ءوز ەلىمىزدىڭ  مەملەكەتتىك رامىزدەرىنە قۇرمەتپەن  قاراۋ، قاستەرلەۋ، ونى ورنىمەن  پايدالانۋ  – ءاربىر  ازاماتتىڭ مىندەتى. مەملەكەتتىك رامىزدەر  ەلىمىزدىڭ  تاۋەلسىزدىگىن، ونىڭ سانعاسىرلىق  تاريحىن،   حالقىمىزدىڭ  مادەنيەتى مەن  ءداستۇرىن  بەينەلەيدى. ۇلتتىق سانا-سەزىم مەن  ازاماتتىق ۇستانىمدى  قالىپتاستىرادى. وتانعا دەگەن  سۇيىسپەنشىلىك پەن   بەرىلگەندىك  مەملەكەتتىك رامىزدەرگە  قۇرمەتپەن  قاراۋدان باستالادى.

تاۋەلسىز مەملەكەتتەردىڭ  اۋماعىندا   ويران سالىپ،  تۇتاستىعىن  بۇزۋدى  كوزدەيتىندەر  دارىپتەگەن رامىزدەردى، سونداي-اق  ەش جەردە  مويىندالماعان  جالعان رەسپۋبليكالاردىڭ  تۋلارىن  ءوز ەلىمىزدە  تاراتۋعا جانە  ناسيحاتتاۋعا مۇلدە جول بەرۋگە بولمايدى. مۇنى ءبىز جەتە ءتۇسىنۋىمىز كەرەك.

سوندىقتان ءبىز، پاتريوتتار، مەملەكەتشىلدەر، زيالى قاۋىم  وكىلدەرى مەن جۋرناليستەر مەملەكەتتىك تاۋەلسىزدىك تۋرالى دەكلاراتسياعا قول قويىلعان كۇنى – 25 قازاندا  مەملەكەتتىك رامىزدەردى  ناسيحاتتتاۋ ءۇشىن كەزدەسۋ وتكىزەتىنىمىزدى بۇعان دەيىن دە مالىمدەگەن ەدىك.

انتيەۋرازيالىق  قوزعالىستىڭ  ۇيىمداستىرۋ كوميتەتى كەزىندە رەسپۋبليكانىڭ  ءار قيىرىنان  باس قوسقان  پاتريوتتاردىڭ  انتيەۋرازيالىق  فورۋمىن جانە قوعامدىق  تىڭداۋىن وتكىزگەنبىز. مەملەكەتتىك رامىزدەردى  ناسيحاتتاۋعا  باعىتتالعان بۇل  كەزدەسۋ  مەملەكەتىمىزدىڭ  تاۋەلسىزدىگىن  قورعاۋدىڭ  جاڭا ءىس-قيمىل ءتاسىلى بولىپ  سانالادى.

 قۇرمەتتى  ازاماتتار، ءبىز  سىزدەردى سامارقاۋلىققا   سالىنباي،  اتالعان شاراعا بەلسەنە قاتىسۋعا شاقىرامىز!

 كەزدەسۋ 25- قازان كۇنى (سەنبى) ساعات 11:00-دە  بۇرىنعى جوعارعى كەڭەس عيماراتى ورنالاسقان  «استانا» الاڭىنداعى (تولە بي مەن ابىلاي حان قيىلىسى) قازاقتىڭ باتىر قىزدارى  ءاليا مەن مانشۇكتىڭ ەسكەرتكىشى  الدىندا وتەدى.

انتيەۋرازيالىق فورۋمدى ۇيىمداستىرۋ كوميتەتى.

Abai.kz