اقش-تا "قازاق حاندىعىنا 550 جىل" اتتى ءفيلمنىڭ تۇساۋكەسەرى وتەدى، - دەپ حابارلايدى قر مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساعان Baq.kz

ءباسپاسوز قىزمەتىنىڭ مالىمەتىنشە، 3-12 تامىز ارالىعىندا اقش-تا قر مسم قازاق عىلىمي-زەرتتەۋ مادەنيەت ينستيتۋتىنىڭ باس ديرەكتورى اندرەي حازبۋلاتوۆ، قازاقستان ءسىم ەرەكشە تاپسىرمالار جونىندەگى ەلشىسى اسقار تاجيەۆ پەن قر ۇلتتىق مۋزەيىنىڭ قىزمەتكەرلەرى قاتىسىپ جاتقان IVLPondemand حالىقارالىق ساپارلار باعدارلاماسى وتەدى. ساپار بارىسىندا ۆاشينگتونداعى دجوردج ۆاشينگتون ۋنيۆەرسيتەتى مەن نيۋ-يوركتەگى روبەرت دە نيرونىڭ Tribeca كينوستۋدياسىندا قازاق حاندىعىنىڭ 550 جىلدىعىنا ارنالعان دەرەكتى ءفيلمنىڭ تۇساۋكەسەرى وتەدى دەپ جوسپارلانعان.

"قازاق حاندىعىنا 550 جىل" ءفيلمى قازاق حاندىعىنىڭ قۇرىلۋ تاريحىنا ارنالعان. ول كونە جانە ورتا عاسىرلارداعى شىعىس ازيا مەن ۇلى جىبەك جولى، مونعول شاپقىنشىلىعى مەن الەمنىڭ گەوساياسي ءبولىنۋى، قازاق حالقىن جاۋلاپ الۋ تاريحناماسى، شىڭعىسحان مۇراگەرلەرىنىڭ اراسىنداعى تالاس، 1465 جىلى العاشقى دەربەس قازاق حاندىعىنىڭ قۇرىلۋى تۋرالى باياندايدى", - دەلىنگەن حابارلامادا.

سونداي-اق، بۇل فيلمدە كەرەي مەن جانىبەك، ولاردىڭ ۇلدارى قاسىم مەن بۇرىندىق بيلىگى تۋرالى جاڭا دەرەكتەر كورسەتىلەدى.

اباي-اقپارات