تۇركيا قازاقتارىنىڭ كىشى قۇرىلتايىندا بيىلعى فۋتبول تۋرنيىرىندەگى  دودا “ەر جانىبەك باتىر”عا ارنالدى.

1986 جىلى ىرگەسى قالانعان تۇركيا قازاقتارى قورى بيىلدان باستاپ ءداستۇرلى تۇردە “كىشى قۇرىلتاي” وتكىزەتىن بولىپ وتىر. 1997 جىلى الىس شەتەل قازاقتارى اراسىندا العاش رەت ىستامبۇلدا كىشى قۇرىلتاي وتكىزۋگە مۇرىندىق بولعان تۇركيا قازاقتارى قورى ارادان 17 جىل وتكەننەن كەيىن كىشى قۇرىلتايدى جىل سايىن ۇيىمداستىرماق.

ەۋروپا مەن تۇركيا سەكىلدى الىس شەتەل قازاقتارى جاستارىنىڭ سۇيىكتى سپورتى - فۋتبول. قۇرىلتايلدا جاستار اراسىندا بەرەكە-بىرلىك پەن ىنتىماقتاستىقتى نىعايتۋ بارىسىندا فۋتبول ءتۇرنيريرى ۇيىمداستىرىلۋدا. جاستاردىڭ ۇلتتىق جانە تاريحي ساناسىن كۇشەيتۋ بارىسىندا تۋرنيردە جەڭىسكە جەتەتىن كوماندالارعا بەرىلەتىن دوداعا جىل سايىن كەنەسارى قاسىمۇلى، ماحامبەت وتەمىسۇلى، وسپان باتىر، ءاليحان بوكەيحان، مۇستافا شوقاي سىندى قازاقتىڭ ءبىر باتىرىنىڭ نەمەسە مەملەكەت قايراتكەرىنىڭ اتىن بەرۋ جونىندە شەشىم قابىلدانعان. ماسەلەن بيىلعى دودانىڭ اتى قازاقستاندا 300 جىلدىعى تويلانۋىنا بايلانىستى “ەر جانىبەك باتىر: دوستىق جانە باۋىرلاستىق دوداسى” دەپ اتاۋ ۇيعارىلعان. 29-30 شىلدە كۇندەرى بولاتىن فۋتبول تۋرنيرينە ستامبۋل، كونيا، نيگدە، ساليحلي قالالارىنان 8 فۋتبول كومانداسى قاتىسپاق.

تۇركيا قازاقتارىنىڭ كىشى قۇرىلتايىنىڭ ءۇشىنشى كۇنىندە تاڭەرتەن قۇرىلتايعا قاتىسۋشىلار قازاقتاردى تۇركياعا قابىلداۋلارىنا 62 جىل جانە قازاقستان تاۋەلىسىزدىگىن الەمدە ءبىرىنشى بولىپ تانۋلارىنا 23 جىل بولۋىنا بايلانىستى تۇرىك حالقىنا العىس سەزىمدەرىن ءبىلدىرۋ ماقساتىندا باسمينيستر ادنان مەندەرەس پەن پرەزيدەنت تۇرعىت ءوزالدىڭ بەيىتتەرىنە بارىپ، قۇران وقىپ دۇعادا بولادى جانە گۇل شوقىلارىن قويۋ ءراسىمىن وتكىزەدى.

سول كۇنى تۇستەن كەيىن تۇركيا قازاقتارىنىڭ كىشى قۇرىلتايىندا سونىمەن قاتار تۇركيا مەن ەۋروپاداعى قازاق قوعامدارىنىڭ وكىلدەرى مەن عالىمدارىنىڭ قاتىسۋىمەن “60 جىلدىعىندا تۇركيا قازاقتارىنىڭ كەشەگىسى، بۇگىنگىسى، ەرتەڭگىسى جانە اتامەكەنمەن قازاقستانمەن بايلانىستارى” تۋرالى قۇرىلتاي جينالىسى دا وتەتىن بولادى.

تۇركيا قازاقتارىنىڭ كىشى قۇرىلتايى 31 شىلدە كۇنى كەشكىسىن فۋتبول ءتۋرنيرىنىڭ جەڭىمپازى بولعان كومانداعا “ەر جانىبەك باتىر” دوداسىن تاپسىرۋ ءراسىمى جانە كونتسەرتتىك باعدارلامامەن اياقتالادى.

اباي-اقپارات