استانا قالاسىنىڭ اكىمى يمانعالي تاسماعامبەتوۆ تاەكۆوندودان قارا بەلبەۋ مەن 7-داننىڭ يەگەرى اتاندى، - دەپ حابارلايدى Tengrinews.kz قازاقستان تاەكۆوندو فەدەراتسياسىنىڭ ءباسپاسوز قىزمەتىنە سىلتەمە جاساپ.

فەدەراتسيا پرەزيدەنتى ۆياچەسلاۆ كيم بۇكىلالەمدىك تاەكۆوندو فەدەراتسياسى اتىنان تاسماعامبەتوۆكە استانا قالاسى اكىمىنىڭ اتى-ءجونى تىگىلگەن قارا بەلبەۋ مەن جەتىنشى دان تۋرالى سەرتيفيكاتتى تابىس ەتكەن. وعان سايكەس يمانعالي تاسماعامبەتوۆ بولاشاقتا قازاقستانداعى تاەكۆوندونى دامىتۋعا ۇلەس قوسا بەرەتىنىن جەتكىزدى.

29-31 تامىز ارالىعىندا استانادا بۇكىلالەمدىك گران-پري دوداسى ءوتىپ، بۇكىلالەمدىك فەدەراتسيا باسشىلىعى ءبىزدىڭ ەلىمىزگە تولىق قۇراممەن كەلگەن بولاتىن. اتالعان توپتى باستاپ كەلگەن بۇكىلالەمدىك فەدەراتسيا پرەزيدەنتى چۋنگۆون چو يمانعالي نۇرعاليۇلىنا قۇرمەتتى داندى ارنايى تاپسىرۋدى مىندەتتەدى.

ەسكە سالا كەتەيىك، 2014 جىلدىڭ باسىندا چو مىرزا نۇرسۇلتان نازارباەۆپەن كەزدەسىپ، وعان توعىزىنشى داندى جانە ونىڭ بەلبەۋى مەن كيمونوسىن تابىس ەتكەن بولاتىن. مەملەكەت باسشىسى سول كەزدە بۇل كيمونونى تاەكۆوندودان ەڭ جوعارعى داندى يەلەنگەن قازاقستاندىق سپورتشىعا بەرىلەتىنىن ايتقان ەدى.

ايتا كەتۋ كەرەك، مۇنىڭ الدىندا، 2013 جىلى تاەكۆوندودان توعىزىنشى داندى رەسەي پرەزيدەنتى ۆلاديمير پۋتين دە يەلەنگەن بولاتىن. توعىزىنشى دان - تاەكۆوندوداعى ەڭ جوعارعى دارەجە. ول جەكپە-جەكتىڭ بۇل ءتۇرىنىڭ ۇلى شەبەرلەرىنە بەرىلەدى. الەمدە بۇل دارەجەگە ساناۋلى ادام عانا يە.

اباي-اقپارات