وسى جىلدىڭ 21 ساۋىرىندە الماتى قالاسىنداعى پانفيلوۆشىلار پاركىندە ەكىنشى دۇنيەجۇزىلىك جانە اۋعان سوعىسىنىڭ ارداگەرلەرىنىڭ بەلسەندى توبى  جينالىپ، قازاق تىلىندە شىعاتىن «اڭىز ادام» جۋرنالىن ورتەگەنى بەلگىلى. قولدارىندا ميتينگ وتكىزۋگە رۇقساتى جوق، بىراق قارۋلارى بار  سەرگەي پاشەۆيچ پەن مۋرات ابديشۋكۋروۆ باستاعان توپتىڭ  وزدەرىن ەركىن ۇستاپ، لەپىرە سويلەۋىنىڭ سىرىن، الگى قارۋلى ميتينگىنىڭ نەگىزگى ۇيىمداستىرۋشىسى الماتى قالاسى ىشكى ساياسات باسقارماسىنىڭ باستىعى ەربولات اۋەزوۆ بولعانىن دا وسىعان دەيىن ايتقان ەدىك.

  انشەيىندە قوعام بەلسەندىلەرىنىڭ ۇيىنە بارىپ، ەسكەرتۋ جاساپ، جەكە (ودينوچنىي) پيكەتكە شىققاندارعا تۇرا ۇمتىلاتىن پروكۋرورلار جۇمعان اۋىزدارىن بۇل جولى اشقان جوق.

قازاقستاننىڭ ءبىر بولىگىن جاۋلاپ الامىز دەگەن ۆلاديمير جيرينوۆسكي مەن ەدۋارد ليمونوۆقا بايلانىستى نوتا جىبەرىپ، رەسەيدەن جاۋاپ الا الماعان  قر سىرتقى ىستەر مينيسترلىگى «اڭىز ادام» تۋرالى رەسەيدىڭ نوتاسى كەلگەن كۇنى-اق كەشىرىم سۇراپ، جۋرنال يەسىنىڭ جازالاناتىنىن سول ساتتە مالىمدەپ ۇلگەرگەن-ءدى.

سونىڭ جالعاسى رەتىندە 11مامىر كۇنى «اڭىز ادامنىڭ» ءىسى الماتى قالاسى مامانداندىرىلعان اۋدانارالىق اكىمشىلىك سوتىندا قارالدى.

سوتقا ايىپتاۋشى رەتىندە قاتىسقان الماتى قالاسى ىشكى ساياسات باسقارماسىنىڭ وكىلى قورلان قۇرمانبەك «الماتى قالاسىندا شىعاتىن باسىلىمداردى تەكسەرۋ بارىسىندا «جۇلدىزدار وتباسى-اڭىز ادام»، «جۇلدىزدار وتباسى» جانە «جۇلدىز جورامال» جۋرنالدارىنا يەلىك ەتەتىن  «وتباسى باسپاسى» جاۋاپكەرشىلىگى شەكتەۋلى سەرىكتەستىگى جانە ونىڭ باس رەداكتورى جارىلقاپ قالىبايدىڭ قر «بۇقارالىق اقپارات قۇرالدارى تۋرالى» زاڭنىڭ 15 بابىنىڭ 1 تارماعىنىڭ 8 تارماقشاسىن بۇزعانى انىقتالىپ، سوعان سايكەس 6 حاتتاما تولتىرىلدى» دەپ مالىمدەدى.

 (قر «بۇقارالىق اقپارات قۇرالدارى تۋرالى» زاڭى. 15-باپ. شىعارىلىم دەرەكتەرi. 1. مەرزiمدi باسىلىمنىڭ ءاربiر شىعارىلىمىندا مىناداي مالiمەتتەر بولۋعا تيiس:

... 8) باسپاحانانىڭ اتاۋى، ونىڭ مەكەن-جايى جانە رەداكتسيانىڭ مەكەن-جايى.) بۇزعان دەپ ايىپ تاققان.  

قر اكىمشىلىك قۇقىق بۇزۋشىلىق تۋرالى زاڭنىڭ 350 بابىنىڭ 1 تارماعىندا ول زاڭ بۇزۋشىلىق ءۇشىن بۇقارالىق اقپارات قۇرالىنا 20 ايلىق ەسەپتىك كورسەتكىش كولەمىندە ايىپ سالىنادى دەپ كورسەتىلگەن. (قراكىمشىلىك قۇقىق بۇزۋشىلىق تۋرالى كودەكسى. 350-باپ. شىعارىلىم دەرەكتەرiن جاريالاۋ ءتارتىبىن بۇزۋ. 

