قىتاي ەكسپورت-يمپورت بانكى جانە قىتاي مەملەكەتتىك دامۋ بانكى قازاقستان دامۋ بانكىنە («بايتەرەك» ۇلتتىق باسقارۋشى حولدينگى» اق ەنشىلەس كاسىپورنى) $1ملرد جانە $500 ملن قارجى بولمەك. بۇل تۋرالى ناقتى كەلىسىم قازاقستان پرەزيدەنتى نۇرسۇلتان نازارباەۆتىڭ 2014 جىلعى مامىردىڭ 19-21 ارالىعىندا قىتايعا رەسمي ساپارى بارىسىندا ەكى ەل مەملەكەتتەرى باسشىلارىنىڭ قاتىسۋىمەن وتكەن كەزدەسۋدە بەكىتىلدى. بۇل تۋرالى BAQ.KZ حابارلادى.

قىتايدىڭ ەكسپورت-يمپورت بانكى «قازاقستان دامۋ بانكى» اق $1 ملرد. كولەمىندە قارجى بولەدى. بۇل قاراجات شىمكەنت مۇناي وڭدەۋ زاۋىتىن مودەرنيزاتسيالاۋ مەن قايتا جوندەۋگە باعىتتالماق. اتالعان نەسيە ءبىزدىڭ ەلىمىزگە شانحاي ىنتىماقتاستىق ۇيىمىنىڭ مۇشەسى بولعانى ءۇشىن جەڭىلدەتىلگەن تۇردە بەرىلىپ وتىر.

قىتاي مەملەكەتتىك دامۋ بانكى «قازاقستان دامۋ بانكى» اق-نا شانحاي ىنتىماقتاستىق ۇيىمى بانك ارالىق بىرلەستىگى اياسىندا $500 ملن. بولمەك. بۇل قارجى قازاقستانداعى شيكىزاتتىق ەمەس سەكتورداعى جوبالاردى قارجىلاندىرۋعا جۇمسالاتىن بولادى.

اباي-اقپارات