(تۇركيا ساپارىنان جولجازبالار)

جولجازبانىڭ باسى.

اللا بۇيىرتىپ، تۇركيەنىڭ ەسكىشەحەرىندە بولاتىن جيىنعا باراتىن بولىپ،  4 قازاق ۇشاققا وتىردىق. ءتۇن ورتاسىنان اۋعاندا اۋەگە كوتەرىلىپ، 5,5 ساعات بويى «تۇركەش ەيرلاين»كومپانياسىنىڭ ۇشاعىن سامعاتىپ ىستامبولعا جەتتىك. بۇرىن قىڭ دەمەيتىنبىز، «اۋا اعىنى» دەيتىن اۋە شوقالاعىنا «شومىلعان»  ۇشاقتىڭ قالتىراعانىنا ىشتەي قوبالجىيتىن بولىپپىز... دەگەنمەن ۇيقى قىسقان سوڭ قالعىپ-شۇلعىپ تەز جەتكەندەي سەزىندىك.

تۇسە سالىسىمەن ءبىزدى كۇتكەن قارسى الۋشىلاردى دا تەز تاپتىق. 2 ساعاتتاي وزگە كەلۋشىلەردى توسىپ، دايىن كولىككە جايعاسىپ ەسكىشەحيرگە تارتتىق. الايدا، 20 ميلليوندىق تۇرعىنى بار ىستامبولدان شىعۋعا دا 1-2 ساعات كەرەك ەكەن. ءبىر جەرىندە زۋلاتىپ، ەندى ءبىر جەرىندە «سىزىپ» وتىرىپ، تۇركى دۇنيەسىنىڭ ەڭ ءىرى شاھارىنان دا سىتىلدىق...

ءبىر قىزىعى، اۆتوبۋس ءبىر ساتكە دە توقتاعان ەمەس، الدە ۇيقىلى-وياۋ بولىپ بايقامادىق پا...بىراق قايتار جولدا دا توقتاماستان اۋەجايعا جەتكەنىمىزدى ەسكەرسەك، ءسىرا، تۇركيە «كەپتەلىستى» بىلمەيتىن ەل مە دەپ قالدىق.

جول بويى جوڭكىلگەن كولىكتىڭ نەبىر ءتۇرى – بىرىنەن ءبىرى وزادى،بىراق جىلدامدىقتى باياۋلاتقانى بولماسا، سابازدىڭ ءبىر توقتاپ، جولايى ءبىر «ايالداماعا» سالەم ەتكەنىن كورمەدىك. ءبىر باعىتقا قاراي كوسىلگەن  3-4 جولاق قانشا ماشينا بولسا دا، قانداي بولسا دا مىڭق ەتپەستەن كولىك اعىنىنا توتەپ بەرىپ جاتىر. ءبىر شۇڭقىر، نە جوندەلۋدەگى اينالما بولسايشى! بىردە كوپىردەن، بىردە قىردان، ەندى بىردە ويدان ءوتىپ،ءتىپتى تۋننەلدەن دە جارىسا شىعىپ جاتقان كولىكتى جۇرت. ىركىلمەيدى!

بىردە وڭنان، بىردە سول قاپتالدان جارىسقان تەمىرجول – بىرەسە قىر اسادى، بىرەسە قىراتقا سۇعىنعان تۋننەلگە ءسىڭىپ جوق بولادى.

تاعى ءبىر قىزىعى، باعدارشام دەگەن جارىقتىق قالالاردا از با دەپ قالدىق، ىستامبولدىڭ ورتاسىن كەزگەندەر ءۇشىن بۇل جالعان بولار، بىراق 700 مىڭدىق تۇرعىنى بار ەسكىشەحيردىڭ ەسكى ورتالىعىن ايتپاعاندا، قالا ىشىندە اندا-ساندا ءبىر باعدارشام عانا كەزىگەتىنى راس. ءسىرا، ونىڭ ورنىن جولايرىقتار باسقان بىلەم. بىراق جەر بەتىنەن بىلەۋدەن بولىپ شىققان جولايرىقتار تىم از، كوپشىلىگى جەرگە سۇعىنا سالىنىپتى، سودان بولار، الگى ايىرىقتاردان كولىكپەن ءمىنىپ-تۇسكەنىڭ بايقالمايدى، جەر بەتىندەگى جولمەن كەلە جاتقانداي سەزىلەدى. سوندايدا ارالاپ كەلىپ، ءبىر بىرىمىزدەن «وسى قالادا سۆەتوفور جوق بولسا كەرەك ءوزى؟» دەپ سۇراستىرعانىمىز بار...

باعدارشام جارىقتىق جولبايلاۋ ەكەن، كەپتەلىستىڭ كوكەسى وسى «شامدار» ەكەن دەپ قالدىق. ايتپاقشى، الاتاياقتى جولساقشىنى دا كورمەدىك. ءبىرىن ءبىرى سۇيكەپ قالىپ، امالسىز شوعىرلانىپ، كولىك اعىنى كەپتەلەتىندەي جول اپاتىنىڭ سەبەپشىلەرى دە سيرەك بولار - كوزگە تۇسپەدى.

تۇركيەنىڭ جولىن كورىپ، ويعا ەرىكسىز تۇردە «مەملەكەت دەگەنىڭ - جول ەكەن عوي» دەگەن وي ساپ ەتتى. شىنىندا دا سولاي ەكەن: الا-قۇلا، وي-شۇڭقىرلى، تاۋلى-تاستى تالاي اۋماقتى كورپە كوكتەگەندەي بىرىكتىرىپ جاتقان جول عانا! سول جول ارقىلى تۇركيە جۇرتى دا بىرىگىپ جاتىر، سول ارقىلى ەكونوميكا دا، الەۋەت تە ارالاسىپ، ەلدىڭ قاۋقارىن جولاۋشىعا ايگىلەۋدە.ەل مادەنيەتى دە سول اياق استىنداعى اسفالتتان باستالاتىنداي ەكەن.

سەرىك ابدىرەشۇلى

استانا – ىستامبول – ەسكىشەحير – استانا

Abai.kz

ال ەندى دامىعان 50 ەلدىڭ قاتارىنا قوسىلىپ، وزىق 30 ەلدىڭ ورتاسىنان ويىپ تۇرىپ ورىن الارىنا كامىل سەنىمدى، قازبا بايلىققا باي، قارىشتاپ كەتكەن قازاقستانداعى جولدارعا قارايىق: