بۇعان دەيىن قازاقتىڭ ءۇشىنشى عارىشكەرى اتاناتىن ايدىن ايىمبەتوۆتىڭ عارىشقا ۇشۋىنا "روسكوسموس" باسشىسى يگور كوماروۆتىڭ اقى تالاپ ەتكەنىن جازعان ەدىك. قازاقستان ايدىن ايىمبەتوۆتىڭ عارىشقا ۇشقانى ءۇشىن رەسەيگە تولەنۋى ءتيىستى $20 ملن قاراجاتتى 2016 جىلى بايقوڭىردان جالعا الىناتىن اقىسى ەسەبىنەن وتەي الادى، دەپ ءمالىم ەتتى ينۆەستيتسيا جانە دامۋ مينيسترلىگىنىڭ اەروعارىش اگەنتتىگىنىڭ توراعا ورىنباسارى ەركىن شايماعامبەتوۆ.

كازتاگ-ءتىڭ جازۋىنشا،  ا. ايىمبەتوۆتىڭ عارىشقا ۇشىرىلۋى ءۇشىن قازاقستان 1,1 ملرد رەسەيلىك رۋبل (شامامەن $20 ملن) تولەيدى، ول 10 كۇندىك عارىش ساپارى ءۇشىن تولەنەتىن ەڭ تومەنگى قۇن.

«وسى شىعىن 2015 جىل بيۋدجەت شىعىندارىندا قاراستىرىلماعانى سەبەپتى، ونى رەسەيلىك تاراپقا 2016 جىلى تولەۋ جانە بايقوڭىردى جالعا بەرۋ اقىسىنىڭ ەسەبىنەن، جانە باسقا دا كوزدەردەن تولەۋ ماسەلەسى تالقىلانۋدا»، – دەدى شايماعامبەتوۆ سارسەنبى كۇنى ءباسپاسوز ءماسليحاتىندا.

ءوز كەزەگىندە «عارىشتىق زەرتتەۋلەر جانە تەحنولوگيالار ۇلتتىق ورتالىعى» اق (عزجت)پرەزيدەنتى جۇمابەك جانتاەۆ عارىشتا ايدىن ايىمبەتوۆ ناقتى نەمەن اينالىساتىنىن ايتىپ بەردى.

«ول كاسپي ءوڭىرىنىڭ – جاعالاۋ مەن تەڭىز ايلاعىن – كومىرسۋتەكتەرىمەن لاستانۋىن زەرتتەۋ جانە مۇناي قۇبىرلارىنا مونيتورينگى جاساۋ. سونداي-اق عارىشتىق بومەديتسينا جانە عارىشتىق بيوتەحنولوگيالار سالاسىندا ايىمبەتوۆ ءوزىنىڭ اعزاسىنا گامما-ساۋلەلەردىڭ ىقپالىن زەرتتەيدى. ونىڭ ۇستىنە عارىشكەرلەر قازاقستاندا دايىندالعان ازىق-تۇلىك تاعامدارىنان ءدام تاتادى، ونىڭ ىشىندە ايران، ىرىمشىك پەن قازاقشا ەت بار»، – دەگەن سپيكەر.

ايتا كەتەر بولساق،  ايدىن ايىمبەتوۆتىڭ حعس-قا ۇشۋى 2015 جىلعى 2-12 قىركۇيەككە جوسپارلانعان.

ەسكە سالايىق، قازاقستان بايقوڭىردى جالداۋ اقىسىنا رەسەيدەن جىل سايىن 115 ميلليون دوللار الادى.

اباي-اقپارات