وتاندىق كينو سالاسى جاڭا تۋىندىمەن تولىقتى. كورەرمەن نازارىنا قازاقتىڭ چەمپيون ۇىلى بەكزات ساتتارحانوۆتىڭ قۇرمەتىنە تۇسىرىلگەن «بەكزات» ءفيلمىنىڭ تيزەرى ۇسىنىلدى. فيلمگە بەكزات ساتتارحانوۆتىڭ سپورت سالاسىنداعى 4 جىل ءومىرى ارقاۋ بولعان. بۇل تۋرالى Baq.kz جازدى.

 باستى رولدە اكتەر اسىلحان تولەپوۆ وينايدى. سونىمەن قاتار، ايان وتەپبەرگەن، سايات يسەمباەۆ، تۇرسىن قۇراليەۆ، باقتيار قوجا، مايرا ومار، ارتۋر تولەپوۆ ءتارىزدى اكتەرلەردى دە وسى فيلمنەن كورۋگە بولادى. بيوگرافيالىق كينوفيلمدى 2012 جىلى رەجيسسەر ەرمەك شاحمەت قولعا العان بولاتىن.

بەكزات ساتتارحانوۆ 1980 جىلى 4 ساۋىردە وڭتۇستىك قازاقستان وبلىسى تۇركىستان قالاسىندا تۋعان.
سيدنەيدە وتكەن XXVII-ءشى وليمپيادادا بوكستان چەمپيونى اتاندى. 1998 جىلى وتكەن الەم چەمپيوناتىنىڭ، 1999 جىلعى ازيا چەمپيوناتىنىڭ كۇمىس جۇلدەگەرى. قازاقستان رەسپۋبليكاسىنىڭ ەڭبەك سىڭىرگەن سپورت شەبەرى. I دارەجەلى «بارىس» وردەنىمەن ماراپاتتالعان.
2000 جىلى كولىك اپاتىنان قازا تاپتى. 
بۇگىندە تۇركىستان قالاسىندا بەكزات ساتتارحانوۆ اتىنداعى ىقشام اۋدان مەن سپورت كەشەنى بار. الماتى قالاسىندا كوشەگە بەكزات ساتتارحانوۆ اتى بەرىلدى. 2002 جىلدان باستاپ بوكستان بەكزات ساتتارحانوۆتى ەسكە الۋعا ارنالعان ءداستۇرلى حالىقارالىق تۋرنير وتەدى. 2010 جىلى، ياعني سپورتشىنىڭ 30 جاس مەرەيتويى قارساڭىندا تۋعان قالاسى تۇركىستاندا بەكزات ساتتارحانوۆقا ارنالعان ەسكەرتكىش قويىلدى. 2005 جىلى قازاقستاندا بوكسشىعا ارنالعان پوشتالىق ماركا شىعارىلدى. بەكزات تۋرالى 3 تىلدە كىتاپ، فوتوالبوم جارىق كورگەن. 2009 جىلى رەجيسسەر ساتىبالدى تەكەەۆ «بەكزات» اتتى دەرەكتى فيلم ءتۇسىردى. 
بەكزات سەيىلحانۇلى ساتتارحانوۆ 20 جىلدىق عۇمىرىندا شارشى الاڭدا 143 جەكپە-جەك وتكىزىپ، ونىڭ 132-سىندە جەڭىسكە جەتكەن.

اباي-اقپارات