى جىلى تاعى 70 ادامنىڭ دايىندالۋى جوسپارلانىپ وتىر.

وسىلايشا دايىندىق بارىسىن بايانداعان ساپاراباەۆتى ەسىموۆ مىرزا سوگىپ تاستاعان. اقتوبەگە ارنايى ساپارمەن كەلگەن احمەتجان سماعۇلۇلى قالادان ەكسپو-عا قاتىستى ەشبىر بەزەندىرۋلەر كورمەپتى. سول ءۇشىن دە، ءۇش بىردەي وبلىس باسشىلارىن اقتوبەدەن جيناعان ساپارباەۆ بەزەندىرۋلەردىڭ ولقىلىعىنان ەسىموۆتىڭ سىنىنا ۇشىراعان.

بۇل تۋرالى بۇگىن قازاقستاندىق nur.kz سايتى «احمەتجان ەسىموۆ قالانى ەكسپو-عا قاتىستى دۇرىس بەزەندىرمەگەنى ءۇشىن ساپارباەۆتى سوكتى» اتتى ماقالا جاريالادى.

ساپارباەۆ باسقارىپ وتىرعان وبلىسىقا ساپارلاپ كەلگەن ەسىموۆ «قالادان ەشقانداي ەكسپو-عا قاتىستى بەزەندىرۋ كورگەن جوقپىن» دەپ، وبلىس باسشىسىنا وكپەسىن ايتىپ، وزگە اكىمدەردىڭ الدىندا سوگىپ تاستاعان.   

«بەردىبەك ماشبەكۇلى – وتە تاجىريبەلى باسشى. پرەمەر-ءمينيستردىڭ ورىنباسارى بولدى. مەن ويلايمىن، اقتوبە وبلىسىندا دا باسقا وبلىستار سەكىلدى بۇل جۇمىستار جاندانادى دەپ. شىندىعىن ايتقاندا، ازىرگە قالادان ەشقانداي ەكسپو-عا قاتىستى بەزەندىرۋدى كورگەن جوقپىن. بىراق بۇل جيىننان كەيىن ايتقانىم ورىندالادى دەپ ويلايمىن»، – دەدى ەسىمىوۆ.

ەسىموۆتىڭ ەسكەرتۋىنەن كەيىن اقتوبەدە «استانا ەكسپو-2017» ۇك» اق-نىڭ مەردىگەر كومپانيالارى جەرگىلىكتى تاۋار وندىرۋشىلەرمەن جالپى قۇنى 10 ملرد تەڭگە شاماسىنداعى 8 تاۋار جەتكىزۋ تۋرالى كەلىسىمشارتقا جانە 3 ىنتىماقتاستىق تۋرالى مەموراندۋمعا قول قويدى. بۇل جۇمىستار 2016 جىلى جۇزەگە اسىرىلادى.

ءتۇيىن: ءوزى ءانشى، ءوزى شاڭعىشى ەكس-اكىم ءھام قازىرگى ەكسپو باسشىسىنا  ساپارباەۆتىڭ قوناقجايلىلىعى ۇناماسا كەرەك-ءتى. الماتىنى باسقارىپ جۇرگەندە ەسىموۆ مىرزانىڭ ءبىرتۇرلى سوزدەرى باق اراسىندا حيت بولىپ ەدى.  استاناعا بارىپ، اقىل توقتاتتى ما دەسەك، احمەتجان مىرزا، وتكەن جولى، پرەزيدەنتتىڭ الدىندا بايانداما جاساعانىنا قاراپ، باياعى جارتاس، سول جارتاس ەكەنىنە كوزىمىز ابدەن جەتكەن ەدى. بەتالپەتى، ادام شوشىرلىقتاي، ءىسىپ كەتكەن (ەگەر ناۋقاستىنىپ جۇرسە، كەشىرەرسىزدەر), ەكسپو دەگەن ابدەن قاجىتىپ جىبەرسە كەرەك، شارشاڭقى كەلىپ ەدى، ەلباسىنىڭ الدىنا. سوندا جاڭادان سالىنىپ جاتقان عيماراتتى قالاي اتاساڭ، ولاي اتا دەگەندەي، «نۇر شارى، الەم نۇرى... كوپ قوي اتاۋلار» دەپ ەدى. ال ەلباسى بولسا، «سەن نۇر شارى دەپ تۇرسىڭ. مەن "الەم شارى" دەيمىن. ءما، وسى ەكەۋىنەن بىردەڭە قۇراستىر»، دەپ ءبىر جاپىراق قاعازدى قولىنا ۇستاتىپ جىبەرىپ ەدى.

ەسىموۆتىڭ ەسكەرتۋى ساپارباەۆقا ساباق بولدى ما ەكەن؟ دەگەنمەن، بەردىبەك  ماشبەكۇلى دا بەكەر ادام ەمەس-ءتى. ول اقوردا جاقتان كەلگەن  ەسىموۆتىڭ الدىندا مۇنداي ولقىلىققا قالاي جول بەرىپ ءجۇر. تاڭىم بار...

نۇرگەلدى ابدىعانيۇلى

Abai.kz