سەيسەنبى, 17 مامىر 2022
جاڭالىقتار 4145 0 پىكىر 25 شىلدە, 2014 ساعات 12:42

جامبىل وبلىسىندا قوي قىرىلۋدا

 

جامبىل وبلىسىندا ۇساق مال جاپپاي ارام ءولىپ جاتىر. ءبىر جەتىدە 60-قا جۋىق قوي بەلگىسىز دەرتتەن قىرىلىپ قالعان، دەپ حابارلايدى Bnews.kz جاڭالىقتارى  كتك ارناسىنا سىلتەمە جاساپ.

ەندى جەۋگە دە جارامسىز جانۋارلاردىڭ ەتىن جۇرت دالاعا تاستاۋعا ءماجبۇر بولعان. حابارلاماعا ساي ايشا ءبيبى اۋىلىنىڭ تۇرعىنى قانات ەركەباەۆتىڭ 50-گە جۋىق ۇساق مالى دەرت قۇرانى بولىپتى. ول: «نە اۋرۋ ەكەنىن بىلمەيمىن. ءبىرىنشى كوزى-باسى ىسەدى، ءسويتىپ قۇلايدى. اۋزىنان، كوزىنەن كوبىك بۇرق ەتە قالادى دا ولەدى»، - دەيدى.  ونىڭ ايتۋىنشا مال ورىستەن سۇيرەتىلىپ كەلگەن بويدا قوراعا كىرىپ قىلجيادى ەكەن.

قىرۋار شىعىنعا باتقان ازاماتقا مال دارىگەرلەرىنەن قايىر بولماعان، ءتۇرلى دارىمەن ءوزى ەمدەپ جاتىر. ال جۇمباق اۋرۋدان ءولىپ جاتقان قويدىڭ سانى كۇن ساناپ كوبەيىپ بارادى. 

ازىرگە اۋىلدا 60-قا جۋىق قوي ولگەن. تۇرعىندار ولەكسەلەردىڭ سانى ءالى دە ارتۋى مۇمكىن دەپ قاۋىپتەنەدى. ال مال دارىگەرلەرىنىڭ پىكىرى اۋىل تۇرعىندارىمەن سايكەسپەيدى، ولار بار بولعانى 11 قوي ءولدى دەپ وتىر. ولگەن مالدىڭ ەتى جەۋگە جارامايدى. سوندىقتان تۇرعىندار ولەكسەلەردى اۋىلدىڭ شەتىنە سۇيرەپ اكەپ تاستاپ جاتىر. بۇل جەردەن جۇقپالى دەرت تاراۋى دا مۇمكىن. ال شەنەۋنىكتەر قىرىلعان باستىڭ اقىسى مەملەكەت تاراپىنان وتەلمەيدى دەپ كەسىپ ايتقان. شىعىنعا باتقان جۇرت ەندى نە ىستەرىن بىلمەي، ابدىراپ وتىر.

Aباي-اقپارات

 

0 پىكىر