1. مەرزiمدi باسپا باسىلىمدارىن بەلگiلەنگەن شىعارىلىم دەرەكتەرiنسىز شىعارۋ، ەفيردە ءوز اتاۋىن حابارلاماي، سول سياقتى انىق ەمەس نە كورiنەۋ جالعان شىعارىلىم دەرەكتەرiمەن ەلەكتروندىق بۇقارالىق اقپارات قۇرالدارىنىڭ تەلە-جانە راديوباعدارلامالارىنىڭ ەفيرگە شىعۋى، - بۇقارالىق اقپارات قۇرالدارى ونiمدەرiنiڭ تارالىمى تاركiلەنە وتىرىپ نەمەسە ونسىز, ايلىق ەسەپتiك كورسەتكiشتiڭ جيىرماعا دەيiنگi مولشەرiندە ايىپپۇل سالۋعا اكەپ سوعادى.)

باپتا ناقتى زاڭدى تۇلعاعا نەمەسە باس رەداكتورعا ايىپ سالىناتىنى ناقتى انىقتالماعان. ەكى زاڭدا دا نە «باس رەداكتور» نەمەسە «باسىلىمنىڭ مەنشىك يەسى» دەگەن ءسوز مۇلدە جوق.  باسىلىم ايىپتى دەپ تانىلعاننىڭ وزىندە ءبىر باپپەن ەكى جازا قولدانۋ زاڭعا قايشى. سوعان قاراماستان «وتباسى باسپاسى» جاۋاپكەرشىلىگى شەكتەۋلى سەرىكتەستىگىنە جانە ءۇش جۋرنالدىڭ باس رەداكتورى رەتىندە  جارىلقاپ قالىبايعا الماتى قالاسى ىشكى ساياسات باسقارماسى تەك ءبىر باپ بويىنشا 6 (التى) حاتتاما تولتىرعان. سوندىقتان، ءۇش حاتتامانىڭ تولتىرىلۋى زاڭسىز ەكەنى سوت كەزىندە دالەلدەندى.   

باسقارما وكىلى قورلان قۇرمانبەك بارلىق مەرزىمدى باسىلىمدارعا تەكسەرۋ، قاداعالاۋ بىردەي، الالاۋسىز، ءادىل جۇرگىزىلىپ وتىراتىنىن ايتقانىمەن باسىپ شىعارعان باسپاحاناسىنىڭ مەكەن-جايى كورسەتىلمەگەن باسقا دا گازەت، جۋرنالداردىڭ بار ەكەنى سوت بارىسىندا دالەلدەندى.

قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ 2014 جىلدىڭ 27 اقپانىندا «قازاقستان رەسپۋبليكاسىندا كاسىپكەرلىك قىزمەت ءۇشىن جاعدايدى جاقسارتۋ جونىندەگى تۇبەگەيلى شارالار تۋرالى» №757  جارلىعىنا قول قويىپ (http://egemen.kz/?p=20937 ), سول كۇنى  ول «27 اقپاندا مەن ەلىمىزدەگى كا­سىپ­كەرلىك قىزمەتتىڭ دامۋىنا قاجەتتى جاعدايلاردى جاقسارتۋ جو­نىندەگى تۇبەگەيلى شارالار تۋرالى جارلىققا قول قويدىم. مەن 2 ساۋىردەن باستاپ، 2015 جىلدىڭ 1 قاڭتارىنا دەيىن شاعىن جانە ورتا بيزنەس سۋبەكتىلەرىنە تەكسەرىس جۇرگىزۋگە موراتوري جاريالايمىن. مەن قازاقستاندىقتاردىڭ بيزنەس جۇر­گىزۋىنە قاجەتتى جاعدايدى ءارى قاراي جاقسارتا ءتۇسۋ ماقساتىندا ۇكىمەتكە بىرقاتار ناقتى شارالار قابىلداۋدى جۇكتەدىم» (http://egemen.kz/?p=20933 ) دەپ مالىمدەگەن بولاتىن. الايدا الماتى قالاسى ىشكى ساياسات باسقارماسى پرەزيدەنتتىڭ بۇل جارلىعىن ورەسكەل بۇزىپ، «وتباسى باسپاسى» جاۋاپكەرشىلىگى شەكتەۋلى سەرىكتەستىگىنىڭ قىزمەتىنە جان-جاقتى تەكسەرۋ شارالارىن جۇرگىزگەن. باسقارمانىڭ  ارەكەتى پرەزيدەنت جارلىعىن ەلەمەۋ نەمەسە ورەسكەل بۇزۋ ەكەنى سوت بارىسىندا ەسكەرتىلدى. 

