جەكەشەلەندىرۋ جىلدارى ءوڭىردى باسقارعان مۇراتبەك ناسىروۆ جەرگىلىكتى مالشى قازاقتى قىستاۋى مەن الدىنداعى مالىنان ايىرىپ، شۇرايلى جەرلەرگە قانداستارىن قونىستاندىرىپ، الدىنا ءتورت تۇلىك سالىپ بەرسە، زامانبەك اعامىز وبلىسقا اكىم بولىپ تۇرعاندا اۋداننىڭ تىزگىنىن ۇستاعان ۆلاديمير توحتاسۋنوۆ «قانىنا تارتپاعاننىڭ قارى سىنسىن» دەپ، سول كەزدە باستاۋ العان ىستىق سۋ نۇكتەلەرىندە دەمالىس ورىندارىن سالۋ جۇمىسىن بۇرا تارتتى. سونىڭ ارقاسىندا قازىرگى كەزدە اۋدان ورتالىعى شونجى مەن شەكارا شەبىندەگى قالجات اۋىلىنىڭ اراسىن جالعاستىرىپ جاتقان 90 شاقىرىمدىق زاماناۋي اۆتوباننىڭ بويىندا ورنالاسقان جۇزدەگەن دەمالۋ-ساۋىقتىرۋ ورىندارىننىڭ ءبىرلى-جارىمى عانا قازاققا تيەسىلى.

سەرىك ۇمبەتوۆ كەلىپ، توحتاسۋنوۆتى اۋىستىرعاندا باسشىلىققا قازاق تاعايىندالارىنا كۇمانسىز سەنگەندەردىڭ ماڭدايى 2007 جىلى دا تاسقا تيگەن ەدى. كايۋمچان وماروۆ سول تاعايىندالعاننان جەتى جىل تاپجىلماي اكىمدىكتە وتىردى. وسى جىلدارى اۋداندا قازاق پەن ۇيعىر اراسىندا تۇسىنبەستىك جيىلەپ كەتكەنىن جۇرتشىلىق باق ارقىلى جاقسى بىلەدى.

ەندىگى ءۇمىت باتالوۆتا ەدى. بۇل دا اعالارى سالعان «سارا جولدان» اۋىتقي المادى. جوعارىدا ەسىمى اتالعان ۆلاديمير يمتاحۋنۇلى توحتاسۋنوۆتىڭ تۋعان ءىنىسى اليمجان يمتاحۋنۇلى توحتاسۋنوۆتى ۇيعىر اۋدانىنىڭ اكىمدىگىنە تاعايىندادى. سونىمەن بىرگە كايۋمچان ابانۇلىن دا دالادا قالدىرعان جوق. وزىنە كەڭەسشى ەتتى. وسىلايشا ءبىر باسىنا كەڭەس بەرەتىن «اقىلماندار» سانىن تورتكە جەتكىزدى. ونى قويشى، ۇيعىر اۋدانىندا تۇراتىن 40 مىڭعا جۋىق قازاقتان ءوڭىردى وركەندەتەر ءبىر ازاماتتىڭ تابىلماعانىنا قارنىڭ اشادى. اۋدان باسشىسىن قازاق ەتە الماي جۇرگەندە، اۋداننىڭ اتاۋىن قازاقشالاۋ تۋرالى اڭگىمەنىڭ بوس دالباسا ەكەنىنە كوزىڭ جەتە تۇسەدى.

ءشارىپحان قايسار.

Abai.kz