اباي قۇنانباەۆتىڭ 170 جىلدىعىنا وراي قىتايداعى قانداستارىمىز «ابايدىڭ بالالىق شاعى» اتتى «3D» ءمۋلتفيلمىن ۇسىنباق. بۇل تۋرالى «قازاقستان» ارناسى حابارلادى.

بالا ابايدىڭ انيماتسيالىق وبرازىن جاساۋدى عۇسمان قاجىتاي ەسىمدى قانداسىمىز وسىدان ەكى جىل بۇرىن باستاعان. ارقايسىسى 13 مينۋت بولاتىن 104 سەريالى «ابايدىڭ بالالىق شاعى» شاعىن «اباي جولى» اتتى انيماتسيالىق ستۋديادا جاسالىپ جاتىر. اۆتورلار مۋلتفيلم قازاق، قىتاي، ۇيعىر، اعىلشىن تىلدەرىندە شىعاتىنىن ايتادى. سونىمەن قاتار، انيماتسيالانعان ابايدى كورۋگە تەك قازاقستان مەن قىتاي ەمەس، وڭتۇستىك ازيانىڭ بىرنەشە مەملەكەتى قۇشتارلىق تانىتۋدا. 
«دالا مادەنيەتىن بەينەلەيتىن مۋلتفيلمدەر بۇعان دەيىن بۇل جاقتا كورسەتىلمەگەن. سول ءۇشىن دە وسى ءمۋلتفيلمنىڭ ءساتتى شىعۋىنا بار كۇشىمىزدى سالىپ جاتىرمىز»،-دەيدى عۇسمان قاجىتاي. 
بۇگىندە جوبانىڭ ەكى سەرياسى دايىن تۇر. وسى جىلدىڭ قىركۇيەك ايىندا كوپشىلىككە رەسمي تۇردە تانىستىرىلادى. بۇدان بولەك جوبا اۆتورى عۇسمان قانداسىمىز دارىندى قازاق جاستارى تاربيەلەنەتىن اباي اتىنداعى انيماتورلار اكادەمياسىن اشپاق. ونىڭ تۇساۋكەسەرى دە قىركۇيەك ايىنا جوسپارلانعان. 

 اباي-اقپارات