«اڭىز ادامدى» ورتەگەن زاڭسىز ميتينگىنى ۇيىمداستىرعان دا، ءبىر باپ بويىنشا تولتىرىلعان 6 حاتتاماعا دا قول قويعان الماتى قالاسى ىشكى ساياسات باسقارماسىنىڭ باسشىسى ەربولات اۋەزوۆ ەكەنى جانە ونىڭ ءبارى ساياسي تاپسىرىسپەن جاسالىپ جاتقانى، سونىمەن بىرگە ونىڭ بۇل ارەكەتى كونستيتۋتسيادا كەپىلدىك بەرىلگەن ءسوز بوستاندىعىن تۇنشىقتىرۋ ەكەنى، ءجۋرناليستىڭ زاڭدى كاسiپتiك قىزمەتiنە كەدەرگi كەلتiرۋ اكىمشىلىك جانە قىلمىستىق جاۋاپكەرشىلىككە سوقتىراتىنى ەسكەرتىلدى.

سوعان قاراماستان ءىستى قاراعان الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ سۋدياسى نۇرجان پاقىردىنوۆ ايىپتالۋشى جاقتىڭ دالەلدەرى مەن ايعاقتارىنا نازار اۋدارماستان 6 حاتتاما بويىنشا كىنالى دەپ تاۋىپ، زاڭدى تۇلعا بىرەۋ ەكەنىنە قاراماستان  «وتباسى باسپاسى» جاۋاپكەرشىلىگى شەكتەۋلى سەرىكتەستىگىنە 20  ايلىق ەسەپتىك كورسەتكىش كولەمىندە، ءۇش جۋرنالدىڭ باس رەداكتورى ءبىر ادام ەكەنىنە قاراماستان ءۇش جەكە تۇلعاعا، ياعني جارىلقاپ قالىبايعا 20  ايلىق ەسەپتىك كورسەتكىش كولەمىندە ايىپ سالۋ تۋرالى شەشىم قابىلدادى.

الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ سۋدياسى نۇرجان پاقىردىنوۆ وتكەن جىلدىڭ 1 جەلتوقسانىندا جول اپاتىن جاساپ، بەس ادامدى جاراقاتتاپ، ءبىر ادامنىڭ ولىمىنە سەبەپشى بولعان ماقسات ۇسەنوۆتى 2014 جىلدىڭ 14 اقپانىندا اقتاپ جىبەرگەن بولاتىن.

ءسويتىپ، بەس ادامدى جاراقاتتاپ، ءبىر ادامدى ولتىرگەن ادامدى اقتاپ شىققان سۋديا نۇرجان پاقىردىنوۆ ءۇش جۋرنالدى باسپاحانانىڭ مەكەن- جايى جازىلماي قالعانى ءۇشىن 120 ايلىق ەسەپتىك كورسەتكىش كولەمىندە نەمەسە 225 840 تەڭگە ايىپپۇل سالۋ تۋرالى شەشىم قابىلدادى.

سۋديا نۇرجان پاقىردىنوۆ 2009 جىلدىڭ 24 ماۋسىمىندا بولات ابىلەۆكە جۋرناليستەر ميتينگىسىن ۇيىمداستىردى دەپ ايىپتاپ، 50 اەك كولەمىندە ايىپپۇل سالعانى ەسىمىزدە. «پراۆدا كازاحستانا» گازەتىن توقتاتۋ جانە 10 اەك كولەمىندە ايىپپۇل سالعان دا سول ن. پاقىردىنوۆ بولاتىن. ال www.doska-pozora.presscom.org سايتىندا «الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ سۋدياسى نۇرجان پاقىردىنوۆ «العا» حالىقتىق پارتياسىنىڭ جەتەكشىسى ۆلاديمير كوزلوۆتى قالالىق «ارباتتا» مۇحتار جاكىشەۆتىڭ ءومىربايانى جازىلعان پاراقشا تاراتقانى ءۇشىن عانا تەمىر تورعا توعىتتى» http://doska-pozora.presscom.org/apparat/68203.html   دەپ جازىلىپ تۇر.

ماقسات ءىلياسۇلى، زاڭگەر

Abai.kz