ءبىزدىڭ ەلىمىزدە فارماتسەۆتيكالىق ء(دارى جاساۋ) ونەركاسىپتى دامىتۋدىڭ 2010-2014 جىلدارعا ارنالعان باعدارلاماسى قابىلدانعانىن كوبىمىز بىلە بەرمەيمىز. قۇدايعا شۇكىر، مۇنداي باعدارلاما قابىلدانىپ، وكىمەت ونى ورىنداۋعا كىرىسكەن. باعدارلاما قابىلدانعان سوڭ ونى ىسكە اسىرۋدىڭ ەڭ باستى تەتىگى – قاراجات تا بيۋدجەتتە قاراستىرىلعان. باعدارلامانىڭ ەڭ باستى ماقساتى – 2014 جىلى قازاقستاندىقتاردىڭ دارىگە دەگەن سۇرانىسىنىڭ 50 پايىزىن ءوزىمىزدىڭ ونىممەن وتەۋ. سوندا ءدارى ءبىرشاما ارزان بولاتىنى بەلگىلى. ال ەندى مىنا قىزىققا قاراڭىز...

2009 جىلى ءبىزدىڭ ءدارى وندىرۋشىلەرىمىز ىشكى سۇرانىستىڭ 30 پايىزىن ءوز ونىمدەرىمەن جاپقان. 2011 جىلى بۇل كورسەتكىش ءتىپتى 49,3 پايىزعا جەتكەن.  دۇرىس-اق... وسى قارقىنمەن تاعى ءبىر سەكىرسە 2014 جىلعا بەلگىلەنگەن مەجەگە دە جەتىپ قالاتىن ەدى... بىراق ولاي بولماي شىقتى. باياعى تاز قالپىنا قايتا كەلىپ، حالىقتى ءدارى-دارمەكپەن قامتۋ... 2012 جىلى قايتادان 15,4 پايىزعا قۇلديلاعان.

تاڭ قالماي كورىڭىز. باعدارلاما اناۋ، قاراجات مىنە، الماقشى بولعان مەجە جاقىن قالعان، داعدارىس جوق. ەندەشە ءبىزدىڭ فارماتسەۆتشىلەرگە قۇلدىراۋ قايدان كەلگەن؟ بۇعان دەپۋتاتتار دا تاڭ قالىپ وتىر. اسىرەسە، ەكونوميكالىق ماسەلەلەرگە قاشاندا جۇيرىكتىگىمەن تانىلىپ جۇرگەن تۇرسىنبەك ومىرزاقوۆ اڭ-تاڭ قالىپ وتىر. ءوزىنىڭ دەپۋتاتتىق قۇقىن پايدالانىپ ول ينۆەستيتسيا جانە دامۋ ءمينيسترى ءا.يسەكەشەۆكە ساۋال جولداپ، وسىنىڭ سەبەبىن ايتۋدى ءوتىندى. ەندى شە... ءدارى وندىرۋشىلەرگە الابوتەن كەلىپ جاتقان بۇل نە زاۋال ەكەنىن بارلىق قازاقستاندىقتاردىڭ دا بىلگىسى كەلەدى. الدە... الدە بۇل جەردە ادام فاكتورى جۇمىس ىستەپ تۇر ما؟ ءدارى وندىرۋشىلەر بىرەۋلەردىڭ الدىنا ءتۇسىپ كەتىپ، اياقتان شالىندى ما؟ حالىققا، اسىرەسە قارت ادامدارعا اۋاداي قاجەت دۇنيەنى شىعارتپاۋ كىمگە كەرەك بولدى ەكەن؟ مينيستر وسى سۇراقتاردىڭ جاۋابىن ايتار دەگەن ۇمىتتەمىز.

مارينا كاكيماكي، جۋرناليست

Abai.kz