جامبىل وبلىسىنىڭ اۋماعىندا اپاتقا ۇشىراعان ان-2 ۇشاعىنداعى جەتى جولاۋشىنىڭ ءبىرى – اللا قاعىپ، امان قالعان ايەل ادام شۋ اۋداندىق اۋرۋحاناسىنىڭ جانساقتاۋ بولىمىندە ەسىن جيدى. بۇل جونىندە اقپارات قۇرالدارىنا اۋداندىق اۋرۋحانانىڭ جانساقتاۋ بولىمىنەن حابارلادى.

دارىگەرلەردىڭ ايتۋلارىنا قاراعاندا، دەنەسى بىرنەشە جەردەن سىنىپ، اۋىر جاراقات العان ناۋقاستىڭ قازىرگى جاعدايى اۋىر بولسا دا، جالپى العاندا تۇراقتى كورىنەدى. الداعى ۋاقىتتا بىرنەشە وتا جاسالۋى مۇمكىن، سوعان وراي شۋعا استانادان بىلىكتى دارىگەرلەر ۇشىپ كەلىپتى.

ەسىمىزگە الا كەتەتىن بولساق، كەشە تۇستەن كەيىن «وليمپ ەير» جاۋاپكەرشىلىگى شەكتەۋلى سەرىكتەسىگىنەن «قازاقمىس» كورپوراتسياسى» جالعا العان ان-2 شاعىن ۇشاعى، ازىرگە بەلگىلى دەرەكتەرگە قاراعاندا، بالقاش قالاسىنان شاتىركول كەنىشىنە ۇشىپ بارا جاتىپ، اۋا رايىنىڭ قولايسىزدىعىنا بايلانىستى اپاتقا ۇشىراعان.

بۇگىنگە ناقتىلانعانى - اتالمىش كورپوراتسيانىڭ قازا بولعان قىزمەتكەرلەرى مىنالار: تەحنيكالىق دامىتۋ دەپارتامەنتىنىڭ ديرەكتورى ع.تولەۋباەۆ، «بالقاشتسۆەتمەت» وندىرىستىك كاسىپورنىنىڭ اعا مەحانيگى ە.ىبىراەۆ، «بالقاشتسۆەتمەت» وندىرىستىك كاسىپورنى تەحنيكالىق جانە  ينۆەستيتسيالىق جوسپارلاۋ ءبولىمىنىڭ باستىعى ۋ.ەسماعانبەتوۆا، ان-2 ۇشاعىنىڭ كومانديرى گ.كليۋشەۆ، ان-2 ۇشاعىنىڭ ەكىنشى ۇشقىشى پ.ساۆەلەۆ جانە بورتمەحانيك ۆ.ليتۆينوۆ.

ۇشاق بورتىندا بولعان «بالقاشتسۆەتمەت» وندىرىستىك كاسىپورنىنىڭ اعا گەولوگى ا.شاياحمەتوۆا اۋىر جاراقات الىپ، ەس-ءتۇسسىز كۇيىندە شۋ اۋداندىق اۋرۋحاناسىنا جەتكىزىلگەن بولاتىن.

قازىرگى كەزدە ءتيىستى ورگاندار تاراپىنان قۇرىلعان ارنايى ماماندار ۇشاق اپاتىنىڭ سەبەبىن تەكسەرۋ جۇمىستارىنا كىرىسىپ كەتتى.

بۇگىن، سونداي-اق، قاراعاندى وبلىسىنىڭ اكىمى نۇرمۇحامبەت ابدىبەكوۆ ۇشاق اپاتىنان قازا بولعانداردىڭ اعايىن-تۋىستارى مەن وتباسىلارىنا كوڭىل ايتىپ، ولاردىڭ بارلىعىنا دا مورالدىك جانە ماتەريالدىق كومەك كورسەتىلەتىنىن مالىمدەدى.

مارات ماداليموۆ.

اباي.kz

سۋرەت: tengrinews.kz