"مەملەكەت باسشىسىنىڭ جارلىعىمەن ەربول تۇرماحانۇلى ورىنباەۆ قازاقستان رەسپۋبليكاسى پرەزيدەنتىنىڭ كومەكشىسى قىزمەتىنەن بوساتىلدى", - دەپ حابارلايدى اقوردانىڭ ءباسپاسوز قىزمەتى. Tengrinews.kz جازۋىنشا، ونىڭ ورنىنا مەملەكەت باسشىسىنىڭ وكىمىمەن قازاقستان رەسپۋبليكاسى پرەزيدەنتى اكىمشىلىگىنىڭ الەۋمەتتىك-ەكونوميكالىق مونيتورينگ ءبولىمىنىڭ مەڭگەرۋشىسى دانيار تالعاتۇلى اقىشەۆقا قازاقستان رەسپۋبليكاسى پرەزيدەنتىنىڭ كومەكشىسى مىندەتىن ۋاقىتشا اتقارۋ جۇكتەلدى. ال، ورىنباەۆتىڭ قانداي قىزمەتكە باراتىنى ايتىلماعان.

ايتا كەتەيىك، ەربول ورىنباەۆ قازاقستان پرەزيدەنتىنىڭ كومەكشىسى قىزمەتىندە 2013 جىلدان بەرى بولدى. بۇل تاعايىنداۋعا دەيىن ول قازاقستان پرەمەر-ءمينيسترىنىڭ ورىنباسارى بولىپ قىزمەت اتقارعان، سونىمەن قاتار ەل پرەمەر-ءمينيسترىنىڭ كەڭسە جەتەكشىسى بولىپ ەكى مارتە تاعايىندالعان ەدى. ءار جىلدارى ورىنباەۆ پرەزيدەنت اكىمشىلىگىندە جۇمىس ىستەدى. 2006-2007 جىلدارى پرەزيدەنت اكىمشىلىگىنىڭ باسشىسىنىڭ ورىنباسارى بولدى. 2002 جىلى رەسپۋبليكانىڭ ەكونوميكا جانە بيۋدجەتتىك جوسپارلاۋ جونىندەگى ءمينيسترىنىڭ ورىنباسارى قىزمەتىن اتقاردى.

اباي-اقپارات