جەكسەنبى, 5 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
نە دەيدى؟! 4098 0 پىكىر 27 شىلدە, 2015 ساعات 15:52

قارعالى. شىعىن مۇعالىمنىڭ قالتاسىنان وتەلە مە؟

قارعالى وزەنىنىڭ ارناسىنان شىعىپ، قاتتى تاسىعانى تۋرالى ەل ءىشى تەگىس قۇلاعدار بولسا كەرەك. وسى كۇندەرى 1758 ادام، 352 تەحنيكا تاسقىن سۋ شايعان جولدار مەن ۇيلەردى قالپىنا كەلتىرۋگە كىرىسكەن. بۇگىن ەرتەڭ الماتى وبلىسى مەن قاراعاندى وبلىسىنان ىشكى ىستەر مينيسترلىگىنە قاراستى ۇلتتىق گۆارديانىڭ 270 جاۋىنگەرى كەلەدى دەپ كۇتىلۋدە. جالپى، اپاتتىڭ سالدارىنان قيراعان نىسانداردى قالپىنا كەلتىرۋ، جوندەۋ جۇمىستارىنا تارتىلعان ادامداردىڭ اراسىندا ۆولونتەرلار، ياعني، ازاماتتىق بەلسەندىلىك تانتىپ، جاناشىرلىق كورسەتىپ، جانۇشىرىپ جۇرگەندەر وتە كوپ. ءتىپتى، قارشاداي بالالاردىڭ ءوزى سۋسىن تاسىپ، جول كورسەتىپ، شاماسى جەتەتىن ىسكە قولعابىس تيگىزۋدە. ولاردىڭ ەلگەزەكتىگى قازىر الەۋمەتتىك جەلىلەردە ۇلكەن اڭگىمەلەردىڭ وزەگىنە اينالىپ جاتىر. مىسالى، قارعالىنىڭ 12 جاسار تۇرعىنى دياس اۋباكىروۆ جايىندا تيمۋر نۇسىمبەكوۆ ءوزىنىڭ Facebook-تەگى پاراقشاسىندا بىلاي دەيدى:

«قارعالىنىڭ 12 جاسار تۇرعىنى دياس. كىشكەنتاي باتىر. تاۋ قونجىعى. ول تەك سىرتقى بولماسىمەن عانا تيان-شان قونجىعىنا ۇقساس ەمەس، ونىڭ كۇشى مەن ارەكەت ەتۋى، ءوسىپ كەلە جاتقان قونجىقتىڭ ەپتىلىگى مەن كۇشىنە تەڭ. بۇل بالا سەل جۇرگەننەن كەيىنگى بارلىق كۇندەردە قۇتقارۋشىلار، ەرىكتىلەر سونىمەن بىرگە اسكەريلەرمەن تەڭ دارەجەدە جۇمىس ىستەپ عانا قويماي، كەي ۋاقىتتا ولاردان دا باسىم ءتۇستى».

سۋ تاسقىنى 456 ءۇيدى العان، ول ۇيلەردىڭ 9-ى قۇلاعان، 44 كوشەنى سۋ باسقان، 32 كولىك تە تابيعات اپاتىنا ۇشىراپ، ىستەن شىققان. وسى شىعىنداردى قالپىنا كەلتىرۋ ءۇشىن ۇكىمەت تاراپىنان قارجات بولىنە مە؟ ارينە، ءبولىنۋى كەرەك. الايدا، ءبىزدىڭ رەداكتسيامىزعا قوڭىراۋ شالىپ، اتى-ءجونىن اتاماۋدى وتىنگەن بەيتانىستىڭ سوزىنە سەنسەك، الگى شىعىنداردى قالپىنا كەلتىرۋ ءۇشىن الماتى قالاسىنداعى مۇعالىمدەر مەن دارىگەرلەردىڭ ءبىر ايلىق جالاقاسى ۇستالاتىن كورىنەدى. ياعني، ارناسىنان تاسىپ اققان قارعالى وزەنى كەلتىرگەن شىعىندى دارىگەرلەر مەن مۇعالىمدەر قالتاسىمەن وتەمەك. بۇل قانشالىقتى راس ءسوز؟ ماسەلەنىڭ ءمان-جايىن الداعى كۇندەرى انىقتاي تۇسەمىز.

Abai.kz  

0 پىكىر