«ۆلاديمير بوجكو – اپات ادام»

ول تۋرالى قازىر ەلى ءىشى وسىلاي دەيتىن بولدى. نەگە؟ سەبەبى، ۆلاديمير بوجكو توتەنشە جاعدايلار جونىندەگى شارۋاشىلىقتىڭ تىزگىنىن قولىنا العالى بەرى كولدەنەڭ كەساپات كوبەيىپ كەتتى. ارينە، ول: «جۇرتقا كەسىرىمدى تيگىزەيىن، اپات اكەلەيىن» ، - دەپ جۇرمەگەن شىعار، بىراق، اتالعان سالادا بوجكونىڭ جولى بولمادى. الايدا، ۆلادمير كارپۇلى ەلباسى سەنىپ تاپسىرعان ءىستىڭ ورايىن تابا الماعانىنا وكىنىپ، قابىرعاسى قايىسىپ، جانى اۋىراتىن ادامعا ۇقسامايدى. قاعاناعى – قارق، ساعاناعى – سارق. ءبارىن تابيعاتتىڭ توسىن مىنەز تانىتۋىنا جاۋىپ قويىپ، الشاڭ باسىپ ءجۇر. راسىندا، سوڭعى كەزدەرى جيىلەپ كەتكەن جاعىمسىز وقيعالاردىڭ بارىنە تابيعات كىنالى مە؟ ماسەلەنكي، قارعالى وزەنىنىڭ ارناسىنان اسىپ تاسۋىنا الماتىنىڭ اسپانىن جازىقتى ەتۋگە بولا ما؟ اسپاننان قارا نوسەر توقتاماي قۇيىپ، الاتاۋدىڭ باسىنا شوككەن قارلار ەرىپ، كولدەر شايقالسا، وندا ءبىر ءجون. ولاي بولعان جوق قوي. تابيعاتتىڭ مۇنداعى بار «جازىعى» - شىلدە ايى بولعان سوڭ شىلىڭگىر ءتۇسىپ، ىستىق بۋدى. ال، مۇنداي جاعدايعا تجك ءاردايىم دايىن بولۋى ءتيىس ەدى. قىزىلاعاش قىرعىنىنان سوڭ بوجكو بەلدى بەكەم بۋىپ، بارلىق بوگەندەردىڭ قاۋىپسىزدىگىن تەكسەرىپ، بولۋى ىقتيمال توسىن جايتتاردىڭ الدى الۋى كەرەك ەدى. ونداي شارالارعا قازىر مەملەكەتتىڭ اقشاسى دا، باسقاسى دا جەتىپ ارتىلادى. الدە، بوجكونىڭ نيەتى «اپات ەلدىڭ ءىشىن جايلاي ءتۇسسىن، سۋ تاسىپ، سەل قاپتاسىن» دەگەنگە سايا ما؟ سوندىقتان دا جۇرت ونى «اپات ادام» دەيتىن شىعار. ال، «اپات ادامعا» كەرەگى – قازاقستاننىڭ تۇرالاپ، قيىندىقتان باس كوتەرمەۋى بولار... وسى ارادا كەيىپكەرىمىزدىڭ ءومىربايانىنا، قىزمەت-لاۋازىمىنا، ءجۇرىپ وتكەن جولىنا كوز جۇگىرتەيىك:

ۆلاديمير بوجكو، 1949 جىلى 16 مامىردا الماتى قالاسىندا دۇنيەگە كەلگەن.

1971 جىلى لەنين اتىنداعى قازاق پوليتەحنيكالىق ينستيتۋتىن بىتىرگەن. 1971-1973 جىلدارى سوۆەت ارمياسىنىڭ قاتارىندا بولعان. 1976 جىلى مينسك قالاسىندا سسسر كگب-سىنىڭ جوعارى كۋرسىن بىتىرگەن. 1976 -1989 جىلدارى قازاق سسر كگب-سىندا باسشىلىق قىزمەتتەر اتقارعان.1989 – 1991 جىلدارى تسەلينوگراد وبلىسىندا ۋكگب باستىعىنىڭ ورىنباسارى بولعان. 1991-1993 جىلدارى كوكشەتاۋ وبلىسىندا ۇقك باسشىسى بولىپ قىزمەت اتقارعان. 1993-1994 جىلدارى شىعىس-قازاقستان وبلىسىندا ۇقك باسشىسى بولعان. 1994-1997 جىلدارى قر ۇقك-ءنىڭ ەكونوميكالىق قاۋىپسىزدىك باسقارماسى باستىعىنىڭ ءبىرىنىشى ورىنباسارى قىزمەتىن اتقاراعان. 2001 جىلدان بەرى قر ۇقك باسشىسىنىڭ ءبىرىنشى ورىنباسارى بولدى. 2007 جىلى مەملەكەت باسشىسىنىڭ جارلىعىمەن توتەنشە جاعدايلار جونىندەگى مينيستر بولىپ تاعايىندالدى. 2014 جىلدىڭ 6 تامىزىنان بەرى ىشكى ىستەر ءمينيسترىنىڭ ورىنباسارى. مەملەكەت قايراتكەرى. ۇلتتىق قاۋىپسىزدىك وفيتسەرى. گەنەرال-لەيتەنانت.

قۇرمەتتى، وقىرمان، «اجال – اياق استىندا» دەگەن ءسوز بار. جاماندىق تا، كولدەنەڭ كەساپات تا جاقىننان تابىلا كەتۋى ابدەن مۇمكىن: ءبىر جەردەن ءورت شىعىپ، ءبىر جەردەن سەل قاپتاپ، الىپ سۋ قويمالارى بۇزىلۋى مۇمكىن. ماسەلەنكي، ءسىز وتىرعان اۋىلدىڭ، كەنتتىڭ، قالانىڭ قاۋىپسىزدىك جاعدايى قالاي؟ ءسىزدى نە الاڭداتادى؟ سونىڭ ءبارىن سۇراق ەتىپ جولداڭىز، وي، پىكىرىڭىز بولسا، ورتاعا سالىڭىز. ءبىز بوجكو دەيتىن كىسىنىڭ قۇزىرىنا جەتكىزۋگە بارىمىزدى سالىپ كورەيىك. ەگەر جاۋاپ بەرمەسە، وندا بۇل اداممەن ەل-جۇرت بولىپ، تۇتاس حالىق بولىپ باسقاشا سويلەسۋگە تۋرا كەلەدى.